1 Krunika 5 - Hanunuu

Kay manga Lahi ni Rubin

¹ Si Rubin kay panganay pag anak ni Israil, dapat dahil sa nangulid siya sa usa sa manga asawa niya ama, kay karampatan bilang panganay ipinakaun sa manga anak ni Husi kay diman patar-ari. Nakan balaw siya nisurat sa listahan nida manga linahi bilang panganay pag anak.

² Ag una makapangyarihan si Huda kaysa kay manga patar-ari ag ti takinan ginan sa kay lahi, ti karampatan bilang panganay ipinakaun sa kan Husi.

³ Inda kay manga anak lalaki ni Rubin kay panganay ni Israil: si Hanuk, si Palu, si Hisrun, ag si Karmi.

⁴ Inda kay manga lahi ni Huwil: si Simaya, si Gug, si Simiy,

⁵ si Mikas, si Riayas, si Baal,

⁶ ag si Biira. Si Biira kay takinan sa manga lahi ni Rubin katpung bihag sida ni Hari Tigrat Pilisir sa Asirya.

⁷ Inda kay manga katawuhan ni Biira nisurat sa listahan nida manga ginurang angay sa kanda lahi: si Yiil (kay takinan), si Sakaryas,

⁸ ag si Bila anak ni Asas. Inda si Asas anak ni Sima, ag laki ni Huwil. Inda pag manga lahi ni Rubin nangulian sa rugar ginan sa Aruwir tugka sa Nibu ag Baal Miyun.

⁹ Ag dahil nagyamu kanda hayup ati sa Gilyad, nangulian sida tugka sa butlakan, sa saruy pangawakawaan atabug sa Sapa Iyupratis.

¹⁰ Pagka si Saul ti hari, nan-gira sida sa manga Hagriyu ag talu nida sida. Sinakup nida ti manga pag-ulian manga Hagriyu sa buu butlakan Gilyad.

Kay manga Lahi ni Gad

¹¹ Nangulian kay manga lahi ni Gad sa daga Basan kadasun sa daga nida ni Rubin, tugka sa Salika.

¹² Inda kay manga lahi ni Gad: si Huwil, ti takinan sa Basan, kay sunud sa kanya si Sapam, bag-u si Hanay ag si Sapat.

¹³ Kanda manga katawuhan angay sa kada magtal-anakan sida ni Mikail, ni Misulam, ni Shiba, ni Huray, ni Hakan, ni Sia, ag ni Ibir — pitu sida tanan.

¹⁴ Sida kay manga lahi ni Abihail anak ni Huri. Inda si Huri anak ni Harwa kay laki ni Gilyad, ag laki sa tuud ni Mikail. Inda si Mikail anak ni Hisisai kay laki ni Hadu, ag laki sa tuud ni Bus.

¹⁵ Si Ahi anak ni Abdiyil kay laki ni Guni imaw kay takinan sa kanda manga magtal-anakan.

¹⁶ Nangulian sida sa Gilyad ati sa Basan ag sa manga baryu sa sangput inda, ag sa buu paraharaban Sarun.

¹⁷ Inda sida tanan nisurat sa listahan manga lahi sa tunda katpung kay maghari ni Hutam sa Huda ag ni Hiribuam sa Israil.

¹⁸ May 44,760 ka sundalu sa lahi ni Rubin, ni Gad, ag sa katunga sa lahi ni Manasis. Pinaanad sida sa paggira ag anad sida maggamit manga panangga, baladaw, ag pamana.

¹⁹ Nanlaban sida sa manga Hagriyu, Hituriyu, Napisiyu, ag Nudabiyu.

²⁰ Naghagad sida awat sa Diyus pagka nanlaban sida, ag sinagut Diyus kanda darangin dahil nagsarig sida sa kanya. Nakan ipinanalu sida Diyus sa manga Hagriyu hanggan sa tanan kakampi nida.

²¹ Pinanbuul nida kay hayup manga Hagriyu: 50,000 ka kamilyu, 250,000 ka karanidu, ag 2,000 ka asnu. Binihag diman nida kay 100,000 ka tawu,

²² ag mayamu kanda minatay dahil inawatan sida Diyus sa paglaban. Ag inulianan nida tunda pag manga rugar tugka sa binihag sida atabug sa Asirya.

Kay Katunga Lahi ni Manasis

²³ Mayamu gid kay katunga pag lahi ni Manasis. Nangulian sida sa daga ginan sa Basan atabug sa Baal Hirmun, Sinir, ag Bantud Hirmun.

²⁴ Inda ti manga takinan nida manga magtal-anakan: si Ipir, si Isi, si Ilyil, si Asriil, si Hirimyas, si Hudabyas, ag si Hadyil. Manga maisug sida pag manga sundalu ag bantug pag manga takinan sa kanda manga magtal-anakan.

²⁵ Dapat balaw sida matinupadun sa Diyus nida manga ginurang, bagkus ngap nagsamba sida sa manga diyus manga nasakupan rinuris Diyus sa tunda pag daga.

²⁶ Imaw tunda nu hayga pinahintulutan Diyus Israil girahun sida ni Hari Pul sa Asirya (imaw diman si Tigrat Pilisir). Binihag ni Pul kay manga lahi ni Rubin, ni Gad ag ti katunga lahi ni Manasis ag dinara sa Hala, sa Habur, sa Hara, ag sa Sapa Gusan, nu naan ati di sida tugka kainda.