1 Krunika 28 - Hanunuu

Ti Gayak ni Dabid para sa Balay Diyus

¹ Kainda, ipinatawag ni Hari Dabid sa Hirusalim ti tanan may kangaranan sa Israil: ti manga may kangaranan sa manga linahi, ti manga kumandir sa kada gurupu manga sundalu magsirbi sa hari, ti iba waya pag manga kumandir sa linibu ag ginatus pag manga sundalu, ti manga may kangaranan magpamahala sa tanan pag kasiyunan ag hayup hari hanggan sa kay manga anak, ti manga kaawat sa balay hari, ti makapangyarihan pag manga tawu, hanggan ti tanan anad pag manga sundalu.

² Pagka nagkatipun yi sida, nagtindug si Dabid ag magkun, “Patingihi niyu aku, manga patar-ari ag nasakupan niku. Gustu gid niku pumatindug Balay Diyus para paulian Kaban Kasunduan Panginuun kanta Diyus, para may tarat-an kay lulud. Ag nakagayak yi aku sa pagpatindug inda.

³ Dapat magkun ti Diyus sa kangku, ‘Balaw kawu ti pumatindug sa Balay Diyus para sa kang kadayawan, dahil usa kawu ka sundalu ag mayamu ti kanmu minatay.’

⁴ Dapat una katida, pinili aku Panginuun, ti Diyus Israil, ginan sa buu nimi magtal-anakan bumaliw hari sa Israil tugka aban. Pinili niya ti lahi ni Huda bilang takinan pag linahi. Ginan sa inda pag linahi, pinili niya kang magtal-anakan, ginan sa kang magtal-anakan ikinabaya niya ti pagpili sa kangku bilang hari sa buu Israil.

⁵ Pinakan-an niya aku mayamu manga anak lalaki, ginan sa kanda, pinili niya si Sulumun humari sa kay kaharian imaw ti Israil.

⁶ Magkun siya sa kangku, ‘Kanmu anak si Sulumun imaw ti pumatindug sa kang Balay hanggan kay manga sugkadan. Dahil pinili niku siya bumaliw kang anak, ag aku bumaliw kay ama.

⁷ Ag nu magparargu siya sa pagsunud sa kang manga sugu parihu sa kay pagbuwatun kainda, pahariun niku kay manga linahi tugka aban.’

⁸ “Nakan kainda, pagsuguun niku kamu sa atubangan tanan taga Israil, ti kadamlan pag nasakupan Panginuun, ag sa atubangan nita Diyus, pagtupada niyu kaayad ti tanan pag sugu Panginuun niyu Diyus. Nu tupadun niyu inda, parargu sa kanyu magkaapu inda pag marinu daga, ag maipamana niyu inda sa kanyu manga linahi tugka aban.

⁹ “Ag kawu, Sulumun anak niku, kilalan-a ag sirbihi ti Diyus ga kanmu ama sa buu nimu tagipusuun ag kaisipan, dahil mag-akitan Panginuun ti kada tagipusuun ag alam niya kanta gayak ag pag-isipun. Nu magdangup kawu sa kanya, awatan kawu niya; dapat nu mamugya kawu sa kanya, dayuun kawu niya tugka aban.

¹⁰ Nakan isipa inda kaayad. Pinili kawu Panginuun sa pagpatindug Balay Diyus para ati siya dayawun. Pagpakarig-un kawu, ag buwata inda pag buruwatun.”

¹¹ Bag-u ipinakaun ni Dabid sa kan Sulumun ti tanan pag gayak sa pagpatindug sa Balay Diyus hanggan ti sarakahan, ti manga sulud-sulud, ti manga haramnuan, ti manga sulud-sulud sa tungud, ti manga sulud-sulud sa sulud, nu naan ti taklub Kaban, ti Ulian Pangaawa.

¹² Ipinakaun ni Dabid inda tanan pag mustara ti itinudlu sa kanya Ispiritu para sa pagpatindug sa manga sugkadan Balay Diyus Panginuun, sa tanan pag sulud-sulud sa sangput, ag sa manga haramnuan sa Balay Diyus, kaibahan yi ti manga haramnuan para sa manga bagay ihinandug.

¹³ Tinudluan diman niya si Sulumun tungkul sa paggurupu sa manga manughandug ag manga Libita ag sa tanan pag buruwatun sa pagsirbi sa Balay Diyus Panginuun, katunda diman sa tanan kagamitan sa pagsirbi.

¹⁴ Nagtudlu diman siya nu kabitay kayamu pag pilak ag gintu ti gamitun sa pagbuwat sa inda pag manga kagamitan:

¹⁵ sa gintu pag manga sulul-an ag manga palaulian inda; sa pilak pag manga sulul-an ag manga palaulian inda;

¹⁶ sa gintu pag manga lamisa pagpaulian tinapay pag ihandug sa atubangan Diyus; sa pilak pag manga lamisa;

¹⁷ sa gintu pag manga panubuk daraka; sa gintu pag manga palanggana ag manga pitsil; sa gintu ag pilak pag manga pinggan;

¹⁸ ag sa gintu pag harandugan surunugan kamangyan. Tinudluan diman ni Dabid si Sulumun nu kabitay ti pagbuwat sa gintu kirubin magtaklub kanda manga pakpak sa tungud Kaban Kasunduan Panginuun.

¹⁹ Magkun si Hari Dabid, “Inda pag manga gayak isinurat angay sa paggiya Panginuun, ag pagtudluan niya aku nu kabitay inda tanan buwatun.”

²⁰ Magkun waydi si Dabid sa kay anak si Sulumun, “Pagpakarig-un kawu ag pagpakabaskug. Umpisahi yi ti pagbuwat. Danga kawu magkadala ngatay maglubay, dahil ti Panginuun Diyus, kang Diyus, kaibahan nimu. Unman kawu niya tayakan ngatay pabay-anan tugka matapus ti tanan pag buwat para sa Balay Diyus Panginuun.

²¹ Alistu yi ti gurupu manga manughandug ag manga Libita para sa tanan pag buwat sa Balay Diyus, ag may manga tawu waydi may manga kakayahan manarabahu sa una unu pag buruwatun alistu umawat sa kanmu. Ti manga may kangaranan ag ti tanan tawu alistu sa pagsunud sa kanmu.”