1 Samwil 1 - Hanunuu

Kay Kapanganakan ni Samwil

¹ May usa ka lalaki ginan sa lahi ni Sup kay ngaran si Ilkana. Sa Rama siya pag mag-uli sa kabantudan Ipraim. Anak siya ni Hiruham anak ni Ilihu. Si Ilihu kay anak waydi ni Tuhu, anak ni Sup, ginan sa lahi ni Ipraim.

² Si Ilkana may duwa ka asawa, inda sida ni Hana ni Pinina. May manga anak si Pinina dapat si Hana unman.

³ Kada timpu mag-atag si Ilkana hanggan kay magtal-anakan sa Silu hampay mansamba ag manhandug sa Panginuun Makamaskihan. Ti duwa ka anak ni Ili sida ni Hupni ni Piniis imaw ti manga manughandug Panginuun ati sa Silu.

⁴ Kada manhandug si Ilkana, paghuray-hurayun niya kay handug para sa kanda ni Pinina hanggan sa kay manga anak.

⁵ Dapat dubli kay pag-ipakaun pag huray sa kan Hana dahil pagmahalun gid niya siya una unman mag-anak dahil binwat baug siya Panginuun.

⁶ Dahil sa unman ngani siya mag-anak, pirmi siya pagsungyawun ag pagpakay-ahun ni Pinina, kay karibal.

⁷ Kainda ti magpangyari timpu-timpu. Sa kada mag-atag si Hana sa Turda Taragbuan Panginuun, pagsungyawun siya ni Pinina tugka sa magpanlumian wadi siya ag udyi makakaun.

⁸ Magkun si Ilkana sa kanya, “Hayga kawu maglumi? Hayga dayu kawu mangaun? Hayga kawu maruku? Balaw aw lugud aku mahalaga kaysa sampulu ka anak?”

^9-10 Pagka sa usa ka sirang, igu nakakaun yi sida ati sa Turda Taragbuan Panginuun sa Silu, tinmindug si Hana bag-u nandarangin maglumi dahil sa subra pag karukuan. Tunda katpung matukawan si Ili ti manughandug sa may sabian Balay Panginuun.

¹¹ Nantaratu si Hana sa Panginuun magkun, “Panginuun Makamaskihan, bantayi duy nimu kang kakurian. Alalahana duy nimu aku kanmu suruguun ag danga pagkalimti. Nu pakan-an nimu aku usa ka anak lalaki, ihandug niku siya sa kanmu hampay sumirbi siya sa kanmu sa buu niya buhi. Ag balaw niku ipauguy kay buhuk, bilang tanda sa kay pagsirbi sa kanmu.”

^12-13 Habang parargu kay magdarangin ni Hana sa Panginuun, nakitan ni Ili magtibtibut kay bibig ni Hana dapat unman mag-asaydan kay pagsabihun. Kay isip ni Ili langu si Hana.

¹⁴ Nakan magkun siya sa kanya, “Tugka kapira kawu maglangu? Apasi yi tunda!”

¹⁵ Sinmagut si Hana, “Balaw duy aku langu, unman aku nakainum una hintay pag kalasi intus. Pag-iampu lang niku sa Panginuun kang mag-asaydan kakurian.

¹⁶ Danga duy nimu pag-isipa daut aku pag babayi. Magdarangin duy aku sitaay dahil sa subra niku pag karukuan.”

¹⁷ Magkun si Ili, “Nu katida, pag-uli yi kawu, danga magkaarimputu. Mana ipakaun Diyus Israil kanmu paghagadun sa kanya.”

¹⁸ Sinmagut si Hana, “Salamat duy sa kanmu.” Linmakaw yi siya ag nangaun, balaw yi maruku kay uyahun.

¹⁹ Pagka sa usa ka sirang, surip waya gid binmangun si Ilkana hanggan kay magtal-anakan, nagsamba sida sa Panginuun. Pagka natapus ti samba nuli sida sa kanda balay sa Rama. Inulid ni Ilkana si Hana, ag sinagut Panginuun kay darangin ni Hana magkaimaw anak.

²⁰ Rinmas-ug ti panahun namuduy si Hana, nanganak usa ka lalaki. Iningarnan niya inda Samwil, dahil magkun siya, “Hinagad niku siya sa Panginuun.”

Ihinandug ni Hana si Samwil

²¹ Rinmas-ug maan ti udas si Ilkana hanggan kay buu magtal-anakan manhandug sa Panginuun ga kaybi diman ga kanda pagbuwatun kada timpu. Inda diman ti udas manhandug siya bilang pagtupad sa kay taratu sa Panginuun.

²² Dapat unman kinmuyug si Hana. Magkun siya sa kay asawa, “Nu bumul-iw yi ti lapsag sa pagsusu sa kangku darahun niku siya sa Turda Taragbuan Panginuun hampay ihandug sa kanya. Ati yi siya pag muli sa buu niya buhi.”

²³ Sinmagut si Ilkana, “Buwata nu hintay ti mayad sa kanmu. Sitaay lang dapu kawu tugka sa bumul-iw sa pagsusu ti lapsag. Mana awatan kawu Panginuun sa kanmu itinaratu sa kanya.” Nakan napatayak sa balay si Hana ag inalagaan kay anak.

²⁴ Pagka nagbul-iw sa pagsusu ti lapsag, dinara siya ni Hana sa Turda Taragbuan Panginuun ati sa Silu. Nandara diman siya tulu ka timpu tudu baka, tunga saku arina ag intus masukadan sa paknul.

²⁵ Pagka naiyaw yi ti baka, dinara nida si Samwil ati sa kan Ili.

²⁶ Magkun si Hana sa kan Ili, “Nu magkaimatun-an duy nimu aku pag babayi, imaw ti matindugan sitaay kaybi magdarangin sa Panginuun.

²⁷ Hinagad niku indaay pag anak sa Panginuun ag ipinakaun niya kang paghagadun.

²⁸ Nakan taynguna ihandug niku siya sa Panginuun. Manirbi siya sa Panginuun sa buu niya buhi.” Bag-u nagsamba sida sa Panginuun.