1 Pidru 2 - Hanunuu

Ti Batu may Buhi ag ti Nasyun Binukud para sa Diyus

¹ Nakan ngani tayaki yi niyu ti tanan pag kadautan, ti tanan buwat sa magdaya, una ti magpabalhinguun, una ti maghirak, una ti magmuransa, tayaki yi niyu tunda.

² Parihu sa manga lapsag bag-u nianak hanapun niyu ti pinagkagatas angay sa Ispiritu unman may lakut daut, hampay dumaka kanyu pagsarig hanggan sa udwaya matanggap niyu ti buu karibrihan.

³ Dahil angay sa kay sinabi sa Banal Kasuratan magkun, “Nasamitan yi niyu kay pangaawa Panginuun.”

⁴ Pagpakarani kamu sa kan Kiristu. Siya yi ngani ti ga batu may buhi, dinayu manga tawu, dapat pinili ngap Diyus, kay yi pagpahalagahan.

⁵ Bilang ga manga batu may buhi waydi pagga manga kalap kamu Balay Diyus hampay ulian Ispiritu. Bag-u bilang ga manga manughandug ibinukud para sa Diyus, pagpakaun kamu sa Diyus manga pakaun angay sa Ispiritu, kay pagbayaun Diyus dahil sa kan Hisu-Kiristu.

⁶ Dahil magkun sa Banal Kasuratan, “Bantayi niyu, ipinakana niku sa banwa Siun ti usa ka batu pag kalap binuwat niku patakinan, imaw yi ti mahalaga. Balaw mibuyu una hintay pag tawu nu sumarig sa kanya.”

⁷ Nakan ngani mahalaga si Kiristu sa kanyu sa manga may sarig. Dapat sa manga unman may sarig matupad inda pag Kasuratan magkun, “Ti batu dinayu manga manugpatindug balay, imaw yi ngap ti ipinakana mahalaga pag kalap.”

⁸ Ag “Ibinugtang ti usa ka batu karadayaanun, laun pagka batu kanda matalakpahan.” Ga nadayaan yi ngani sida, dahil unman sida naniwala sa Bagaw Diyus. Tunda yi ngani ti inalistu para sa kanda.

⁹ Dapat kamu ungud usa ka pinili pag lahi. Parihu sa manga manughandug sa Balay Diyus, kanyu pagsirbihan si Kiristu pag Hari. Kamu usa ka nasyun binukud para sa Diyus. Pinili kamu Diyus hampay kamu kay sadili yi pag nasakupan ag hampay ipaburayhaw niyu kay manga buwat makadululaw. Siya diman waydi ti nagtawag sa kanyu ginan sa kadudulman tabug sa kaladulawan pag karayawan niya.

¹⁰ Nu kaybi di waya gid kamu bukun kay nasyun Diyus, taynguna bay kamu kay yi pinili hampay kay nasakupan. Kaybi kamu kay inirangan balaw pagkaawaan. Dapat taynguna kamu kay kinaawaan.

Manga Panawuhun Diyus

¹¹ Manga mahal niku pag patar-ari, kang pag-ipaanyu sa kanyu ga sa manga panday-uhan lang sitay sa kalibutan, pagtayaki yi gid niyu ti daut pag nagustuhan niyu naisipan, imaw tiglaban sa kanyu karadwa.

¹² Kailangan pag may kaayusan kanyu ugali sa karaw-an manga unman magsarig sa Panginuun. Una abi kamu kanda pagbangdanan sa buwat daut, makitan di nida kanyu mayad pag buwat hampay dumayaw di aban sida sa Diyus nu kaudasan yi karas-ugan ni Kiristu.

¹³ Dahil ngani kamu sa Panginuun, kailangan pagpasakup kamu sa tanan may kangaranan sa nasyun lalu sa Pangulu Hari, dahil siya ti pinakamataas sa tanan pag kapangyarihan.

¹⁴ Pagpasakup diman kamu una sa manga gubirnadur, imaw ti manga suruguun Pangulu Hari hampay magparusa sida sa manga magbuwat daut ag hampay magdayaw sa manga magbuwat mayad.

¹⁵ Dahil katida gid kay kagustuhan Diyus, kamu pagbuwat mayad hampay imaw kanyu panalu sa pagbagawun manga tawu unman nakaintindi.

¹⁶ Kamu manga irinibri yi, dapat una kamu may karibrihan danga waydi niyu buwatun purun-an buwat daut, kailangan ngap pagga manga panawuhun Diyus kanyu ugali.

¹⁷ Galangun niyu ti tanan manga tawu, ag mahalun niyu ti manga patar-ari sa kan Kiristu. Pag-ugali kamu maggalang sa Diyus. Galangun diman niyu ti Pangulu Hari.

Huwada kay Nag-agwanta ni Kiristu

¹⁸ Kamu pag manga panawuhun, pagpasakup paggalang kamu sa kanyu amu, pagmatinupadun kamu, balaw lang nu mayad ag mahusay pag amu, una diman sa unman mayad pag amu.

¹⁹ Ti Diyus magbaya di nu may pagtiis una si unu sa kay malakawan kakurian dahil sa kay naisipan tagipusuun angay sa Diyus, nu mag-agwanta siya una unman may kasalanan.

²⁰ Unman gid may dumayaw sa kanyu nu mag-agwanta kamu parusa dahil sa kanyu binmuwat daut. Dapat nu kamu parusahan madi kanyu buwat mayad bag-u nu tiisun lang niyu kanda parusa sa kanyu, pihu kamu pagbayaun Diyus.

²¹ Imaw yi ngani kay turunu Diyus sa kanyu pagka kamu pinili niya. Si Kiristu diman nagtiis para sa kanyu, pinakakitan niya kamu mustara hampay kanyu huwadun.

²² “Unman nagbuwat si Hisus una hintay pag kasalanan, unman diman may nadnugan sa kanya una hintay pag bagaw balaw katutuuhanan.”

²³ Una siya minuransa, unman siya nagganti. Una siya pinakurianan, unman siya tinmima. Nagsarig yi lang siya sa Diyus, sa madunung magpihu sa daut sa mayad.

²⁴ Sa pagkamatay niya sa kurus, “dinara niya sa kay bilug ti kabuyatan nita kasalanan” hampay rargu tayakan nita kanta ugali magkasala bag-u mag-ugali yi angay sa kay kagustuhan Diyus. “Kamu pinaayad yi dahil lang sa kay manga biyag ni Kiristu.”

²⁵ Kaybi kamu nanwayak-wayak yi parihu ga manga karanidu tinmalang, dapat taynguna tinipun maan kamu Manug-alaga, imaw ti manuggiya niyu manga karadwa.