1 Pidru 3 - Hanunuu

Sa manga Mag-asawa

¹ Kamu duy pag manga babayi, pagpasakup kamu sa kanyu sadili asawa, hampay una si unu sa kanda nu udwaya magpaniwala sa Bagaw Diyus, miabay diman sumarig, dahil sa kanyu mayad pag ugali una balaw yi may patapil paliwanag sa kanda.

² Pakitan niyu sa kanda kanyu ugali magalang ag mabuut.

³ Kanyu rinu danga tugka lang sa mag-akitan mata parihu sa mayamu pamauli sa buhuk, una manga bisti gintu, manga mahalaga pag rutay.

⁴ Lalu ngap isipun niyu mahalaga ti rinu mataguan sa basad niyu tagipusuun. Tunda pag rinu unman magpud-as, ginan sa mahuway ag maalumanay pag naisipan, ungud lubus mahalaga sa kay magbantay Diyus.

⁵ Kaybi waya pag panahun katida pag rinu ti pinahalgaan manga babayi lubus sakup sa Diyus. Sida nagsarig gid sa Diyus ag nagpasakup diman sa kanda manga asawa.

⁶ Tida imaw yi gid kan Sara itinayak pag mustara. Nagsunud kabay siya sa kay asawa sa kan Abraham, kay iningarnan niya kay takinan. Kamu diman ga kan Sara manga linahi nu mahal lang kanyu manga buwat ag nu unman kamu may pagkadalaan una di.

⁷ Kamu waydi manga lalaki, pagpasunaid kamu sa kanyu sadili asawa dahil udyi ga lalaki kanda kaya. Parihu diman sa kanyu may karampatan sida sa buhi unman may katapusan kay ipinakaun Diyus sa kanyu. Nu katida kanyu ugali udyi may sumigaud sa kanyu darangin.

⁸ Inda waya kang sabi sa kanyu tanan, pag may pagkarausa kamu, pagparasunaidan kamu, pagmalahalan kamu sa usa kag sa usa kamu manga magtar-arian. Pagmatugway kamu pagmapinakumbabaun kanyu naisipan.

⁹ Danga gantihi daut ti tawu nu magbuwat daut sa kanyu. Danga niyu murahun ti magmura sa kanyu. Bagkus ngap idarangin niyu sida hampay papaladan sida Diyus. Dahil pinili kamu Diyus hampay makatanggap papalad ginan sa kanya.

¹⁰ Angay sa nisurat sa Banal Kasuratan magkun, “Ti may gustu magkaibug sa buhi ag sa makakit siya mayad pag kahamtangan, pagpigil siya sa kay baragawun daut, kay bibig danga magbagaw daya.

¹¹ Pagpatlikud siya sa daut, pagbuwat siya mayad. Danga siya magkagasa sa kay maghanap sa kahusayan.

¹² Dahil pagbantayan Panginuun ti manga matadlung, kay pagbayaun. Magdungug siya sa kanda manga darangin. Dapat kay magbantay Panginuun may galit sa manga magbuwat daut.”

¹³ Udyi may bumuwat daut laban sa kanyu nu kanyu turunuhun lunsay kaayadan.

¹⁴ Dapat nu abi kamu mag-agwanta kakurian dahil ngani sa kanyu magbuwat mayad, papaladan di ngap kamu Diyus. “Danga lugud kamu magkadala sa kanda gayak. Danga waydi magkakulbaan kanyu naisipan.”

¹⁵ Galangun niyu sa kanyu tagipusuun si Kiristu, imaw ti Panginuun. Pagmay alistu kamu pirmi kanyu isagut nu may humagad paliwanag tungkul sa kanyu pagsarig.

¹⁶ Dapat pagmaalumanay kamu paggalang nu kamu magpaliwanag. Pag-ugali kamu sa malumpiyu kanyu tagipusuun hanggan naisipan hampay mangay-a ti manga magmuransa sa kanyu hanggan ti manga mag-away sa kanyu mayad ugali, dahil ngani kamu kay suruguun ni Kiristu.

¹⁷ Lalu waya mayad nu kamu may pag-agwantahun kakurian dahil sa kanyu magbuwat mayad, nu abi tida kay kagustuhan Diyus. Minus lang gid nu kamu mag-agwanta kakurian dahil sa kanyu magbuwat daut.

¹⁸ Dahil ngani si Kiristu namatay sa manga tawu makasalanan. Si Kiristu ti unman may kasalanan namatay kas-a lang gid para sa manga tawu makasalanan, hampay kamu kay madara sa Diyus. Sa ungud, minatay siya sa kay bilug sitay sa babaw daga, dapat binuhi uman siya sa Ispiritu.

¹⁹ Pagka katida nag-ati siya nagpahayag sa manga karadwa napirisu.

²⁰ Tunda ngani pag manga karadwa imaw ti manga unman naniwala kaybi madi pagpakaalagdun Diyus ati katpung kan Nuwi magbuwat sakayan. Kay pakinabang inda ginan pag binwat sakayan, walu-walu di ka tawu ti nakaribri sa karaw-an danum.

²¹ Ti danum halimbawa sa tulbaw magribri taynguna sa kanta. Ti tulbaw balaw sa kuntay makalumpiyu uring sa bilug. Ti kahulugan tulbaw magtaratu kita sa Diyus balaw yi kita magbuwat manga bagay balaw mayad sa kanya. Pag-iribri kita tulbaw dahil sa kay pagkabuhi uman ni Hisu-Kiristu.

²² Nag-atag siya sa langit, baliwa sa sikun Diyus. Siyun yi ngap siya pag maghari sa manga anghil, imaw ti manga may kangaranan hanggan kamaskihan sa langit.