1 Kurintu 7 - Hanunuu

Kakurian tungkul sa Mag-asawa

¹ Tungkul bay kanyu isinurat sa kangku, “Mayad ti lalaki nu unman mag-asawa sa babayi.”

² Dapat hampay balaw madara sa tuksu sa magpanguragin, ti kada lalaki pag may sadili asawa, kumun diman waydi ti kada babayi.

³ Tupada lalaki una hintay ti angay sa babayi, kumun diman waydi ti babayi sa kay asawa lalaki.

⁴ Ti babayi unman makapamahala sa kay sadili bilug nu unman kay asawa lalaki tigpamahala. Katunda diman waydi ti lalaki unman makapamahala sa kay sadili bilug nu unman kay asawa babayi tigpamahala.

⁵ Danga mag-irirangan ti mag-asawa, purya lang sa kanyu taratuhan nu pira ka sirang agud makapadugay kamu sa darangin, bag-u magmirinsanan maan kamu, barang kamu matuksu ni Satanas nu udyi kamu makabata.

⁶ Inda bilang ga patigayun niku sa kanyu, bukun sugu niku.

⁷ Nakan ngani kang mana gustu, ti tanan tawu parihu sa kangku, dapat sa kada usa ka tawu may kanya-kanya pag pakaun ginan sa Diyus. Ti manga ipinakaun Diyus balaw pararihu.

⁸ Dapat pagsabihun niku sa manga unman may asawa ag sa manga buranday, ti mayad sa kanda nu katida yi lang sida pagga kangku unman may asawa.

⁹ Dapat nu unman makabata sida, mahimu diman makaasawa. Makuri nakan ti magkagamun sa magpangasawa, mayad waya ti may asawa.

¹⁰ Dapat sa may asawa aku may bilin, bukun aku nu unman ti Panginuun. Ti babayi danga magtayak sa kay asawa lalaki.

¹¹ Dapat nu manayak siya, hanggan di danga yi mag-asawa, aw ngatay bumalik maan sa kay asawa. Danga tayakan niya asawa lalaki kay asawa babayi.

¹² Dapat sa manga iba aku may bilin, nu sa ungud bukun Panginuun ti may bilin, magkun, una si unu pag patar-ari lalaki ti may asawa unman napasakup sa Panginuun ag nu gustu diman magpaminsan ti babayi sa kay asawa lalaki, danga waydi tayakan kay asawa babayi.

¹³ Ag ti babayi nu may asawa unman napasakup sa Panginuun ag nu gustu diman magpaminsan ti lalaki sa kay asawa babayi, danga waydi tayakan kay asawa lalaki.

¹⁴ Ti lalaki udwaya napasakup sa Panginuun sakup sa kay pagmahal Diyus dahil sa kay asawa babayi magsarig sa Panginuun. Ag ti babayi udwaya napasakup sa Panginuun sakup diman waydi sa kay pagmahal Diyus dahil sa kay asawa lalaki magsarig sa Panginuun. Nu abi balaw katida, kanyu manga anak arayu sa Panginuun. Dapat taynguna sida sakup diman waydi sa kay pagmahal Diyus dahil sa sarig nida manga gurang.

¹⁵ Katida madi, ti unman napasakup sa Panginuun nu manayak sa kay asawa napasakup sa Panginuun, unman may tumawid. Una patar-ari lalaki una patar-ari babayi nu pagtayakan asawa unman magsarig sa Panginuun, nalkas yi sa pangasawa. Pinili kamu Diyus hampay may kahusayan.

¹⁶ Balaw maalaman nimu, nu ngatay miribri ngapu nimu kanmu asawa lalaki. Balaw maalaman nimu, nu ngatay miribri nimu kanmu asawa babayi.

Pagparargu sa Buruwatun

¹⁷ Pagparargu sa buruwatun ti kada usa angay sa kay ipinakaun Panginuun sa kanya. Pagparargu di siya sa kay kahamtangan una siya binutung yi Diyus. Imaw ti ibinilin niku sa tanan iglisya.

¹⁸ Nu ti usa ka tawu daan tinuri bag-u siya binutung Diyus hampay magsarig sa kan Kiristu, danga yi pag-umana tunda pag tanda. Nu unman waya waydi tinuri, danga yi lang paturi.

¹⁹ Unman may hintay ngarana una turi una bukun turi. Ti mahalaga ti pagsunud sa manga bilin Diyus.

²⁰ Pagparargu di ti kada usa sa kay kahamtangan una siya binutung Panginuun.

