1 Kurintu 1 - Hanunuu

¹ Inda duy aku si Pablu ti may surat hanggan kanta patar-ari si Sustinis. Aku si Pablu napili Diyus hampay apustul ni Hisu-Kiristu angay sa kay kagustuhan Diyus.

² Inda pag surat tabug sa kanyu, sa iglisya Diyus sa banwa Kurintu. Kamu manga banal dahil sa kanyu pakiusa sa kan Kiristu Hisus. Kamu ipinablag yi ginan sa kalibutan minsan sa tanan tawu sa kada rugar magsampit sa ngaran nita Panginuun Hisu-Kiristu, kanda Panginuun, kanta diman tanan Panginuun.

³ Pagsa kanyu ti papalad hanggan ti kahusayan ginan sa kanta Diyus Ama hanggan ginan sa Panginuun Hisu-Kiristu.

Ti Kaayadan Diyus ginan sa kan Kiristu Hisus

⁴ Pirmi aku magpasalamat sa kang Diyus tungkul sa kanyu dahil sa kaayadan kay ipinakaun Diyus sa kanyu, sa kanyu magpakiusa sa kan Kiristu Hisus.

⁵ Dahil sa kanyu pakiusa sa kan Kiristu, abunda yi ngap kamu sa tanan bagay hanggan sa tanan pamagaw ag sa tanan kaalaman.

⁶ Mag-akitan yi waydi sa kanyu ti usa ka puruyba tungkul sa katutuuhanan sa kan Kiristu Hisus kanmi itinudlu.

⁷ Nakan kang-ud yi gid ti tanan pakaun Diyus kanyu natanggap hanggan sa kanyu mag-alagad waya sa kay pagras-ug nita Panginuun Hisu-Kiristu.

⁸ Si Hisu-Kiristu diman ti pumarig-un sa kanyu hanggan tugka sa katapusan hampay unman may ikasabi sa kanyu sa kaudasan pagras-ug nita Panginuun Hisu-Kiristu.

⁹ Ti Diyus masarigan, siya diman ti nagpili sa kanyu hampay magpakiusa kamu sa kay Anak, sa kanta Panginuun Hisu-Kiristu.

Pagkarausa ti manga Napasakup sa kan Kiristu

¹⁰ Taynguna kang pagsabihun sa kanyu, manga patar-ari, dahil sa karampatan nita Panginuun Hisu-Kiristu, kailangan kamu pag-arangayan. Una sa kanyu bagaw danga kamu magtalaluhan. Pagkarausa kanyu naisipan hanggan kanyu turunu.

¹¹ Dahil manga katawuhan diman ni Kuluwi ti nagtultul sa kangku, manga patar-ari, magkun, ti iba sa kanyu kunu may magtalaluhan.

¹² Inda kang gustu sabihun, ti kada usa hayga magsabi magkun, “Aku sa kan Pablu,” ti iba magkun, “Aku sa kan Apulus,” magkun maan ti usa, “Aku sa kan Pidru,” bag-u may magsabi waya gid, “Aku sa kan Kiristu.”

¹³ Maayaw-ayaw aw lugud si Kiristu? Balaw si Pablu ti ipinaku sa kurus dahil sa kanyu. Pagka kamu itinulbaw balaw kamu ipinasakup sa ngaran ni Pablu.

¹⁴ Magpasalamat aku sa Diyus unman aku may itinulbaw sa kanyu nu unman sida lang ni Kirispu ni Gayu.

¹⁵ Barang sabihun niyu kamu itinulbaw ipinasakup sa ngaran niku.

¹⁶ Inda waya ngani maaw itinulbaw niku sida tanan magtal-anakan ni Istipanas. Udyi aku may magkaisipan itinulbaw iba nu unman sida yi lang.

¹⁷ Dahil balaw aku sinugu ni Kiristu hampay magtulbaw sa tawu. Sinugu niya aku hampay manudlu sa Mayad pag Barita. Itinudlu ngani niku ti Mayad pag Barita, dapat balaw sa kadunungan lang niku bagaw, balaw diman sa karinu pamagaw angay sa tawu kadunungan, hampay unman mabul-an halaga kay kamatayan ni Kiristu sa kurus.

Si Kiristu ti Kamaskihan hanggan Kadunungan Diyus

¹⁸ Ti barita tungkul sa kan Kiristu kamatayan sa kurus ga unman may kabuluhan nu sa manga tawu atag sa kaparusahan. Dapat sa kay kamatayan ngap ni Kiristu pag ipinakilala Diyus kay kamaskihan sa kanta sa manga pag-iparibri niya.

¹⁹ Dahil nisurat sa Banal Kasuratan magkun, “Duraun niku ti kadunungan manga madunung; bul-an niku halaga ti kadunungan manga madunung.”

²⁰ Naan yi nguna ti madunung, naan ti manga manugtudlu Kasuguan? Naan ti marahusay magdibati sitay sa kalibutan? Unman aw binwat Diyus unman may kabuluhan ti kadunungan taga kalibutan?

²¹ Dahil sa kadunungan Diyus, balaw niya ipinahintulut makilala siya tawu sa panab-anan kadunungan kalibutan. Bagkus ngap, pagmayadun niya maribri ti manga sumarig sa kanya sa panab-anan Mayad pag Barita. Inda Mayad pag Barita kanmi pag-itultul, dapat angay sa kadunungan kalibutan inda unman may kabuluhan.

²² Ti manga Hudiyu maghanap makadululaw pag tanda. Ti manga balaw Hudiyu maghanap sa pag-isipun nida pag kadunungan.

²³ Dapat ay kanmi pag-itudlu si Kiristu ti nipaku sa kurus, nu sa manga Hudiyu imaw ngap kanda pag-ikadaut, nu sa manga balaw Hudiyu unman may kabuluhan siya.

²⁴ Dapat sa manga pinili Diyus una manga Hudiyu una manga balaw Hudiyu, si Kiristu ngap ti kamaskihan hanggan kadunungan Diyus.

²⁵ Dahil ti pag-isipun nida kalukuhan Diyus mas higit waya ngap sa kadunungan tawu, ag kanda pag-isipun kalumuyan Diyus mas mabisug waya sa kabisugan tawu.

²⁶ Pag-isipa niyu, manga patar-ari, kay nagpili Diyus sa kanyu, balaw mayamu ti manga madunung sa kanyu sadili pag-iisip, balaw mayamu ti may kamaskihan, balaw mayamu ti may mataas pag katungkulan.

²⁷ Pinili ngap Diyus ti manga pagkumnun taga kalibutan kuntay unman may kabuluhan, hampay pakay-ahun ngap niya ti manga madunung. Pinili Diyus ti manga pagkumnun taga kalibutan kuntay malumuy, hampay pakay-ahun ti manga mabisug.

²⁸ Ag ti manga pagkumnun taga kalibutan unman may halaga hanggan ti manga pagpuyaan nida imaw ngap ti pinili Diyus hanggan ti manga unman may gana hampay mabul-an ngap niya halaga ti manga pagsabihun mahalaga.

²⁹ Nakan una di usa ka tawu unman may makapadayaw-dayaw sa atubangan Diyus.

³⁰ Pinausa yi kamu Diyus sa kan Kiristu Hisus. Siya ti binwat Diyus gimpuunan kadunungan nita hanggan katadlungan, ag pinablag para sa kanya. Irinibri yi kita sa kanta manga kasalanan.

³¹ Angay sa isinurat sa Banal Kasuratan magkun, “Nu may magkaibug magdayaw, pagdayaw yi siya sa Panginuun.”