1 Kurintu 15 - Hanunuu

Kay Pagkabuhi Uman ni Kiristu

¹ Pag-ipaalaala niku sa kanyu, manga patar-ari, ti Mayad pag Barita kang itinudlu sa kanyu, tinanggap diman niyu, ag taynguna tugka imaw di kanyu pagsarigan.

² Sa inda ginan pag Mayad pag Barita ribri kamu, nu asintadu kamu sa kang itinudlu sa kanyu, ag nu ituduk niyu sa kanyu tagipusuun kanyu pagsarig.

³ Ti itinudlu sa kangku imaw diman waydi kang itinudlu sa kanyu — ti pinakamahalaga: si Kiristu namatay dahil sa kanta manga kasalanan angay sa isinurat sa Banal Kasuratan;

⁴ ilinbung siya bag-u binuhi siya uman sa ikatlu pag sirang angay sa isinurat sa Banal Kasuratan;

⁵ napakakit siya sa kan Pidru bag-u hanggan sa iba waya sa sampulu may duwa ka tuludluan niya.

⁶ Pagka nagtiripun ti subra lima ka gatus ka patar-ari, napakakit diman si Hisus sa kanda. Mayamu sa kanda buhi di hanggan taynguna tugka, ti iba bay namatay yi.

⁷ Napakakit diman si Kiristu sa kan Santiyagu bag-u sa tanan manga apustul.

⁸ Bag-u pagka sa katapusan napakakit diman siya sa kangku, ga usa aku ka anak ipinanganak sa bukun insaktu pag udas.

⁹ Aku ngani ti pinakaababa sa manga apustul, unman aku may karampatan ingarnan apustul, dahil inunu-unu niku ti iglisya Diyus.

¹⁰ Dapat dahil sa pangaawa Diyus, aku ngap apustul. Ag balaw inuyang ti ipinakaun niya sa kangku. Aku nagbudlay subra man sa kanda tanan, balaw sa kangku pag kakayahan nu unman sa awa ag awat Diyus.

¹¹ Una aku una sida parihu lang kanmi pag-itudlu ag imaw diman kanyu pagsarigan.

Ti Pagkabuhi Uman manga Namatay

¹² Nu pag-itultul nimi magkun, “Si Kiristu binuhi uman sa kay pagkamatay,” bati hayga ti iba sa kanyu magsabi ti manga namatay unman yi buhiun uman?

¹³ Nu abi ti manga namatay unman buhiun uman, una si Kiristu balaw waydi binuhi uman.

¹⁴ Nu abi si Kiristu unman binuhi uman, kanmi tudlu unman may pulus, unman diman waydi may pulus kanyu pagsarig.

¹⁵ Nu abi ungud ngani ti manga namatay balaw yi buhiun uman, masabi paman kami manga magtultul kapudilan tungkul sa Diyus, dahil kanmi pag-itultul magkun, Diyus ti nagbuhi uman sa kan Kiristu.

¹⁶ Nu abi unman buhiun uman ti manga namatay, unman diman binuhi uman si Kiristu.

¹⁷ Nu abi unman binuhi uman si Kiristu ud may pulus kanyu pagsarig, kamu sa kanyu waya manga kasalanan.

¹⁸ Ibug sabihun ti manga namatay sa kan Kiristu udyi sida.

¹⁹ Nu para lang sa kanta buhi sitay sa babaw daga kanta pagsarig sa kan Kiristu, sa tanan tawu kita ti kaawaawa.

²⁰ Dapat kay tutuu, si Kiristu binuhi uman sa kay pagkamatay, imaw tunda ti puruyba kuntay buhiun uman ti manga namatay.

²¹ Dahil nu kabitay ginan sa usa ka tawu nangyari ti kamatayan, katunda diman ginan diman waydi sa usa ka tawu nangyari ti pagkabuhi uman.

²² Ti tanan tawu may kamatayan dahil kabilang ni Adam. Katunda diman ti tanan tawu may pagkabuhi uman, dahil sa kanda pakiusa sa kan Kiristu.

²³ Dapat ti kada usa angay sa kaayusan. Si Kiristu tig-una sa tanan bag-u ti manga sa kan Kiristu sa kay pagsitay niya aban.

²⁴ Bag-u rumas-ug ti katapusan. Duraun niya ti tanan kaharian, ti pamahalaan, ti kapangyarihan, ag ipakaun niya ti kaharian sa Diyus Ama.

²⁵ Dahil kailangan si Kiristu tigpamahala hanggan sa udwaya mipauli Diyus sa sirung raprapa ni Kiristu ti tanan niya kalaban.

²⁶ Taluhun diman niya aban ti nasawad pag kalaban imaw ngani ti kamatayan.

²⁷ Dahil magkun ti Kasuratan, ipinasakup Diyus ti tanan manga bagay sa sirung raprapa ni Kiristu. Dapat balaw kay ibug sabihun hanggan ti Diyus ti nagpasakup sa tanan sa kan Kiristu kaibahan diman.

²⁸ Nu ti tanan manga bagay mipauli yi sa sirung kamaskihan ni Kiristu, si Kiristu pasakup diman sa Diyus, ti nagpasakup tanan sa kanya, agud ti Diyus ti mamaski sa tanan.

²⁹ May manga tawu magpatulbaw para sa manga namatay yi. Ta, hintay kay pulus kanda pagbuwatun nu balaw waydi buhiun ti manga namatay?

³⁰ Hayga bati kami maglakaw diman sa madala kada udas?

