1 Kurintu 10 - Hanunuu

Ampara tungkul sa Diyus-diyusan

¹ Manga patar-ari, gustu niku maalaman mana niyu ti nangyari sa kanta manga ginurang. Sida tanan giniyahan rurum Panginuun, sida tanan nagdipay sa Dagat Marara.

² Sida tanan napaminsan sa kan Muysis, pagka sida ga itinulbaw sa rurum ag sa dagat.

³ Sida tanan nangaun karan-unun ipinakaun Diyus.

⁴ Sida tanan nag-inum waydi danum ipinakaun Diyus, dahil nag-inum sida danum ginan sa batu ipinapalad Diyus. Pagka sida nakatapus inum nagkuyug sa kanda ti batu. Inda pag batu si Kiristu yi ngapu.

⁵ Madi daka kay binwat Panginuun sa kanda, kanda ngap binwat unman angay sa Diyus. Nakan ngani nagkarawayak kanda manga but-ul sa pangawakawaan dahil sa parusa Panginuun.

⁶ Inda pag manga nangyari kaybi, pasay yi manga puruyba sa kanta hampay kita balaw mag-isip tag sa kadautan, balaw ga kanda mag-isip tag sa kadautan.

⁷ Danga diman waydi kamu magsamba sa manga diyus-diyusan, balaw parihu sa kanda, ti iba nagsamba sa manga diyus-diyusan. Ibinugtang diman waydi sa Banal Kasuratan magkun, “Ti usa ka nasyun Israil nagtukaw hampay magkaun mag-inum bag-u nagtirindug hampay manaruk.”

⁸ Danga diman waydi kita mag-uragin, balaw parihu sa kanda, ti iba nag-uragin, nakan duwapulu may tulu ka libu ti namatay sa usa ka sirang dahil sa parusa Panginuun.

⁹ Danga diman waydi kita magsubuk sa Panginuun balaw parihu sa kanda ti iba nagsubuk sa Panginuun namatay sida pinangagat ulay.

¹⁰ Danga diman waydi kamu magriklamu laban sa Diyus, balaw parihu sa kanda, ti iba nagbirba laban sa Diyus nakan minatay sida anghil kay sinugu Diyus hampay magpapas sa kanda.

¹¹ Inda ti nangyari sa kanda bilang usa ka puruyba sa kanta, pasay nakasurat sa paalaala sa kanta dahil arani yi kita sa katapusan panahun.

¹² Nakan nu pag-isipun tawu marig-un kay tindug, pag-aman barang siya magpu.

¹³ Unman may subuk rumas-ug sa kanyu nu unman mabata niyu. Masarigan gid ti Diyus, balaw pahintulutan niya kamu subukan sa udyi niyu makaya. Dapat dungan sa subuk magbuwat siya paraan hampay makalawuy kamu sa kakurian, hampay maagwanta niyu ti subuk.

¹⁴ Kamu duy pag manga tuludluan niku, iwasan niyu ti pagsamba sa manga diyus-diyusan.

¹⁵ Magbagaw aku sa kanyu parihu sa manga but-anin, kamu bahala yi magkilala sa kang sinabi nu ngatay tama.

¹⁶ Ti ungut may papalad pagpasalamatan nita sa Diyus. Unman aw lugud kita may kabahagi sa dugu ni Kiristu nu kita mag-inum sa tunda pag ungut? Nu kita magkaun sa tinapay kanta pagpika-pikahun, unman aw lugud kita may kabahagi sa bilug ni Kiristu?

¹⁷ Madi mayamu, kita usa-usa lang ka bilug, usa lang waydi ka tinapay. Dahil kita tanan may kabahagi sa usa lang ka tinapay.

¹⁸ Bantayi niyu ti nasyun Israil. Ti manga magkaun sa manga ihinandug sa Diyus magpakiusa ngap sa Diyus dahil sa kanda pagsirbi sa surunugan manga handug sa Diyus.

¹⁹ Kabitay lugud kang pagsabihun sa kanyu? Ti ihinandug sa manga diyus-diyusan may pakinabang aw lugud? Ti diyus-diyusan may kabuluhan aw?

²⁰ Dapat ti sagda manga tawu unman napasakup sa Panginuun kanda pag-isagda sa manga labang, balaw sa Diyus. Unman gid aku may gustu kamu manpakiusa sa manga labang.

²¹ Dayu mahimu mainman niyu ti ungut Panginuun hanggan ti ungut gamit sa panagdahan sa manga labang. Dayu mahimu kamu magsaru sa lamak Panginuun hanggan sa lamak panagdahan.

²² Gustu aw lugud nita masubukan kay irang Panginuun, kita aw lugud lalu mabisug man sa kanya?

²³ Magkun sida, “Unman may makaampara sa kang buwat una hintay.” Nu sa ungud mana, dapat may manga buwat unman mayad. Unman may makaampara sa kanta buwat una hintay dapat may manga buwat unman mapakinabangan.

²⁴ Una si unu pag tawu dag hanap sa kay sadili ikaayad, nu unman ti ikaayad manga iba ti paghanapa.

²⁵ Nu kamu sa palingki, pagbili yi lang kamu kanyu karan-unun danga yi magpakapaingana, danga yi maghantup bagay kasalanan.

²⁶ Dahil inda pag daga kasiyunan Panginuun hanggan tanan-tanan bagay sitay sa babaw daga kanya diman.

²⁷ Nu kamu ban-awan usa ka tawu unman napasakup sa Panginuun ag nu gustu niyu umati una hintay ti ihayin kan-a lang niyu, danga yi magpaingana danga yi maghantup bagay kasalanan.

²⁸ Dapat nu may magsabi sa kanyu, “Inda pag karan-unun ihinandug sa diyus-diyusan,” danga maggaraw duy magkaun, barang ngap patalangun nita ti nagban-aw, hampay balaw maghantup bagay kasalanan.

²⁹ Kang ibug sabihun balaw kuntay kamu tighantup, nu unman ti manga iba. Dahil hayga kanta hantupun may kasalanan ti usa ka tawu nu unman may pag-isipun siya.

³⁰ Nu aku nagpasalamat sa Diyus bag-u nagsaru sa karan-an, hayga aku pagkadat-an waya sa bagaw? Dahil inda pag karan-unun kang pinasalamatan ngani sa Diyus.

³¹ Nakan una kamu magkaun una mag-inum, una hintay kanyu pagbuwatun, buwata niyu ti tanan sa ikadayaw sa Diyus.

³² Danga ipakakit niyu sa manga Hudiyu una sa manga balaw Hudiyu una hanggan sa iglisya Diyus ti sa ikasimray nida isip.

³³ Pagga kangku diman waydi, pagdahanan niku kang ugali sa unman may ikasabi una si unu. Unman paghanapun niku kang sadili ikamayad, nu unman ti paghanapun niku ti ikamayad kayamuan tawu hampay iribri sida.