1 Krunika 27 - Hanunuu

Ti manga may Kangaranan pag manga Sundalu

¹ Imaw inda ti lista manga takinan, manga kumandir, ag manga may kangaranan sa manga Israilita magsirbi sa hari bilang manga magpamahala sa gurupu manga sundalu magsirbi sa usa ka bulan kada timpu. Ti kada gurupu may 24,000 ka sundalu.

² Si Hasubim anak ni Sabdiyil imaw ti kumandir manga sundalu sa un-an pag bulan. May 24,000 ka sundalu sa kay gurupu.

³ Linahi siya ni Paris ag takinan sa tanan magpamahala sa manga sundalu sa un-an pag bulan.

⁴ Si Duday linahi ni Ahuwa imaw ti kumandir manga sundalu sa ikadwa pag bulan. May 24,000 ka sundalu sa kay gurupu. Si Miklut imaw ti pinakaabwat niya pag may kangaranan sa kay gurupu.

⁵ Si Binaya anak ni Hihuyada manughandug imaw ti kumandir manga sundalu sa ikatlu pag bulan. May 24,000 ka sundalu sa kay gurupu.

⁶ Inda si Binaya imaw ti maisug pag takinan sa 30 ka maisug pag manga tawuhan ni Dabid. Kay anak si Amisabad imaw ti pinakaabwat niya pag may kangaranan sa kay gurupu.

⁷ Si Asahil kay patar-ari ni Huab imaw ti kumandir manga sundalu sa ikap-at pag bulan. Kay anak si Sibadyas imaw ti nag-ublus sa kanya. May 24,000 ka sundalu sa kay gurupu.

⁸ Si Samut linahi ni Isra imaw ti kumandir manga sundalu sa ikalima pag bulan. May 24,000 ka sundalu sa kay gurupu.

⁹ Si Ira anak ni Ikis taga Tikwa imaw ti kumandir manga sundalu sa ikan-um pag bulan. May 24,000 ka sundalu sa kay gurupu.

¹⁰ Si Hilis taga Pilun linahi ni Ipraim imaw ti kumandir manga sundalu sa ikapitu pag bulan. May 24,000 ka sundalu sa kay gurupu.

¹¹ Si Sibikay taga Husa linahi ni Sira imaw ti kumandir manga sundalu sa ikawalu pag bulan. May 24,000 ka sundalu sa kay gurupu.

¹² Si Abisir taga Anatut lahi ni Binhamin imaw ti kumandir manga sundalu sa ikasiyam pag bulan. May 24,000 ka sundalu sa kay gurupu.

¹³ Si Maharay taga Nitupa linahi ni Sira imaw ti kumandir manga sundalu sa ikasampu pag bulan. May 24,000 ka sundalu sa kay gurupu.

¹⁴ Si Binaya taga Piratun linahi ni Ipraim imaw ti kumandir manga sundalu sa ika-11 pag bulan. May 24,000 ka sundalu sa kay gurupu.

¹⁵ Si Hilday taga Nitupa linahi ni Utniyil imaw ti kumandir manga sundalu sa ika-12 pag bulan. May 24,000 ka sundalu sa kay gurupu.

Ti manga may Kangaranan sa manga Linahi Israil

¹⁶ Inda ti manga may kangaranan sa manga linahi Israil: Sa lahi ni Rubin: si Iliyisir anak ni Sikri. Sa lahi ni Simyun: si Sipatyas anak ni Maaka.

¹⁷ Sa lahi ni Libi: si Hasabiya anak ni Kimwil. Sa lahi ni Aarun: si Saduk.

¹⁸ Sa lahi ni Huda: si Ilihu kay patar-ari ni Dabid. Sa lahi ni Isakar: si Umri anak ni Mikail.

¹⁹ Sa lahi ni Sabulun: si Ismaya anak ni Ubadyas. Sa lahi ni Niptali: si Hirimut anak ni Asriil.

²⁰ Sa lahi ni Ipraim: si Husyas anak ni Asasya. Sa katunga lahi ni Manasis: si Huwil anak ni Pidaya.

²¹ Sa katunga waya gid pag lahi ni Manasis sa Gilyad: si Iddu anak ni Sakaryas. Sa lahi ni Binhamin: si Haasyil anak ni Abnir.

²² Sa lahi ni Dan: si Asaril anak ni Hiruham. Sida ti manga may kangaranan sa manga linahi Israil.

²³ Pagka sininsus ni Dabid ti manga tawu, unman niya ibinilang ti manga unman waya nagkaidad 20 ka timpu, dahil nagtaratu ti Panginuun payamuun gid niya ti manga Israilita parihu sa manga pamgasan sa langit.

²⁴ Inumpisahan ni Huab anak ni Siruya ti pagsinsus sa manga tawu dapat unman niya inda natapus dahil nagalit ti Diyus sa tunda pag sinsus. Nakan unman naibilang sa listahan ni Hari Dabid ti kabuuhan pag kayamuun manga Israilita.

Ti manga may Kangaranan sa Kaharian

²⁵ Si Asmabit anak ni Adyil imaw ti magpamahala sa manga haramnuan sa balay hari. Si Hunatan anak ni Usyas imaw ti magpamahala sa manga haramnuan sa manga distritu, manga banwa, manga baryu, ag sa manga bantayaw.

²⁶ Si Isri anak ni Kilub imaw ti magpamahala manga manugtarabahu sa tanman hari.

²⁷ Si Simiy taga Rama imaw ti magpamahala sa ubasan hari. Si Sabdi taga Sipam imaw ti magpamahala sa pruduktu ubas hanggan manga intus hari.

²⁸ Si Baal Hanan taga Gidir imaw ti magpamahala sa manga kayu ulibu ag sikumuru sa manga katagudtudan sa isalpan. Si Huas imaw ti takinan sa manga taraguan lana ulibu.

²⁹ Si Sitray taga Sarun imaw ti magpamahala sa manga baka magharab sa paraharaban sa Sarun. Si Sapat anak ni Adlay imaw ti magpamahala sa manga baka sa manga karatagan.

³⁰ Si Ubil Ismailita imaw ti magpamahala sa manga kamilyu. Si Hidiyas taga Mirunut imaw ti magpamahala sa manga asnu.

³¹ Si Hasis taga Hagriyu imaw ti magpamahala sa manga karanidu. Imaw inda sida tanan ti manga may kangaranan magpamahala sa manga kasiyunan ni Hari Dabid.

³² Si Hunatan kay bapa ni Hari Dabid imaw kay manugpaanyu. Usa siya ka matinudukun pag tawu ag manugsurat. Si Hiyil anak ni Hakmuni imaw ti manugtudlu sa manga anak hari.

³³ Si Ahitupil ti usa waya ka manugpaanyu sa hari. Si Husay Arkiyu arani pagkakilala hari.

³⁴ Pagka namatay si Ahitupil, inublusan siya ni Hihuyada (anak ni Binaya) ag ni Abyatar. Si Huab imaw ti kumandir manga sundalu hari.