³¹ Sirang-sirang arani yi lang aku sa kamatayan. Inda kang pag-ipakilala sa kanyu dahil kamu duy, manga patar-ari, kang pagbayaun dahil sa kan Kiristu Hisus, sa kanta Panginuun.

³² Nu angay lang sa kang pagkatawu aku naglaban sa manga simarun sitay sa Ipisu, hintay kang pakinabangun. Nu abi ti manga namatay unman buhiun uman, “Pagkaun ag pag-inum yi lang kita, aldaw mamatay yi waydi.”

³³ Danga kamu madaya: “Ti daut pag kaibahan magdaut sa mayad pag ugali.”

³⁴ Pagbalik kamu sa mayad pag naisipan ag danga magkasala. Dahil ti iba unman magkilala sa Diyus. Kang pagkumnun inda sa kanyu sa ikakay-a niyu.

Ti Kalasi Bilug sa Pagkabuhi Uman

³⁵ Barang may paingana ti manga iba magkun, “Kabitay pag buhiun uman ti manga namatay? Kabitay kanda kalasi bilug aban?”

³⁶ Kawu duy unman may buut. Kanmu ipinamgas unman mabuhi nu unman magbag-u kay histuda, ibug sabihun ga mamatay dapu.

³⁷ Una hintay kanmu ipinamgas pag butir, nu tumubu tuhay yi kay histuda bukun yi butir.

³⁸ Diyus tigpakaun histuda sa butir angay sa kay kagustuhan. Ti kada butir may kanya-kanya histuda.

³⁹ Balaw tanan nayi parihu, ti nayi tawu tuhay waydi sa hayup, tuhay waydi ti nayi manuk, tuhay maan ti nayi isda.

⁴⁰ May manga bilug para sa langit, may manga bilug para sa daga, tuhay ti rinu gamit sa langit.

⁴¹ Tuhay ti rinu init, tuhay maan ti rinu bulan, ag tuhay waydi maan ti rinu pamgasan. Dahil ti usa ka pamgasan tuhay waydi sa usa kay rinu.

⁴² Katunda diman waydi ti pagkabuhi uman manga namatay. Pag-ilubung may karunutan, pagbuhiun uman sa udyi may karunutan.

⁴³ Pag-ilubung balaw may karinuan ag may kalumuyan, dapat nu buhiun uman may karinuan ag may kabisugan yi ngap.

⁴⁴ Ti pag-ilubung pag bilug angay sa daga, dapat nu buhiun uman bilug yi angay sa langit. Nu may bilug angay sa daga may bilug diman waydi angay sa langit.

⁴⁵ Katunda diman ti isinurat sa Banal Kasuratan magkun, “Ti un-an pag tawu si Adam inarupan Diyus bag-u may buhi yi.” Ti sa uryan pag Adam imaw ti Ispiritu tigpakaun buhi sa tawu.

⁴⁶ Balaw mag-una ti angay sa langit pag bilug nu unman ti angay dap sa daga pag bilug, bag-u di ti angay sa langit pag bilug.

⁴⁷ Ti kabag-u pag tawu si Adam taga daga angay diman waydi sa daga. Ti ikadwa pag Adam taga langit.

⁴⁸ Ti bilug panbabaw daga parihu sa bilug tawu binwat sa daga, ti bilug panlangit parihu sa bilug ginan sa langit.

⁴⁹ Kanta daan histuda parihu sa kabag-u pag tawu binwat sa daga, katunda diman kanta histuda aban parihu sa nagsitay ginan sa langit.

⁵⁰ Kang yi ngani pagsabihun sa kanyu, manga patar-ari, inda kanta bilug unman pumasakup sa kaharian Diyus. Ti may karunutan pag bilug unman mahimu makatanggap buhi unman may katapusan.

⁵¹ Malu, kang itultul sa kanyu ti usa ka katutuuhanan udwaya ipinaburayhaw Diyus sa manga tawu. Balaw tanan-tanan kita mamatay, dapat kita tanan bag-uhun,

⁵² bigla, unman mapidpirawan mata, sa katapusan pag budyung. Dahil tumunug ti budyung bag-u ti manga namatay buhiun uman udyi may karunutan, ag kita bag-uhun waydi.

⁵³ Dahil inda pag may karunutan kailangan tulsan unman may karunutan. Inda pag may kamatayan kailangan tulsan unman may kamatayan.

⁵⁴ Nu inda pag may karunutan matulsan yi unman may karunutan, ag inda pag may kamatayan matulsan unman may kamatayan, nu katunda matupad yi ngap aban ti bagaw magkun, “Dinura yi ti kamatayan, lubus yi lang nanalu ti Diyus.”

⁵⁵ “Kamatayan, naan tag yi kanmu panalu? Kamatayan, naan tag yi kanmu kapangyarihan magpakuri?”

⁵⁶ Ginan sa kasalanan may kapangyarihan ti kamatayan hampay magpakuri. Ginan maan sa Kasuguan ti kabisugan kasalanan.

⁵⁷ Dapat salamat sa Diyus, pagpakan-an niya kita panalu ginan sa kanta Panginuun Hisu-Kiristu.

⁵⁸ Nakan ngani duy, manga patar-ari, pagmarig-un kamu, danga daradarahan, pagpirmi matinupadun kamu sa buruwatun Panginuun, dahil naalaman yi niyu balaw unman may kabuluhan kanyu magbudlay para sa Panginuun.