1 Kurintu 6 - Hanunuu

Tungkul sa Kasaba Laban sa Usa ka Patar-ari

¹ Nu ti usa sa kanyu may kasaba laban sa usa ka patar-ari, magpanghas aw lugud siya magsumbung sa atubangan manga talaghusay balaw nakatanggap sa Panginuun? Hayga unman magpahusay siya sa manga patar-ari sa Panginuun?

² Unman aw niyu alam ti manga napasakup sa Panginuun ti pumihu aban sa manga taga kalibutan nu daut nu mayad? Nu ti manga taga kalibutan pihuun niyu aban, unman aw lugud kaya niyu pihuun ti daut ti mayad sa manga yangkut-yangkut pag hurusayun?

³ Unman aw niyu alam kanta pihuun aban ti daut ti mayad sa manga anghil? Unman aw lalu yi ngap ti manga bagay para sa buhi nita sitay sa babaw daga.

⁴ Nu kamu may kasaba ngani para sa buhi sitay sa babaw daga, piliun aw lugud niyu ti manga tawu unman maasahan sa iglisya hampay manughusay?

⁵ Nakan pagsabihun niku inda hampay pakay-ahun kamu. Hayga lugud katunda kamu. Pihu gid may madunung sa kanyu maghusay sa kay manga patar-ari.

⁶ Dapat bagkus ngap ti manga patar-ari magkarasabaan sa atubangan paman unman nakatanggap sa Panginuun.

⁷ Taynguna duy, nakan kamu magkarasabaan dahil tutuu gid kurang kanyu magmalahalan sa magtar-arian sa Panginuun. Hayga unman bagkus kanyu pag-agwantahun nu may magbuwat kalukuhan sa kanyu? Hayga lugud kamu unman magpatalu yi lang?

⁸ Dapat kamu diman waydi tigbuwat kadautan hanggan magdaya. Ag tunda paman kanyu pagbuwatun sa kanyu manga patar-ari.

⁹ Unman aw waya lugud niyu alam ti manga magbuwat kalukuhan dayu masakup sa kay paghari Diyus. Danga kamu magsarig, dahil ti manga magpanguragin, ti manga magsamba sa diyus-diyusan, ti magpamabayi hanggan ti magpanlalaki, tigkaraibgan sa kaparihu lalaki,

¹⁰ ti manga magtakaw, ti manga maramuun, ti manga manuglangu, ti manga magmuransa hanggan ti manga manuglupig dayu gid sida masakup sa kay paghari Diyus.

¹¹ Kaybi ti iba sa kanyu katida diman waydi dapat taynguna inugasan yi kanyu kasalanan, sakup yi kamu sa Diyus dahil sa Ispiritu nita Diyus. Nakilala yi kamu Diyus kuntay manga matadlung dahil sa kapangyarihan Panginuun Hisu-Kiristu hanggan dahil sa Ispiritu nita Diyus.

Kanyu Bilug ti Balay Diyus

¹² Mahimu may sumabi sa kanyu, “Nu sa ungud udyi may bawal sa kangku,” dapat may bagay unman sa ikaayad niku. “Udyi may bawal sa kangku,” dapat aku dayu pasakup sa una hintay pag bagay.

¹³ Mahimu sumabi ti iba, “Ti manga karan-unun para sa tiyan. Ti tiyan para sa manga karan-unun, dapat parihu duraun di Diyus una ti tiyan, una ti manga karan-unun.” Ti bilug tawu balaw para sa panguragin, nu unman bagkus ngap para sa Panginuun gid. Ag ti Panginuun para sa bilug.

¹⁴ Binuhi uman Diyus ti Panginuun, kay kamaskihan bumuhi diman uman sa kanta.

¹⁵ Udwaya aw niyu alam kanyu manga bilug gamit ni Kiristu? Bul-un aw lugud niku ti manga gamit bilug ni Kiristu bag-u aw kang buwatun manga garamitun manga uragin? Dayu gid ngapu mahimu tunda.

¹⁶ Unman aw lugud niyu alam nu magpaamut ti tawu sa uragin, bilang ga usa yi lang sida ka bilug. Dahil magkun ti Diyus, “Ti duwa kabilug usa lang ka nayi.”

¹⁷ Dapat ti magpakiusa sa Panginuun, nakapakiusa sa kanya dahil sa Ispiritu.

¹⁸ Pag-iwas kamu sa panguragin. Ti tanan kasalanan nu pagbuwatun tawu, iba ti mag-idamhak sa kakurian dapat tigpanguragin midamhak ngap kay sadili bilug.

¹⁹ Unman aw niyu alam kanyu bilug ulian Ispiritu Banal kanyu tinanggap ginan sa Diyus? Balaw yi kamu makapamahala sa kanyu sadili bilug, nu unman Diyus yi ti bahala,

²⁰ dahil kamu binili yi sa halaga. Nakan gamitun niyu kanyu bilug sa ikadayaw sa Diyus.