1 Krunika 29 - Hanunuu

Ti manga Pakaun sa Pagpatindug Balay Diyus

¹ Bag-u magkun si Hari Dabid sa tanan nasakupan Israil, “Si Sulumun kang anak pinili Diyus anak waya ag unman may kinaalaman. Daka ti buruwatun, dahil ti ibungsud pag balay balaw para sa tawu nu unman para sa Panginuun Diyus.

² Binwat niku ti tanan mabwat sa pag-alistu manga garamitun para sa balay niku Diyus — mayamu pag gintu, pilak, galang, baul, kayu, mahalaga pag manga batu uniks, ismiralda, manga batu tuhay-tuhay kay kulay, ag iba waya marinu manga batu ag manga marmul.

³ Ag dahil sa kang kagustuhan ipatindug ti Balay para sa kang Diyus, ipakaun niku kang sadili pag manga gintu ag pilak, bukud waya sa manga garamitun natipun yi niku para sa banal pag Balay Diyus.

⁴ Kang iayaw manga 100 tunilada gintu ginan sa Upir, ag manga 250 ka tunilada pilak. Inda gamitun hampay ipahaklup sa manga lingub Balay Diyus,

⁵ ag para sa tanan kagamitan buwatun manga manugpanday. Kainda, si unu ti magkaibug mangayaw para sa Panginuun?”

⁶ Bag-u nagpakaun may buluntad pagnalub-anan ti manga takinan manga magtal-anakan, manga takinan manga linahi Israil, manga kumandir sa linibu ag ginatus pag manga sundalu, ag ti manga may kangaranan piniyaran sa magpamahala manga kasiyunan hari.

⁷ Nagpakaun sida hampay sa pagbuwat sa Balay Diyus may manga 175 ka tunilada gintu, 10,000 ka gintu kuwarta, 350 ka tunilada pilak, 630 ka tunilada galang, ag 3,500 ka tunilada baul.

⁸ May manga nagpakaun waydi manga mahalaga pag manga batu, ag itinagu inda sa haramnuan sa Balay Diyus Panginuun pagpangunahan ni Hiyil lahi ni Girsun.

⁹ Nagbaya gid ti manga tawu sa kanda manga takinan dahil nagpakaun sida buluntad ag maluag sa kanda tagipusuun para sa Panginuun. Masyadu diman ti kabayaan ni Hari Dabid.

Ti Darangin ni Dabid

¹⁰ Dinayaw ni Dabid ti Panginuun sa atubangan tanan kadamlan. Sinabi niya, “Panginuun, Diyus nimi ginurang ni Hakub, pagdayawun kawu unman may katapusan.

¹¹ Makamaskihan gid kawu, paggalangun, kilala, ag pagdayawun. Dahil kanmu ti tanan pag bagay sa langit ag sa daga. Kawu ti hari, Panginuun, ag abwat kawu sa tanan.

¹² Ti kayamanan ag paggalang ginan sa kanmu. Kawu ti magpamahala sa tanan pag bagay. Makamaskihan gid kawu, ag kawu ti magpabisug ag magpakaun kapangyarihan una sa kantapu.

¹³ “Kainda, kanmi Diyus, pagpasalamatan kawu nimi ag pagdayawun kanmu paggalangun pag ngaran.

¹⁴ Dapat si unu gid aku hanggan kang nasakupan ti makapakaun abunda parihu sa inda? Tanan pag bagay ginan sa kanmu, ag pag-ibalik lang nimi ti ginan sa kanmu.

¹⁵ Alam nimu maglawuy lang kami sitay sa kalibutan parihu sa kanmi manga ginurang. Kanmi buhi sa kalibutan parihu sa aninu balaw pumirmaminti.

¹⁶ “Panginuun kanmi Diyus, inda tanan pag ipinakaun nimi sa pagpatindug sa Balay Diyus para sa kadayawan nimu banal pag ngaran ginan diman sa kanmu. Kanmu inda tanan!

¹⁷ Diyus niku, alam niku pag-usisaun nimu kanmi tagipusuun ag magbaya kawu nu makitan nimu matadlung inda. Imaw tunda buu tagipusuun ag nalub-anan ti pagpakaun niku inda pag manga bagay. Ag una ti kanmu nasakupan atay kainda nakitan niku nagpakaun diman may nalub-anan. Nakan nagbaya gid aku.

¹⁸ “Panginuun, ti Diyus nimi manga ginurang si Abraham, Isaak, ag Hakub, mana ipauli nimu pirmi inda sa tagipusuun nimu nasakupan, ag awati sida rumig-un sa kanmu.

¹⁹ Ag awati diman waydi kang anak si Sulumun pag matinupadun gid siya sa kanmu manga sugu, manga patigayun, ag manga surundanun, hanggan sa pagbuwat sa tanan nimu pag-ipatupad tungkul sa pagpatindug Balay Diyus kang iinalistu.”

²⁰ Bag-u magkun si Dabid sa tanan kadamlan, “Dayawa niyu ti Panginuun niyu Diyus.” Nakan dinayaw nida ti Panginuun, ti Diyus nida manga ginurang. Nanluhud sida ag nanyuk-ub sa paggalang sa Panginuun hanggan sa hari.

Kinilala si Sulumun bilang Hari

²¹ Kinaaldawan nansagda sida sa Panginuun manga handug pagsunugun: 1,000 ka tudu baka, 1,000 ka gurangun karanidu lalaki, ag 1,000 ka anak karanidu lalaki. Nansagda diman sida manga handug irinmun ag mayamu waya pag manga handug para sa buu Israil.

²² Nangaun sida ag nanginum masulung sa atubangan Panginuun sa ati pag sirang. Ag ibinarita maan nida kuntay hari si Sulumun anak ni Dabid. Pinayidan si Sulumun lana sa atubangan Panginuun bilang hari, ag pinayidan waydi si Saduk bilang manughandug.

²³ Nakan tinmukaw si Sulumun sa turukawan Panginuun bilang hari kailis niya ama ni Dabid. May kaabundahan si Sulumun, ag nagsunud sa kanya ti buu Israil.

²⁴ Nagtaratu ti tanan may kangaranan hanggan ti makapangyarihan pag manga tawu, ag ti tanan anak lalaki ni Hari Dabid pumasakup sa kan Hari Sulumun.

²⁵ Ipinabantug Panginuun si Sulumun sa buu Israil ag pinakan-an niya siya kadayawan unman natanggap iba pag manga hari sa Israil.

Ti Pagkamatay ni Dabid

^26-27 Naghari si Dabid anak ni Isai sa buu Israil sa sulud upatpulu ka timpu — 7 ka timpu sa Hibrun ag 33 ka timpu sa Hirusalim.

²⁸ Nabuhi siya may kadugayan mayaman ag madunung. Namatay siya gurangun yi gid, ag inublusan siya niya anak si Sulumun bilang hari.

²⁹ Ti tultulanun tungkul sa maghari ni Hari Dabid, ginan sa umpisa tugka sa katapusan, nisurat sa manga libru manga purupita sida ni Samwil, Natan ag Gad.

³⁰ Nisurat asan nu kabitay siya naghari, ag nu kabitay siya makapangyarihan, hanggan ti tanan nangyari sa kanya ag sa Israil, hanggan sa sangput manga kaharian.