1 Samwil 10 - Hanunuu

¹ Bag-u nagbuul si Samwil usa ka sukadan may sukad lana ulibu, ibinuhus niya sa ulu ni Saul, bag-u kay hinagkung ag magkun, “Ti Panginuun imaw ti nagpili sa kanmu hampay pumanguna sa kay magkaapu pag nasakupan.

² Nu kita mamululagan yi sab, may masampakan kawu duwa ka lalaki arani sa may lubung ni Rakil sa Silsa, sa katugkaan daga Binhamin. Bag-u sumabi sida sa kanmu magkun, ‘Ti manga asnu kanmu paghanapun nakitan yi. Udyi pag-alalahanun nimu ama, kamu yi ngap kay pag-alalahanun taynguna, magkun siya, “Kabitay wadi kang buwatun hampay makitan niku kang anak?” ’

³ “Bag-u parargu kanmu lakaw siyun ginan ag rumas-ug kawu sa may daka puun kayu sa Tabur. Masulang nimu ati ti tulu ka lalaki atabug sa Bitil hampay mansamba sa Diyus. Kay usa sa kanda may dara tulu ka anak kambing, kay usa may dara tulu ka tinapay ag kay usa waya gid may dara bilugan paknul kay sukad intus.

⁴ Manhampang sida sa kanmu bag-u tumunghul sida sa kanmu duwa ka tinapay, ag tanggapun diman waydi nimu tunda.

⁵ Siyun ginan rumas-ug kawu sa Bantud Diyus, nu naan pag may kampu ti manga Pilistiyu. May masampakan kawu usa ka gurupu manga purupita maglus-ug ginan sa simbahan sa abwat pag rugar. Magpatunug sida alpa, pamakaransing, palawta hanggan lira, bag-u magtultul bagaw Diyus.

⁶ Bag-u suldan kawu Ispiritu Panginuun ag manultul waydi kawu bagaw Diyus kaibahan nida, ag kanmu pagkatawu bumag-u yi waydi.

⁷ Nu matupad yi inda pag manga bagay, buwata nimu nu unu ti mayad dahil kaibahan nimu ti Diyus.

⁸ “Pag-una yi kawu sa kangku ati sa Gilgal. Dumasun lang aku sa kanmu hampay manhandug manga handug pagsunugun hanggan manga handug sa mayad pag pakiusa. Dapat alagda nimu aku asan sa sulud pitu ka sirang hanggan sa ud rumas-ug aku. Bag-u itultul niku sa kanmu ti tanan nimu buruwatun.”

Binwat Hari si Saul

⁹ Pagka namululagan yi sida ni Saul, binag-u yi Diyus kay pagkatawu ni Saul. Ati katpung pag sirang nangyari diman ngani tunda pag manga tanda kay ipinaalam ni Samwil sa kanya.

¹⁰ Pagka rinmas-ug si Saul hanggan kay suruguun sa Gibiya, sinulang siya manga purupita. Bag-u sinuldan Ispiritu Diyus si Saul ag nanultul yi waydi siya bagaw Diyus kaibahan tunda pag manga purupita.

¹¹ Pagka nakitan siya niya manga kakilala katida kay buwat magtultul bagaw Diyus kaibahan manga purupita, nagparaingan-an sida, “Hintay nguna inda ti nangyari sa kan Saul kay anak ni Kis? Siya hanggan purupita yi aw waydi nguna?”

¹² Nagsabi ti usa ka tawu taga siyun diman waydi pag daga magkun, “Balaw mahalaga nu si unu kay manga gurang; una si unu mahimu di pumurupita.” Siyun nag-umpisa ti sarabihun, “Purupita yi aw hanggan si Saul?”

¹³ Pagka nakatultul yi bagaw Diyus si Saul, nag-ati siya sa simbahan sa abwat pag rugar.

¹⁴ Pagka nakakit kay bapa sa kan Saul hanggan sa kay suruguun namaingana siya magkun, “Naan ginan kamu?” Sinmagut si Saul, “Hinanap duy nimi ti manga asnu. Pagka unman nimi mag-akitan nag-ati kami sa kan Samwil.”

¹⁵ Magkun maan kay bapa sa kan Saul, “Hintay kay sinabi ni Samwil sa kanmu?”

¹⁶ Sinmagut si Saul, “Sinabi niya sa kanmi nakitan yi kunu ti manga asnu.” Dapat unman itinultul ni Saul sa kay bapa kay binagaw ni Samwil tungkul sa kay paghari aban.

¹⁷ Tinipun ni Samwil ti manga Israilita ati sa Mispa hampay tultulan sida nu hintay ti sinabi Panginuun.

¹⁸ Bag-u magkun si Samwil sa manga Israilita, “Kaindaay ti pagsabihun Panginuun, ti Diyus Israil magkun, ‘Ipinalwas niku kamu ginan sa Ihiptu, ag irinibri niku kamu ginan sa kamang manga Ihipsiyu hanggan sa tanan nasyun mag-unuunu sa kanyu.

¹⁹ Dapat taynguna pag sirang pinatlikudan niyu aku, madi aku kanyu Diyus tig bawi sa kanyu ginan sa tanan niyu malakawan pag kakurian hanggan kagipitan. Sinabi niyu sa kangku magkun, “Kailangan pakan-an nimu kami usa ka hari.” ’ Nakan taynguna kamu pag-atubang sa Panginuun angay sa kada lahi niyu ag magtal-anakan.”

²⁰ Pagka ipinadulud ni Samwil ti kada linahi Israil, kan Binhamin pag lahi ti napili.

²¹ Bag-u ipinadulud diman waydi ni Samwil ti lahi ni Binhamin angay sa kanda magtal-anakan, ag kan Matri pag magtal-anakan ti napili. Ginan sa magtal-anakan ni Matri si Saul ti napili kay anak ni Kis. Dapat pagka kanda hinanap si Saul, unman nida mag-akitan.

²² Nakan ngani kanda maan ipinaingana sa Panginuun magkun, “Atay yi aw nguna ti napili pag tawu?” Sinmagut ti Panginuun magkun, “Atay yi ngani siya dapat ay napatagu siya napabusul sa mabutang.”

²³ Nakan madaldali nida bin-ul si Saul ati ginan. Pagka tinmindug siya sa karaw-an manga tawu, abwat man siya sa tanan. Ti iba tugka lang sa kay labay ni Saul.

²⁴ Sinabi ni Samwil sa tanan tawu magkun, “Inda yi ngani duy ti pinili Panginuun. Unman may pumarihu sa kanya sa buu Israil.” Bag-u nanriringgitan ti tanan tawu magkun, “Mabuhi ti hari!”

²⁵ Bag-u itinultul ni Samwil sa manga tawu ti ugali pagkahari, ti manga karampatan hanggan turupadun. Isinurat niya sa ribru bag-u kay ibinugtang sa atubangan Panginuun. Siyun ginan kay yi pinauli ti manga tawu atabug sa kada sadili nida balay.

²⁶ Si Saul hanggan nuli diman waydi sa kay ulian sa Gibiya. Nagkuyug diman sa kanya ti usa ka gurupu manga sundalu imaw ti iinalistu Diyus umiba sa kanya.

²⁷ Dahil may daut manga tawu maghangal-hangal sa kanya magkumun, “Kabitay tunda pag tawu rumibri sa kanta?” Pinuyaan lang nida si Saul, unman gid siya pinakan-an pamakaun una di bilang pagkilala siya ti hari. Dapat si Saul balaw nangingay.