1 Kurintu 14 - Hanunuu

Tungkul waya sa manga Pakaun Ispiritu Banal

¹ Kasipag kamu sa pagmahal. Dag pabaya-baya duy, hangadun gid niyu ti manga pakaun Ispiritu, dapat lalu ngap hampay kamu pumurupita yi.

² Dahil tigbagaw sa tuhay-tuhay pag pamagaw balaw inadalan, balaw sa tawu pag magbagaw, nu unman tag sa Diyus. Dahil unman may tawu makasalum sa kay pagbagawun. Dahil angay sa udyuk Ispiritu pag magbagaw siya manga katutuuhanan unman magkamaramadan, Diyus lang ti makaalam.

³ Dapat ti magpurupita magbagaw sa manga tawu sa ikarig-un nida pagsarig, hampay matulin kanda mag-sunud ag sa ikabaya nida isip.

⁴ Ti magbagaw sa tuhay-tuhay pag pamagaw magparig-un sa kay sadili sarig. Dapat ti magpurupita magparig-un sa iglisya.

⁵ Kang gustu mana kamu tanan magbagaw sa tuhay-tuhay pag pamagaw balaw inadalan. Dapat lalu waya kang gustu kamu pagmakapurupita. Lalu ngap mahalaga ti magpurupita sa magbagaw sa tuhay-tuhay pag pamagaw purya lang mipaliwanag niya hampay maparig-un ti iglisya.

⁶ Nu aku nangus makaasan sa kanyu, manga patar-ari, magbagaw sa tuhay-tuhay pag pamagaw unman inadalan, hintay nguna kanyu pakinabangun sa kangku? Mayad waya nu tultulun niku sa kanyu ngatay ti paliwanag, ngatay ti kaalaman, ngatay ti manga bagaw ginan sa Diyus, ngatay ti manga pag-iadal.

⁷ Una manga bagay unman may arup-arup, ga manga palawta manga alpa nu unman mag-atuatu kabitay pag maalaman tawu nu hintay ti pagpatunuhan.

⁸ Dahil una budyung nu tumunug unman may turunu, hintay lugud ti mangalistu maglaban sa gira?

⁹ Ag kabitay pag maintindihan ti kanyu pagsabihun nu unman kanyu pagbagawun hampay masalman kay kahulugan. Barang ga bagyu lang kanyu bagaw maglawuy.

¹⁰ Halimbawa, mayamu diman ti manga pamagaw tawu sitay sa babaw daga, tanan-tanan may kahulugan gid kanda pamagaw.

¹¹ Nu unman naintindihan niku kanmu kahulugan bagaw, kita parihu unman nanalalman.

¹² Katunda diman kamu dahil kanyu paghangadun ti manga pakaun Ispiritu Banal, hangadun niyu hampay lubus yi sa kanyu ti manga pakaun Ispiritu sa ikarig-un iglisya.

¹³ Nakan una hintay tigbagaw sa tuhay-tuhay pag pamagaw unman inadalan kailangan pagdarangin siya hampay maipaliwanag niya kay pagsabihun.

¹⁴ Dahil nu aku magdarangin sa tuhay-tuhay pag pamagaw, kang lang tagipusuun tig darangin dapat unman miabay kang naisipan.

¹⁵ Kabitay nguna kang buwatun? Mandarangin aku ginan sa kang tagipusuun ag may darangin diman ginan sa kang naisipan. Kumanta aku ginan sa kang tagipusuun, ag kumanta diman ginan sa naisipan.

¹⁶ Nu kawu magpasalamat sa Diyus ginan lang sa kanmu tagipusuun, kabitay pag makasabi, “Amin” ti usa ka tawu nu unman napakan-an mag-alam sa tuhay-tuhay pag pamagaw, unman naalaman niya kanmu pagsabihun.

¹⁷ Tutuu mayad diman kanmu pasalamat sa Diyus dapat unman makaawat sa iba sa ikarig-un nida pagsarig.

¹⁸ Magpasalamat aku sa Diyus, dahil aku makabagaw sa tuhay-tuhay pag pamagaw unman inadalan balaw lang ga kanyu tanan.

¹⁹ Dapat sa katpung magtiripun ti iglisya mas lalu gustu gid aku magbagaw una lang lima ka taga bagaw basta magkasalman manga manugpatingi hampay rumig-un sida. Unman aku magkasulung magbagaw linibu libu bagaw sa tuhay-tuhay pag pamagaw unman inadalan.

²⁰ Manga patar-ari, danga yi ga anak kanyu naisipan. Nu tungkul sa kadautan bay, pagga anak lapsag kamu. Dapat pagginurangun yi kanyu naisipan.