²¹ Daan aw kawu panawuhun sa kanmu nagpasakup sa Panginuun? Danga kawu mag-isip makuri una kawu panawuhun. Nu bay kawu pasnuan yi lumuwas, lalu mayad.

²² Una panawuhun siya, nu napasakup siya sa Panginuun ribri yi gid siya hampay magsirbi sa Panginuun. Katunda diman, una ti tawu unman may amu, nu pumasakup siya sa kan Kiristu, panawuhun ngap ni Kiristu siya.

²³ Binili kamu Diyus sa daka pag halaga. Danga yi maghingbut kamu hampay panawuhun maan kaparihu tawu.

²⁴ Manga patar-ari, una hintay kanyu kahamtangan pagka kamu binutung Diyus, siti yi lang kamu kaibahan niya.

Tungkul sa manga Unman may Asawa hanggan sa Buranday

²⁵ Nu bay sa unman may asawa, unman aku may ibilin ginan sa Panginuun. Dapat aku masarigan dahil sa papalad Panginuun sa kangku, nakan itultul waya niku ti kang inisip.

²⁶ Kang isip dahil sa kanta paglakawan kakurian taynguna, mayad ti tawu nu magparargu sa kay sadili kahamtangan.

²⁷ Nu kawu may asawa, danga maggayak magbulag. Nu udyi kawu may asawa, danga waydi kawu maghingbut sa may asawa.

²⁸ Dapat nu kawu mag-asawa bukun waydi kasalanan. Ag nu ti usa ka daraga mag-asawa bukun diman waydi kasalanan. Dapat ti may asawa may kakurian sa kanda pangabuhi. Kang gustu mana danga niyu malakawan tunda pag kakurian.

²⁹ Dapat kang pagsabihun inda, manga patar-ari, udyi dumugay ti panahun para sa babaw daga, nakan ti manga lalaki nu may asawa danga tugka lang sa asawa kay sirbi.

³⁰ Ti manga maglumi pagga unman diman maglumi. Ti manga magbaya, pagga unman diman magbaya, ti manga magbili pagga unman diman may kasiyunan.

³¹ Ti manga magpayaman sitay sa babaw daga, pagga unman diman subra kanda kasukatan. Dahil ti manga kabagayan sitay sa babaw daga may katapusan.

³² Dapat kang gustu pagkab-ul yi gid sa kanyu ti aburidu. Ti lalaki nu unman may asawa magpangabudlay sa manga buruwatun Panginuun, nu kabitay makatupad sa kagustuhan niya.

³³ Dapat ti may asawa magpangabudlay maghanap kanda kabuhian, nu kabitay makatupad sa kagustuhan niya asawa.

³⁴ Pagtalinduwahun kay naisipan may sa buruwatun Panginuun, may sa kay asawa. Katida diman ti babayi unman may asawa ag ti daraga magpangabudlay sa buruwatun Panginuun, hampay ilubus niya kay kabisugan bilug hanggan naisipan sa Panginuun. Dapat ti babayi nu may asawa magpangabudlay maghanap kanda kabuhian nu kabitay makatupad sa kagustuhan niya asawa.

³⁵ Inda duy kang pagsabihun sa ikaayad niyu. Balaw aku mag-ampara sa kanyu kagustuhan naisipan, nu unman ipinaalaala lang niku sa kanyu ti mayad hampay kamu unman may kaabalahan sa kanyu pagsirbi sa Panginuun.

³⁶ Nu ti usa ka lalaki magpakaisip barang unman makatupad sa kay aguman babayi nu kang-ud yi kay idad ag nu kailangan sundun niya kay kagustuhan, balaw diman kasalanan nu sida mag-asawa.

³⁷ Dapat nu marig-un gid ti lalaki sa kay tagipusuun, unman kailangan sundun lang niya kay kagustuhan. Mahimu diman makapigil siya sa kay naisipan. Mayad kay buwat nu siguradu kay sadili naisipan ag nu magpalalbadan sida kanda taratuhan.

³⁸ Nu sa ungud mayad diman nu mag-asawa sa kay aguman dapat mas lalu mayad ti magpigil sa sadili kagustuhan ag magpalalbadan.

³⁹ Ti babayi nu may asawa kailangan magpausa sa kanya hanggan waya buhi kay asawa. Dapat nu namatay yi kay asawa, mahimu siya makaasawa sa una naan pag lalaki kay magustuhan, basta parihu napasakup sa Panginuun.

⁴⁰ Dapat kang isip lalu waya masulung siya nu udyi siya may gustu sa may asawa maan. Ag kang isip inda kay udyuk Ispiritu Diyus sa kangku.