1 Kurintu 13 - Hanunuu

Tungkul sa Pagmahal

¹ Una aku magbagaw tuhay-tuhay pag pamagaw manga tawu hanggan manga anghil, bag-u unman aku may pagmahal, parihu lang aku sa agung maingay, ga lingganay magpanngil sa tuli.

² Una pinakan-an yi aku Panginuun hampay makapurupita ag una maalaman niku ti tanan katutuuhanan unman ipinaburayhaw sa tawu, hanggan ti tanan kaalamanan, una abi pinakan-an aku Panginuun buu pagsarig hampay ipakababa niku ti manga bantud, bag-u unman aku may pagmahal, unman diman aku may pulus.

³ Una ipakaun niku ti tanan-tanan niku kasiyunan sa manga pugri ag una ipakaun waya niku kang bilug hampay sunugun bag-u unman aku may pagmahal, unman gid aku may pakinabang.

⁴ Ti pagmahal may pasunaid sa kay sadili, ag mahusay sa kaparihu. Ti pagmahal balaw maghirak. Ti pagmahal balaw magpadayaw, balaw magpalabi-labi sa kay sadili,

⁵ balaw mag-ugali mahalay, bukun ngap kay sadili ikaayad ti paghanapun niya. Ti pagmahal balaw magkaaburidu, balaw magkutub,

⁶ balaw magbaya sa kadautan, nu unman magbaya ngapu sa katutuuhanan.

⁷ Tanan kay pag-agwantahun, tanan kay pagpaniwalaan, tanan kay pag-asahan, tanan kay pagtiisun.

⁸ Ti pagmahal balaw madura una hanggan aban. Ti magpurupita madura di aban, una tigbagaw manga tuhay-tuhay pag pamagaw unman inadalan umapas diman, una ti kaalaman madura di aban.

⁹ Dahil ti pakaun kaalaman hanggan ti pakaun hampay makapurupita kurang waya,

¹⁰ dapat nu mangyari aban ti tanan ginayak Diyus udyi may kakurangan.

¹¹ Pagka aku kaybi anak di waya, nagbagaw aku pamagaw anak, kang buut ga anak diman waydi hanggan kang naisipan ga anak diman. Pagka kainda aku may idad yi, tinayakan yi niku ti buut ga anak.

¹² Dahil nu kainda di waya baliwa, malamun sa kanta maghiling ga sa usa ka salamin. Dapat aban makitan yi nita sa mata. Kainda udwaya lubus aku makakilala, dapat aban makilala yi ngapu niku, parihu sa kay magkilala Diyus sa kangku.

¹³ Dapat inda pag tulu ti unman gid madura hanggan waya aban, ti pagsarig, ti pag-asa hanggan ti pagmahal. Dapat ti mahalaga sa tulu imaw ti pagmahal.