1 Kurintu 11 - Hanunuu

¹ Paghuwad kamu sa kangku ga kang maghuwad waydi sa kan Kiristu.

Magtaung nu Magsamba

² Pagbayaun niku kamu dahil unman aku magkalimtan niyu, kanyu di pagsundun kang itinudlu sa kanyu.

³ Dapat kang gustu pagmaintindihan niyu si Kiristu tigpamahala sa kada lalaki, ti lalaki magpamahala sa kay asawa bag-u ti Diyus magpamahala waydi sa kan Kiristu.

⁴ Nu magdarangin ti lalaki aw ngatay magpurupita siya bagaw Diyus bag-u may taung kay ulu, magpauya lang siya sa kan Kiristu.

⁵ Nu magdarangin ti babayi aw ngatay magpurupita bag-u unman may taung kay ulu, magpauya lang siya sa kay asawa lalaki, siya ga babayi kinidkid kay buhuk.

⁶ Nu ti usa ka babayi unman magtaung sa kay ulu, mayad yi lang ipakidkid kay buhuk. Mahalay mana sa babayi nu magpakidkid kay buhuk, una magpauguy. Nakan mayad man gid nu may taung kay ulu sa magpakidkid kay buhuk.

⁷ Unman mayad nu magtaung ti lalaki kay ulu, dahil siya linalang ga histuda ag kadayawan Diyus. Dapat sa babayi mag-akitan ti kadayawan lalaki,

⁸ dahil ti lalaki balaw linalang Diyus ginan sa babayi nu unman babayi ti linalang Diyus ginan sa lalaki.

⁹ Unman diman linalang ti lalaki para sa babayi nu unman babayi ngapu ti linalang tabug sa lalaki.

¹⁰ Pag-isipun nita ti manga anghil nakan ti babayi kailangan magtaung sa kay ulu bilang ga tanda sa kay magpasakup sa kay asawa lalaki.

¹¹ Katunda diman dahil sa kanta pakiusa sa Panginuun ti babayi may kailangan kaawat lalaki ag ti lalaki may kailangan kaawat babayi.

¹² Dahil nu kabitay ti babayi ginan sa lalaki, katunda diman ti lalaki pag-ianak babayi. Ag ti tanan bagay ginan sa Diyus.

¹³ Kamu duy kailangan pagkilala yi. Mayad aw lugud ti babayi nu magdarangin sa Diyus unman may taung kay ulu?

¹⁴ Unman aw lugud magkaalaman sa kanta kaugalian hasayan nu ti lalaki aba kay buhuk?

¹⁵ Dapat unman aw madayaw manga iba ti babayi nu aba kay buhuk? Dahil pinapaladan waydi siya aba buhuk pinagkataung sa kay ulu.

¹⁶ Dapat nu may magkaibug magbirba sa kang sinabi inda, udyi aku may iba paanyu. Kami nakan hanggan tanan iba iglisya Diyus kainda diman kanmi ugali sa pagsamba.

Tungkul sa Banal pag Yapun

¹⁷ Dapat ay may paanyu aku inda sa kanyu. Unman aku magbaya sa kanyu, dahil nu kamu magtiripun, balaw sa ikaayad niyu tunda, nu unman sa ikadaut ngap.

¹⁸ Dahil un-an sa tanan naalaman niku nu kamu ti manga napasakup sa kan Hisus magtiripun, unman maaw magparaangayan kamu. Ag bilang ga magpasnu yi ngap aku.

¹⁹ Siguru pihu balaw parihu kamu tanan sa kanyu pagsarig, hampay burayhaw ngap sa kanyu ti manga ungud magsarig sa Panginuun.

²⁰ Nu kamu magtiripun balaw mahimu kamu kumaun yapun Panginuun.

²¹ Dahil nu kamu magkaun magbarawagan maaw. Ti usa magkalun-us, ti usa langu yi ngap.

²² Unman aw lugud kamu may balay? May yarabasan may irinman kamu. Hayga lugud unman pagpahalagaan niyu ti iglisya Diyus? Hayga pagpakay-ahun lang niyu ti unman may imaw? Hintay nguna kang masabi sa kanyu? Kamu aw kang pagbayaun sa tunda pag bagay? Bukun ngap aku magbaya.

²³ Ti itinudlu Panginuun sa kangku, imaw diman waydi kang itinudlu yi sa kanyu magkun,

²⁴ pagka napakampi si Hudas sa kalaban ni Hisus hampay siya kay itudlu sa kanda, ati katpung pag yabi nagbuul si Hisus ginan sa lamak usa ka tinapay. Nagpasalamat siya sa Diyus bag-u pinikapika niya ti tinapay. Magkun siya, “Inda kang bilug pag-ipakaun sa kanyu. Huwadan niyu inda sa pag-alaala sa kangku.”

²⁵ Katunda diman pagka nakayapun yi, binitbit ni Hisus ti ungut magkun, “Inda pag ungut imaw ti bag-u taratu tinalaghut niku dugu. Huwadan niyu inda sa kada niyu mag-inum sa pag-alaala sa kangku.”

²⁶ Dahil kada niyu magkaun inda pag tinapay, ag inman niyu ti ungut, pag-ipakilala niyu kay pagkamatay Panginuun hanggan sa udwaya rumas-ug siya.

²⁷ Nakan ngani una hintay ti magkaun tinapay ag mag-inum sa ungut Panginuun bag-u ud pagpahalgaan niya ti Panginuun, magkasala ngap siya laban sa Panginuun dahil unman pagpahalgaan niya kay bilug ag dugu Panginuun.

²⁸ Dapat pag-usisa ti tawu sa kay sadili barang may kasalanan, bag-u di kumaun tinapay ag uminum sa ungut.

²⁹ Ti magkaun tunda pag tinapay ag mag-inum sa ungut bag-u unman pagpahalagaan niya ti bilug Panginuun, kay ngap pagbutungun ti sintinsiya Diyus tag sa kay sadili bilug.

³⁰ Nakan ngani mayamu sa kanyu ti may manga sakit ag manga malumuy ag balaw pira ti namatay yi.

³¹ Dapat ay nu kita mag-usisa sa kanta sadili bilug ngatay may kasalanan, balaw kita sintinsiyahan Diyus.

³² Dapat nu kita pagparig-anan Panginuun kainda, tunda pariga sa kanta hampay kita unman miusa sa manga taga kalibutan sa sintinsiya aban.

³³ Nakan manga patar-ari niku, nu kamu magsararuhan, pag-alalagdan kamu.

³⁴ Tigkalun-us pagkaun dapu siya sa kay balay. Nu kanyu sundun kang paanyu, kamu balaw maparig-anan Diyus sa kanyu magtiripun. Sa kang pag-asan aban ayusun waya niku ti iba pag manga kakurian.