1 Kurintu 3 - Hanunuu

Manga Suruguun Diyus

¹ Aku manga patar-ari, nagbagaw sa kanyu unman ga sa manga tawu inulian Ispiritu Banal. Naghampang aku sa kanyu ga sa manga tawu mablagan sa Diyus, ga sa manga lapsag di waya sa kanyu pagsarig sa kan Kiristu.

² Tinugun niku kamu gatas, balaw kamu pinakan-an niku maganit karan-unun dahil kamu udwaya karaug. Una kainda tugka kamu udwaya may kaya.

³ Dahil una kainda kamu magpatingi waya sa kanyu sadili kagustuhan pagkatawu. Nu kamu maghirirakan hanggan magtalaluhan unman aw lugud kamu mag-ugali angay sa kanyu sadili kagustuhan pagkatawu? Unman aw lugud kanyu pagsundan ti manga kaugalian manga tawu magpatingi lang sa kanda sadili kagustuhan?

⁴ Dahil magkun ti usa, “Aku sa kan Pablu,” magsabi maan ti usa, “Aku sa kan Apulus.” Nu katida unman aw kamu nag-ugali angay lang sa kanyu sadili kagustuhan?

⁵ Hintay nguna si Apulus, hintay nguna si Pablu? Kami parihu diman suruguun lang Diyus. Dahil sa kanmi tudlu kamu nagsarig sa kan Kiristu. Parihu kami magtupad sa buruwatun kay inintirga Panginuun sa kanmi.

⁶ Aku ti nagtanum, si Apulus ti nagbunyag, Diyus ti nagpalangba.

⁷ Balaw mahalaga ti magtanum hanggan ti magbunyag. Diyus lang ti mahalaga imaw ti magpalangba.

⁸ Ti magtanum hanggan ti magbunyag urusa sa kanda budlay. Dapat ti kada usa makatanggap kay pirimyu angay sa kay kabudlayan.

⁹ Dahil kami hanggan ti Diyus minsan sa buruwatun. Ag kamu ti ga tanman Diyus. Kamu ti pagbalayun Diyus.

¹⁰ Aku ti nagpatindug batu paratungtungan tulduk ga usa ka madunung magpatindug balay angay sa ipinakaun Diyus sa kangku. Iba maan tig batak bat-angan. Dapat pagdahan ti kada tawu nu kabitay kay bumuwat.

¹¹ Dahil unman may makapatindug sa iba batu paratungtungan tulduk, nu unman si Kiristu Hisus lang ti batu ibinugtang Diyus.

¹² Dapat nu may magpatindug sitay pag burungsudan kay garamitun gintu, pilak, manga mahalaga pag batu, kayu, yuma kugun, una dayami,

¹³ ti buwat kada tawu makitan di aban. Dahil nu kaudasan yi pagras-ug ni Kiristu bag-u maalaman yi tunda. Sapagka sa apuy pihu pag makilala. Ti apuy ti sumubuk kada tawu buwat nu kabitay.

¹⁴ Una sitapu pag tawu nu balaw maunu sa apuy kay binuwat kay ibinungsud sa burungsudan ati, siya makatanggap pirimyu.

¹⁵ Una sitapu pag tawu nu mairub kay binuwat, lugi gid siya. Dapat siya kay apu makaribri di. Dapat sulu lang bilug ti nakaribri sa apuy.

¹⁶ Unman aw niyu alam kamu kay Balay Diyus? Ti Ispiritu Diyus ti nangulian sa kanyu.

¹⁷ Nu dautun tawu ti Balay Diyus, dautun waydi siya Diyus dahil ti Balay Diyus ibinukud para sa kanya. Kamu yi ngani ti Balay Diyus.

¹⁸ Una hintay pag tawu danga magdaya sa kay sadili. Una sitapu sa kanyu tig-isip siya may kadunungan sitay sa kalibutan, pagkilala siya bukun ngap tutuu pag kadunungan tunda, hampay siya ngap dumunung.

¹⁹ Dahil ti kadunungan kalibutan bukun ngap kadunungan nu sa Diyus. Dahil nisurat sa Banal Kasuratan magkun, “Pagpasalanun Diyus ti manga madunung sa kanda sadili pagdaya.”

²⁰ Sinabi waya maan sa Banal Kasuratan magkun, “Alam di Panginuun ti pag-isipun manga madunung ag alam niya pasay unman may kabuluhan.”

²¹ Nakan danga magpadayaw-dayaw una hintay nu sa kadunungan lang tawu. Dahil ti tanan manga bagay kanyu yi.

²² Una si Pablu, una si Apulus, una si Pidru, una ti kalibutan, una ti buhi, una ti kamatayan, una ti kahamtangan kainda, una ti kahamtangan aban. Ti tanan kanyu yi.

²³ Dapat kamu sakup ni Kiristu ag si Kiristu sa Diyus.