1 Pidru 5 - Hanunuu

Kay Manada Diyus

¹ Aku duy may paanyu sa manga manug-asiwa sa kanyu. Aku manug-asiwa diman ga kanyu. Nakitan niku kan Kiristu inagwanta pag manga kakurian. May kabahagi diman aku sa kadayawan arani yi ipaburayhaw aban.

² Kang gid bilin sa kanyu alagaan niyu ti manada Diyus kay iinintirga sa kanyu. Tupada niyu kanyu buruwatun pag may maluag pag naisipan, balaw sa nalugusan kanyu kagustuhan. Dahil tunda ngani kay gustu Diyus. Tupada ngani niyu kanyu katungkulan danga magkaibug sa may pakasa, lalu ngap pag may kabayaan kanyu magsirbi.

³ Danga waydi kamu ga usa ka amu niyu manga nasakupan. Lalu ngap kailangan kamu ti mayad pag mustara sa manada niyu.

⁴ Sa pagsitay aban Pangulu Manug-alaga, makatanggap kamu masnag pag sangbaw hari, unman magpusyaw una hanggan waya aban.

⁵ Kamu duy pag manga udwaya masyadu kanyu idad, kailangan pagpasakup kamu sa manga manug-asiwa iglisya. Pagparasakpan kamu tanan magsirirbihan kamu sa usa kag sa usa. Angay sa isinurat sa Banal Kasuratan magkun, “Ti Diyus lumaban sa mayabang-yabang, dapat pakan-an niya kaayadan ti mapinakumbabaun kay naisipan.”

⁶ Nakan ngani pagpasakup kamu sa kamaskihan Diyus, hampay ipaabwat niya kamu nu rumas-ug kay taning pag udas.

⁷ Intirgahan niyu sa Diyus ti tanan kakurian niyu, dahil siya madunung mag-alaga sa kanyu.

⁸ Pagmapininsarun kamu, pag-aman. Si Satanas ngani kanyu kalaban parihu sa liyun kay mag-ungal, magpalibut-libut maghanap kay siribaun.

⁹ Danga gid kamu magpatalu sa kanya. Pagpakarig-un kamu sa kanyu pagsarig sa Diyus. Naalaman diman ngani niyu, balaw lang kamu ti may pag-agwantahun katida pag kakurian. Hanggan kanyu manga patar-ari sa buu kalibutan may pag-agwantahun diman waydi.

¹⁰ Pagka lumawuy kanyu ngalay-ngalay pag kakurian, pakan-an kamu Diyus kahustuhan hanggan karig-unan hampay udyi magkaanggihut. Siya ti gimpuunan tanan kaayadan, siya diman waydi ti nagpili sa kanyu hampay kamu may kabahagi waydi sa kay ud may katapusan pag kadayawan kaibahan ni Kiristu.

¹¹ Sa kanya ti kamaskihan hanggan waya aban. Amin.

Kay Pangatapusan pag Bilin

¹² Sa kang nagsurat inda sa kanyu aku inawatan ni Silbanu. Alam niku siya usa ka masarigan pag patar-ari. Sa inda ngani pag surat dag-ud dag-ud kang gustu pabisugun niku kanyu naisipan, ag kang diman pag-isabi sa kanyu inda ngani ti tutuu pag kaayadan kay ipinakaun Diyus. Dagkaanggihut kamu ginan sa inda pag pakaun kaayadan.

¹³ Ti iglisya sa Babilunya magpaingana nu kabitay waydi kamu asan. Sida manga pinili diman parihu sa kanyu. Si Markus hanggan magpaingana waydi nu kabitay kanyu kahamtangan. Siya kang pinagkaanak sa sarig sa kan Kiristu.

¹⁴ Kamu manga magtar-arian sa kan Kiristu, pagparaingan-an kamu pag may pagmahal sa usa kag sa usa. Ti kahusayan pagsa kanyu yi gid tanan, sa manga napasakup sa kan Kiristu.