1 Kurintu 16 - Hanunuu

Awat sa manga Patar-ari sa Taga Hudiya

¹ Nu tungkul bay sa kanyu ambagan iawat sa manga napasakup sa Panginuun, kailangan diman buwatun niyu parihu sa kang bilin sa manga iglisya sa taga Galasya.

² Kada sirang Duminggu ti kada usa sa kanyu pagpablag kuwarta angay sa kanyu nakitan hampay alistu yi daan kanyu manga ambag sa kang pagras-ug asan sa kanyu.

³ Sa pagras-ug niku asan, una si unu pag manga tawu kanyu piliun, kang suguun hampay darahun kanyu pakaun kuwarta may tapil surat tag sa Hirusalim.

⁴ Nu kailangan aku hanggan atag, kumuyug yi lang sida sa kangku.

Kay manga Gayak ni Pablu

⁵ Dapat aku asan tag yi sa kanyu, lakaw waya sa Masidunya. Dahil kang gayak lakaw dap sa Masidunya.

⁶ Dapat siguru aku madugay aban sa kanyu hanggan sa ud makalawuy ti amihanun, hampay aku awatan niyu sa kang paglakaw una naan tabug.

⁷ Dahil aku unman may gustu mansabang sa kanyu taynguna ngalay-ngalay lang sa kang lakaw. Dahil kang gayak mana madugay aku sa kanyu nu imaw kay kagustuhan Panginuun.

⁸ Sitay waya dapu aku sa Ipisu tugka waya sa sirang Pintikustis.

⁹ Dahil may rugar gid aku magtudlu bagaw Panginuun sitay taynguna, hampay tumanggap ti manga tawu, dapat mayamu diman waydi tiglaban.

¹⁰ Nu rumas-ug si Timutiyu asan sa kanyu kailangan kanyu tanggapun siya sa unman maruku siya kay naisipan. Dahil pagtupadun niya ti buruwatun Panginuun parihu diman ga kangku.

¹¹ Una hintay pag tawu danga magpalabi-labi laban sa kanya. Lalu awatan ngapu niyu siya para masulung kay maglakaw hampay makasitay siya sa kangku. Dahil una aku una hanggan ti manga patar-ari maggagad yi gid sa kanya.

¹² Dapat inda aku may isabi waya sa kanyu tungkul sa kanta patar-ari sa kan Apulus. Balaw di kas-a sinabihan niku siya pag-asan siya mana sa kanyu, kaibahan manga patar-ari. Udwaya may gustu siya kainda asan tag sa kanyu. Dapat umasan siya nu may rugar aban.

Ti Pangatapusan Surat

¹³ Pagdahan kamu, pagpakarig-un kamu sa kanyu pagsarig, pagmatutum kanyu naisipan, kamu pagmabisug.

¹⁴ Buwatun niyu ti tanan tarabahu niyu may pagmahal sa Diyus hanggan sa manga tawu.

¹⁵ Manga patar-ari, alam niyu ti magtal-anakan ni Istipanas imaw ti un-an nakatanggap sa Panginuun sa Akaya pag daga, ag lubus magsirbi sida sa manga iglisya. Magbilin mana aku sa kanyu,

¹⁶ paghuwad kamu sa katunda pag manga tawu, hanggan sa kada usa magtarabahu ag magsirbi kaibahan nida.

¹⁷ Magbaya aku sa pagras-ug nida ni Istipanas, ni Purtunatu, ag ni Akaiku, dahil kamu mana kang paghanapun ag inda yi ngap sida.

¹⁸ Pinasulung nida kang naisipan, pinasulung waydi nida kanyu naisipan. Pahalagai ngani niyu ti katunda pag manga tawu.

¹⁹ Ti manga taga sitay pag manga patar-ari sa iglisya sa Asya magkamusta sa kanyu. Lalu sida ni Akila ni Pirisila magkamusta waydi hanggan ti manga patar-ari magtiripun sa kanda balay, nu kabitay kanyu kahamtangan asan. Magkumusta sida sa kanyu dahil sa kanta pakiusa sa Panginuun.

²⁰ Magkamusta ti tanan manga patar-ari sitay magpaingana nu kabitay kamu. Kamu ti magtar-ari sa kan Kiristu, pagkaramustahan waydi kamu ti kada usa sa kanyu asan.

²¹ Aku si Pablu ti nagpirma inda pag surat. Mahal aw waydi kamu asan?

²² Ti unman magmahal sa Panginuun saadan siya. Pagras-ug yi gid kawu, duy Panginuun.

²³ Pagsa kanyu ti papalad nita Panginuun Hisus.

²⁴ Kamu tanan kang pagmahalun dahil sa kanta pakiusa sa kan Kiristu Hisus.