1 Pidru 4 - Hanunuu

Ti Bag-u pag Buhi

¹ Nag-agwanta si Kiristu sa kakurian sa kay buhi sitay sa babaw daga, nakan ngani una kamu pag-alistu sa kanyu naisipan hampay mag-agwanta waydi. Dahil ti tawu nu mag-agwanta sa kakurian sa kay buhi sitay sa babaw daga, napatlikud yi siya ginan sa kasalanan.

² Yabi sirang kay yi pag-intindihun ti kagustuhan Diyus sa kay buhi sitay sa babaw daga, balaw yi pag-intindihun niya kay sadili pag kagustuhan.

³ Kang-ud yi ti manga nakalawuy pag sirang kanyu inuyang sa kanyu manga binwat angay sa ugali manga balaw napasakup sa kan Kiristu, manga mahalay, manga daut kagustuhan naisipan, manga maglangu, manga subra yi pag kasayahan, manga mag-inuman, manga magsamba sa diyus-diyusan balaw angay sa atubangan Diyus.

⁴ Maglingut ngani sida nu hayga nguna udyi kamu magpaminsan taynguna sa unman may kabuluhan pag manga ugali nida. Nakan pagkadat-an nida kamu.

⁵ Dapat may kapanagutan sida sa Diyus. Handa yi sumintinsiya ti Diyus una sa manga buhi waya una sa manga namatay yi.

⁶ Itinudlu diman ti Mayad pag Barita sa manga namatay hampay mabuhi diman waydi sida sa Ispiritu angay sa Diyus, madi natakdan yi sida kamatayan bilang sintinsiya sa kanda.

Mayad pag Manug-asikasu sa manga Ipinakaun Diyus

⁷ Arani yi ti katapusan tanan manga bagay, nakan pag-isip kaayad nu hintay ti dapat niyu buwatun hampay mayad kanyu magdarangin.

⁸ Un-an sa tanan kailangan pagmalahalan gid ungud kamu, dahil nu may pagmahal mapatawad di ti mayamu pag kasalanan.

⁹ Tanggapa di niyu ti manga patar-ari sa kanyu balay, danga sa barungbadu.

¹⁰ Pagmatinupadun kamu pag manga piniyaran manga tuhay-tuhay pag kaayadan Diyus. Gamita niyu kanyu tinanggap ayaw-ayaw hampay mapakinabangan tanan patar-ari.

¹¹ Nu kawu magpaliwanag, pagginan sa Diyus kam paliwanag. Nu kawu manugsirbi waydi, gamitun nimu ti kabisugan ipinakaun Diyus sa kanmu magsirbi, hampay sa tanan bagay dayawun ti Diyus dahil sa kan Hisu-Kiristu. Sa kanya ti kadayawan hanggan kamaskihan hanggan di aban. Amin.

Ti Pag-agwanta manga Napasakup sa kan Kiristu

¹² Mahal niku pag manga patar-ari, danga niyu kadulawan ti manga mabuyat pagsubuk kanyu magkalakawan. Kanyu aw lugud isip kamu lang ti pagsubukan?

¹³ Lalu kailangan gid kamu pagbaya sa kanyu magpakidamay sa kakurian ni Kiristu, hampay nu ipaburayhaw yi aban kay kadayawan ni Kiristu, kamu lubus yi sa kabayaan.

¹⁴ Papaladan kamu Diyus nu kamu pagmuransahun dahil kamu napasakup yi sa kan Kiristu, tutuu papaladan kamu dahil nangulian sa kanyu ti makamaskihan pag Ispiritu kadayawan, imaw ti Ispiritu Diyus.

¹⁵ Danga maglibun sa tawu, danga magtakaw, danga may magbuwat kadautan, danga umapu nu bukun kanyu, hampay kamu balaw maparusahan dahil sa kanyu kasalanan.

¹⁶ Dapat una si unu sa kanyu danga mangay-a nu siya parusahan dahil sa kay magpasakup sa kan Kiristu. Lalu ngap pagpasalamat siya sa Diyus, dahil siya magpakiusa sa kan Kiristu.

¹⁷ Taynguna yi ti kaudasan hampay pihuun ti manga tawu nu daut nu mayad ag inda umumpisa ginan sa manga pinili Diyus. Ginan ngani sa kanta inda pag umumpisa. Kabitay wadi ti mangyari sa katapusan aban sa manga unman magpaniwala sa Mayad pag Barita Diyus?

¹⁸ Parihu sa pagsabihun sa Banal Kasuratan magkun, “Nu ti matadlung diit wadi udyi maribri, hintay nguna ti patabgan manga makasalanan manga unman magkilala sa Diyus?”

¹⁹ Nakan ngani ti manga mag-agwanta sa kakurian angay sa kagustuhan Diyus, pagbuwat sida mayad, bag-u intirgahan nida kanda buhi sa Manuglalang, dahil siya ti masarigan.