1 Kurintu 8 - Hanunuu

Tungkul sa Karan-unun Isinagda sa Diyus-diyusan

¹ Ipaliwanag maan niku tungkul sa manga karan-unun ihinandug sa diyus-diyusan. Alam nita kita tanan may kadunungan. Ti katunda pag kaalaman magpadara sa tawu hampay magpalabi-labi, dapat ti tawu nu may pagmahal, makaparig-un siya sa iglisya.

² Tighantup sa kay sadili siya madunung, udwaya nataw-an niya ti dapat niya maalaman.

³ Dapat ti manga tawu magmahal sa Diyus, pagkilalan-un sida Diyus kanya.

⁴ Tungkul ngani sa manga karan-unun ihinandug sa diyus-diyusan, alam nita ti manga diyus-diyusan unman may kahulugan, ag alam diman nita usa lang ka Diyus.

⁵ Madi may pagsabihun manga diyus sa langit ag sa babaw daga, ag mayamu ti pag-ingarnan manga diyus hanggan manga panginuun,

⁶ nu para sa kanta usa lang ti Diyus, ti Ama ti naglalang sa tanan bagay, nabuhi kita para sakup sa kanya. Usa lang ti Panginuun, si Hisu-Kiristu, ginan sa kanya pag nalalang ti tanan bagay. Ginan diman sa kanya kita pag nabuhi.

⁷ Dapat ti iba unman nida alam kuntay usa lang ti Diyus. Ti iba nararum yi sa pagsamba sa diyus-diyusan nakan ngani hanggan kainda nu magkaun sida tunda pag manga karan-unun pag-alaalahun waya nida kanda pagkan-un ihinandug waya sa diyus-diyusan. Dahil kurang kanda kaalaman, nakan aburidu kanda tagipusuun sa kanda hantup sida magkasala.

⁸ Balaw lang ginan sa karan-unun kita pagbayaun Diyus. Unman may mabawas ginan sa kanta una may tun-anun kita karan-unun. Unman diman may midugang kaayadan sa kanta una unman kita may turun-anun karan-unun.

⁹ Dapat pagdahan gid kamu, barang sa kanyu unman yi mag-alaala sa turun-anun, kamu pumatalang ngap sa manga marahantup kuntay kasalanan nu magkaun.

¹⁰ Nu kamu ti kang-ud kanyu kadunungan ag magkaun sulud balay diyus-diyusan, bag-u makitan kamu manga malumuy waya sa kanda pagsarig, unman aw nguna lugud sida mibuyu mangaun tunda dahil kanda pag-alaalahun tunda isinagda yi sa diyus-diyusan.

¹¹ Nakan ti usa ka patar-ari niyu malumuy waya sa kay sarig midamhak maaw dahil sa kanyu kaalaman madi kang-ud kay kamatayan ni Kiristu sa kanya.

¹² Nu katunda kamu may kasalanan sa kan Kiristu, dahil dinara niyu kanyu patar-ari tag sa kasalanan, pinatalang kay naisipan atag sa kasalanan.

¹³ Nakan ngani nu ginan sa kang magkaun, magkasala kang patar-ari, nu katunda dayi lang aku mangaun taguban hampay siya balaw magkasala.