²¹ Kainda ti pagsabihun sa Banal Kasuratan, magkun ti Panginuun, “Bumagaw aku sa inda pag nasyun, dapat tuhay kay pamagaw ti manugpadakit sa kanda. Dayu aku patingihan nida una manga dayuhan ti pumadakit kang bagaw.”

²² Nu katida ti pakaun Ispiritu sa tawu hampay makabagaw siya sa tuhay-tuhay pag pamagaw unman inadalan, tunda usa ka tanda balaw sa manga magsarig nu unman sa manga unman magsarig sa kan Hisus. Dapat nu kay pakaun Ispiritu sa tawu hampay siya magpurupita, tida usa ka tanda ngap sa manga magsarig sa kan Hisus balaw sa manga unman magsarig.

²³ Nu sa katpung magtiripun ti iglisya nu tanan-tanan magbagaw sa tuhay-tuhay pag pamagaw unman inadalan, ag nu may rinmas-ug asan manga tawu balaw madunung magbagaw sa tuhay-tuhay pag pamagaw, ngatay ngap unman manga magsarig, unman aw sabihun nida kuntay kamu manga paung.

²⁴ Dapat nu kamu tanan-tanan magpurupita bag-u nu may rinmas-ug usa ka tawu unman madunung magpurupita, magpatingi siya sa kanyu binagaw bag-u makakilala siya sa kay sadili may kasalanan, magkaalaman yi niya kay tutuu kahamtangan sa atubangan Diyus.

²⁵ Bag-u ipaburayhaw Ispiritu ti manga ilinihim pag kasalanan sa kay tagipusuun, nakan ngani lumuhud siya sumamba sa Diyus ag rargu sumabi siya, “Tutuu maaw ti Diyus sa kanyu karaw-an.”

Pagmaayus ti Tanan Buruwatun sa Iglisya

²⁶ Manga patar-ari, hintay nguna ti ibug sabihun inda tanan? Sa kanyu magtiripun ti usa kumanta, ti usa tumudlu, ti usa magpurupita, ti usa maan bumagaw sa tuhay-tuhay pag pamagaw bag-u may usa maan pumaliwanag sa kay ibug sabihun. Buwatun niyu ti tanan bagay sa ikarig-un iglisya.

²⁷ Nu may magbagaw sa tuhay-tuhay pag pamagaw, kang-ud ti duwa hanggan sa tulu pabulus-bulus, kailangan may manugpaliwanag sa kay ibug sabihun.

²⁸ Dapat nu unman may manugpaliwanag sa kay sinabi sa tuhay-tuhay pag pamagaw, danga lang pagpadnugan sa kada usa, sa sadili lang tagipusuun pag maghampang sa Diyus.

²⁹ Bumagaw ti duwa tugka lang sa tulu ka purupita bag-u pagkilalan-un manga iba ngatay tutuu ginan sa Diyus kanda pagsabihun.

³⁰ Ag nu ti usa sa manga matukawan siyun may tinanggap bagaw ginan sa Diyus, pumat-ung dapu ti usa ka magbagaw.

³¹ Dahil kamu tanan mahimu magpurupita tigus-a tigus-a hampay ti tanan manugpatingi pagtudluan ag pagparig-unun sa Panginuun.

³² Tigpurupita kailangan mapinigilun sa kay sadili tagipusuun.

³³ Dahil ti Diyus gimpuunan kahusayan, balaw gimpuunan kaguluhan. Kailangan pari-parihu ti mangyari sa kada puru iglisya Diyus.

³⁴ Ti manga babayi kailangan danga mag-ingay sa katpung tiripun iglisya. Dahil unman pagpasnuan sida magbagaw sa katpung pagtiripun. Kailangan ti manga babayi pagmapinakumbabaun angay sa isinurat sa Kasuguan Diyus.

³⁵ Nu sida magtagaalami, pagpaingana sida sa kanda manga asawa nu muli sa balay. Dahil bilang balaw maangay ti babayi nu magbagaw sa katpung tiripun ti iglisya.

³⁶ Barang kanyu hantup sa kanyu ginan ti bagaw Diyus. Kamu lang aw lugud ti may bagaw Diyus?

³⁷ Una si unu nu kay pag-isipun niya siya purupita, nu kay naisipan sakup sa Ispiritu Banal, kailangan pagkilalan-un niya kang isinurat sa kanyu kuntay bilin Panginuun.

³⁸ Ti unman magpaniwala sa katida danga waydi pagpaniwalai.

³⁹ Nakan ngani, manga patar-ari, paghingbut kamu sa makapurupita. Danga waydi pag-irangi ti magbagaw sa tuhay-tuhay pag pamagaw unman inadalan.

⁴⁰ Ti mayad lang pagmalinaw ag maayus ti tanan niyu buruwatun.