1 Kurintu 9 - Hanunuu

Karampatan hanggan Katungkulan manga Apustul

¹ May makaampara aw lugud sa kangku? Bukun aw lugud aku apustul? Unman aw lugud nakitan niku si Hisus, kanta Panginuun? Unman aw kamu nakan nakatanggap sa Panginuun dahil kamu kang tinudluan?

² Una ti iba dayu mangilala kuntay aku apustul, barang kilala yi waydi niyu. Kamu ti sa Panginuun imaw yi ti puruyba sa kang pagka-apustul.

³ Inda kang sagut sa manga manug-usisa sa kang pagka-apustul.

⁴ Unman aw lugud kami may karampatan diman pag-alagaan iglisya angay sa kanmi pangailangan?

⁵ Unman aw lugud mahimu diman kami makataban kanmi sadili asawa napasakup waydi sa Panginuun, parihu sa manga iba apustul magtaban kanda asawa manga patar-ari sa Panginuun ag parihu diman sa kan Pidru?

⁶ Kami lang aw lugud ni Birnabi ti unman may karampatan umapas sa paghanap sa kanmi kabuhian?

⁷ Hintay pag sundalu tigsirbi sa katungkulan sadili niya gastus. Si unu lugud pag tawu ti magtanum ubas bag-u ud magpakinabang sa kay burak? Hintay pag manug-alaga sa karanidu ti unman magpakinabang sa kay gatas?

⁸ Kang pagsabihun balaw tungkul lang sa ugali tawu. Una sa Kasuguan katida diman.

⁹ Dahil nisurat sa Kasuguan ni Muysis magkun, “Danga pagpungta kay bibig baka sa kay maggiuk.” Baka lang aw lugud ti pag-alaalahun Diyus?

¹⁰ Balaw lang duy baka. Lalu ngap kita ti pagturunuhun niya. Nakan sinurat tunda dahil sa kanta. Dahil tig-aradu hanggan tig giuk magsarig hurayan sida.

¹¹ Ipinamgas nimi sa kanyu ti manga papalad ginan sa Ispiritu. Magkalugi aw lugud kamu mag-ayaw pangailangan nimi?

¹² Nu ti iba may karampatan pagpakan-an, lalu man ngap kami. Dapat unman nimi paghabulun kanmi karampatan inda. Tiniis nimi ti tanan bagay hampay balaw maampara nimi ti Mayad pag Barita tungkul sa kan Kiristu.

¹³ Unman aw niyu alam ti manga magsirbi ati sa Balay Diyus pagpakan-an karan-unun ginan sa Balay Diyus? Hanggan ti manga magsirbi sa handugan may kahuray waydi sa hayup ihinandug sa Diyus.

¹⁴ Katunda diman waydi ibinilin Panginuun, ti manga manugtudlu Mayad pag Barita kailangan diman may karabuhian ginan sa Mayad pag Barita.

¹⁵ Dapat aku unman ginmaraw sa kang karampatan una di. Unman diman aku nagsurat sa kanyu hampay pakan-an niyu aku. Mayad man nu aku mamatay lang, danga lang marangga kang pagkatawu.

¹⁶ Una magtudlu aku Mayad pag Barita balaw kailangan aku magpadayaw-dayaw sa inda pag katungkulan kang tinanggap ginan sa Panginuun. Kaawaawa duy aku nu unman niku mitudlu inda pag Mayad pag Barita.

¹⁷ Nu abi inda kang buwatun sa buluntadan, may pirimyu mana aku aban. Dapat magtudlu aku Mayad pag Barita, dahil pagtupadun lang niku ti katungkulan iinintirga Diyus sa kangku.

¹⁸ Hintay nguna kang pirimyu? Inda ngani kang pinagkasuhul nu mitudlu niku ti Mayad pag Barita unman may bayad ag nu unman aku magsukut kang kasuhulan una aku magpanudlu.

¹⁹ Unman may makaampara sa kangku una si unu waya, dapat kang gustu ngap aku suruguun tanan tawu hampay lalu ngap mayamu tawu kang magarya.

²⁰ Nu sa manga Hudiyu, nag-ugali waydi aku Hudiyu hampay magarya waydi sida. Madi unman aku nasakup Kasuguan, basta kang manga kaibahan magsunud sa Kasuguan, aku imaw diman hampay magarya niku sida.

²¹ Nu sa manga balaw Hudiyu balaw sakup sa Kasuguan ni Muysis, aku magpabagay sa manga balaw Hudiyu balaw sakup sa Kasuguan hampay sida magarya waydi niku. Balaw kuntay sa unman niku pagsundun ti sugu Diyus dahil aku sakup sa kasuguan ni Kiristu.

²² Nu sa manga marahantup barang magkasala, maghuwad waydi aku sa kanda. Sa tanan paraan makibagay aku sa tanan tawu hampay una lang kay iba mabawi di niku una sa kabitay pag paraan.

²³ Pagbuwatun niku inda tanan-tanan pag manga bagay alang-alang sa Mayad pag Barita, hampay makatanggap waydi aku manga papalad ginan sa Diyus.

²⁴ Alam diman niyu nu may mag-urunahan, magpalagiw sida tanan dapat usa lang ti makatanggap pirimyu. Nakan ngani kaayad nu magpalagiw hampay matanggap niyu ti pirimyu.

²⁵ Ti tanan manga magpaanad sa mag-urunahan, mapinigilun sa kanda tanan kagustuhan hampay makatanggap sida pirimyu madi balaw dugay magkadaut tunda pag pirimyu. Dapat kanta paghangadun pag pirimyu tunda unman may kadautan hanggan aban.

²⁶ Nakan ngani magpalagiw aku hampay pihu rumas-ug sa kang turunu. Unman diman waydi aku magsuntuk sa durus.

²⁷ Pagpakurian diman niku kang sadili bilug, pagsupilun niku kang sadili kagustuhan barang nu manudlu aku sa iba, aku ngap ti ipurya Diyus.