1 Kurintu 5 - Hanunuu

Pariga sa Pagbuwat Kahalayan

¹ May nakadangat barita sa kangku kuntay masyadu daut pag nangyari. Usa sa kanyu magpanguragin tabug sa kay ina ulung. Una sa manga unman nakatanggap unman may magpanguragin katida.

² Bag-u kamu manga palabi-labihun di, ag unman kamu magruku nu nagkasala ti usa ka patar-ari, hampay mipalwas mana ginan sa kanyu ti nagbuwat katunda pag kasalanan.

³ Dahil nu sa ungud una unman sa kanyu atubangan kang bilug, bilang ga sa kanyu atubangan diman aku, dahil ginan sa karampatan nita Panginuun Hisus nakan pinihu yi ngani niku tunda pag tawu kay kasalanan talaga daut, ga bilang aku asan diman sa kanyu.

⁴ Nu magtiripun kamu bilang ga minsan diman aku sa kanyu, tapil ti kapangyarihan nita Panginuun Hisus.

⁵ Pagka kamu tiripun yi, ipabahala yi niyu sa kan Satanas tunda pag tawu, hampay dautun kay bilug, dapat iribri di kay karadwa sa kaudasan pagras-ug Panginuun Hisus.

⁶ Unman mayad kanyu magpadayaw-dayaw. Unman aw niyu alam una diit lang pag pamadaka, magpahabuk sa pinkul arina.

⁷ Bul-a yi niyu ti daan pag pamadaka, imaw ti pagkumnun kasalanan, hampay kamu manga malumpiyu yi. Dahil alistu yi kanta Kapistahan sa Pag-alaala sa Karibrihan, minatay yi si Kiristu, ti Anak Karanidu.

⁸ Nakan ngani tun-anun nita ti kapistahan. Dayi kita sa tinapay may daan pamadaka, imaw ti kasalanan hanggan daut pag naisipan. Pagkaun kita sa tinapay unman may pamadaka. Kay ibug sabihun pagmalumpiyu kanta naisipan, pag may katutuuhanan.

⁹ Sinuratan yi niku kamu danga kamu magpausa sa manga mag-uragin.

¹⁰ Balaw kang ibug sabihun danga magpausa sa manga unman napasakup sa Panginuun langmadi sida mag-uragin, manga maramuun, manga mananakaw, manga magsamba sa diyus-diyusan. Dahil nu abi kamu unman makapausa sa kanda nu katunda kailangan pag-ighit yi lang kamu sa kalibutan.

¹¹ Dapat inda kang surat sa kanyu, danga kamu magpakiusa una sa kantapu pag-ingarnan patar-ari, nu siya magpanguragin, maramuun, magsamba sa diyus-diyusan, aw ngatay magmuransa, maglangu, magtakaw. Nu katunda kay ugali, danga yi lang magsaru sa kanya.

¹² Sapagka hintay kang pakialam magpihu sa manga taga luwas iglisya nu daut nu mayad.

¹³ Diyus lang ti makapihu sa kanda. Dapat unman aw kamu tigpihu sa manga sa sulud nu daut nu mayad? Dahil pagsabihun sa Banal Kasuratan, “Kailangan ipalwas yi ngani niyu ginan sa kanyu ti daut pag tawu.”