1 Kurintu 12 - Hanunuu

Manga Pakaun Ispiritu Banal

¹ Taynguna, manga patar-ari, gustu niku kamu makaalam tungkul sa manga pakaun ginan sa Ispiritu.

² Alam niyu, kanyu udwaya nakatanggap sa kan Hisus, sinarigan niyu ti manga buyun pag diyus-diyusan, imaw ngap ti nagpatalang pirmi sa kanyu.

³ Nakan kang pag-ipaalaala sa kanyu, unman may magbagaw ginan sa udyuk Ispiritu Diyus magkun, “Saadan si Hisus.” Unman diman may sumabi magkun, “Si Hisus ti Panginuun,” nu unman ginan lang sa udyuk Ispiritu Banal.

⁴ May tuhay-tuhay pag pakaun madi usa lang ka Ispiritu.

⁵ May tuhay-tuhay pag manga arasikasuhun, dapat usa lang ka Panginuun ti pagsirbihan.

⁶ Ag may tuhay-tuhay pag buruwatun, dapat usa lang ka Diyus tigpakaun kaya sa kada usa sa tanan buwat niya.

⁷ Dapat sa kada tawu pag-ipahayag Ispiritu kay kapangyarihan agud mapakinabangan tanan.

⁸ Dahil ti Ispiritu magpakaun bagaw kaalaman sa usa ka patar-ari, sa iba ti Ispiritu diman tigpaburayhaw sa manga bagay unman magkaalaman.

⁹ Sa iba imaw diman pag Ispiritu tigpakaun sarig, sa iba imaw diman waydi inda pag Ispiritu tigpakaun kapangyarihan magpaayad sa sakit.

¹⁰ Sa iba maan magpakaun siya kapangyarihan hampay magbuwat makadululaw, sa iba maan hampay magpurupita, sa iba maan pag-ipakaun Ispiritu hampay makakilala nu hintay ti inudyukan Ispiritu Banal ag nu hintay ti ginan sa labang, sa iba maan hampay bumagaw sa tuhay-tuhay pag pamagaw balaw inadalan, sa iba maan pag-ipakaun Ispiritu hampay makapaliwanag sa kahulugan tuhay-tuhay pag pamagaw.

¹¹ Dapat imaw diman pag Ispiritu ti magbuwat inda tanan-tanan. Pag-ipakaun niya sa kada usa angay sa kay kagustuhan niya.

Ti Bilug Mayamu kay Gamit

¹² Kanta bilug usa-usa dapat kay gamit mayamu. Madi mayamu ti gamit bilug, usa-usa lang ti bilug. Katida diman waydi si Kiristu.

¹³ Usa lang ka Ispiritu ti nagtulbaw sa kanta tanan sa bilug ni Kiristu, una kita Hudiyu, una kita Giriyigu, una manga panawuhun, una manga balaw panawuhun, kita tanan pinainum sa usa lang ka Ispiritu.

¹⁴ Dahil ti bilug balaw usa lang kay gamit, nu unman mayamu ngap.

¹⁵ Nu sabihun abi lulud, “Dahil aku balaw kamang, balaw aku gamit bilug,” balaw ngap unman sa bilug diman ti lulud.

¹⁶ Nu sabihun abi tuli, “Dahil aku balaw mata, balaw aku gamit bilug,” balaw ngap unman sa bilug diman ti tuli.

¹⁷ Nu abi ti bilug pasay mata, hintay nguna ti ipatingi? Nu abi ti bilug pasay tuli, kabitay pag humungaw?

¹⁸ Dapat taynguna binugtangan Diyus ti bilug tuhay-tuhay pag kagamitan angay sa kay kagustuhan.

¹⁹ Nu abi tanan-tanan usa lang ka gamit unman yi ngap may bilug.

²⁰ Mayamu ngap kay gamit, dapat usa-usa lang ka bilug.

²¹ Balaw sumabi ti mata sa kamang magkun, “Unman aku may kailangan sa kanmu.” Una hanggan ulu dayu sumabi sa lulud, “Unman aku may kailangan sa kanyu.”

²² Balaw pumadayu, nu unman tunda pag manga gamit ti bilang manga malumuy lalu ngapu pagkailanganun bilug.

²³ Tunda pag manga gamit bilug ti pag-isipun nita balaw mahalaga lalu gid ngap pagpahalagaan nita tunda. Ti manga gamit nita bilug balaw marinu, lalu waya ngap kanta pagparinuun.

²⁴ Ti marinu pag manga gamit nita bilug unman kailangan pagparinuun waya. Dapat hinusay Diyus ti bilug, pinakan-an lalu daka pag kadayawan tunda pag gamit bilug ti kurang sa kadayawan.

²⁵ Hampay magkarausa ti manga gamit bilug ag parihu magparasunaidan sa usa kag sa usa.

²⁶ Nu ti usa ka gamit bilug may mag-asaydan, ti tanan gamit minsan sa kanya magdungug kakurian. Nu ti usa ka gamit bilug pagdayawun, ti tanan manga gamit parihu magbaya minsan sa kanya.

²⁷ Kamu yi ngani ti bilug ni Kiristu ag ti kada usa sa kanyu manga gamit bilug niya.

²⁸ Ti iglisya hinusay diman Diyus. Un-an sa tanan ti manga apustul bag-u ti manga purupita bag-u ti manga manugtudlu bag-u ti manga magbuwat manga makadululaw bag-u ti manga pinakan-an kapangyarihan magpaayad sa sakit, ti may kapangyarihan mag-awat sa iba, ti manga pinakan-an kadunungan sa magpangulu, ag ti manga magbagaw sa tuhay-tuhay pag pamagaw balaw inadalan.

²⁹ Balaw sida tanan manga apustul, balaw sida tanan manga purupita, balaw sida tanan manga manugtudlu, balaw sida tanan manga manugbuwat makadululaw.

³⁰ Balaw tanan pinakan-an sida kapangyarihan magpaayad sa sakit. Balaw sida tanan magbagaw sa tuhay-tuhay pag pamagaw. Unman sida tanan makapaliwanag kahulugan sa tuhay-tuhay pag pamagaw.

³¹ Lubus gid niyu hanapun ti lalu mahalaga pag pakaun. Pag-itudlu waya niku sa kanyu ti usa ka pinakamayad pag paraan sa tanan.