1 Krunika 26 - Hanunuu

Ti manga Guwardiya manga Sabian Balay Diyus

¹ Imaw inda ti manga gurupu manga guwardiya manga sabian Balay Diyus: Ginan sa magtal-anakan ni Kura, si Misilimya anak ni Kuri miyimbru magtal-anakan ni Asap,

² ag ti pitu niya ka anak lalaki sida ni Sakaryas, ti panganay, bag-u si Hidyil, Sibadyas, Hatniyil,

³ Idam, Hihuhanan, ag Ilihunay.

⁴ Kaibahan diman si Ubid Idum hanggan ti walu niya ka manga anak lalaki sida ni Simaya, kay panganay, bag-u si Hihusabad, si Huwa, si Sakar, si Natanyil,

⁵ si Amiil, si Isakar, ag si Piyulitay. Pinapaladan Diyus si Ubid Idum.

⁶ Ti panganay anak ni Ubid Idum si Simaya may manga anak lalaki manga takinan manga magtal-anakan, dahil may manga kakayahan sida.

⁷ Imaw si Utni, Ripail, Ubid, ag Ilsabad. Ti kanda katawuhan si Ilihu ag si Simakya may manga kakayahan diman.

⁸ Sida tanan manga linahi ni Ubid Idum. Sida hanggan kanda manga anak ag manga katawuhan may kabisugan ag kakayahan manarabahu. Kanda kayamuun, 62 tanan.

⁹ Ti 18 ka manga anak ag manga katawuhan ni Misilimya may manga kakayahan diman.

¹⁰ Si Husa ginan sa magtal-anakan ni Mirari may manga anak diman. Binwat ni Husa si Simri pinagkatakinan nida magtal-anakan una balaw siya kay panganay pag anak.

¹¹ Ti ikadwa kan Simri imaw si Hilkiyas, ti ikatlu si Tibalya, ag ti ikap-at si Sakaryas. 13 tanan ti manga anak ag manga katawuhan ni Husa manga guwardiya sa sabian Balay Diyus.

¹² Ginurupu ti manga guwardiya manga sabian sa Balay Diyus angay sa takinan nida magtal-anakan, ag may manga katungdanan sida sa pagsirbi sa Balay Diyus Panginuun, parihu sa kanda kaparihu manga Libita.

¹³ Nanlunggungan sida nu naan pag sabian ti bantayan nida manga magtal-anakan, kalay-awan man ngatay gurangun.

¹⁴ Ti sa butlakan pag sabian nabunut ni Silimya, ag ti sa kanaway pag sabian nabunut niya anak si Sakaryas. Inda si Sakaryas madunung pag manugpaanyu.

¹⁵ Ti sa salatan pag sabian nabunut ni Ubid Idum, ag kay manga anak ipinabahala sa manga balay haramnuan.

¹⁶ Ti sa isalpan pag sabian ag ti sabian lakawan patungud sa Balay Diyus nabunut ni Supim ag ni Husa. May tagka udas sida sa pagbantay:

¹⁷ Sa butlakan unum ka guwardiya ti magbantay kada sirang, sa kanaway upat, sa salatan upat, ag sa kada balay haramnuan tig duwa.

¹⁸ Sa isalpan upat ti magbantay sa lakawan patungud sa Balay Diyus, ag duwa ti magbantay sa sugkadan sabian.

¹⁹ Tunda ngani sida ti gurupu manga guwardiya manga sabian Balay Diyus ti manga linahi ni Kura ag Mirari.

Ti manga Manughiyaput Kayamanan ag ti Iba waya pag manga may Kangaranan

²⁰ Ti iba ka Libita imaw ti piniyaran sa manga haramnuan sa Balay Diyus, kaibahan yi ti manga haramnuan manga bagay ihinandug sa Diyus.

²¹ Si Ladan lahi ni Girsun ag kay ama ni Yihili. Mayamu kay manga linahi ni Ladan, sida manga takinan diman nida linahi.

²² Kay manga anak ni Yihili si Sitam ag si Huwil imaw ti piniyaran sa manga haramnuan sa Balay Diyus Panginuun.

²³ Inda ti manga may kangaranan ginan sa manga linahi ni Amram, Isar, Hibrun, ag Usyil: Ginan sa manga linahi ni Amram:

²⁴ si Sibwil, linahi ni Girsum anak ni Muysis, imaw ti takinan may kangaranan sa manga haramnuan sa Balay Diyus.

²⁵ Kay manga katawuhan manga linahi ni Iliyisir sida ni Rihabyas, ni Hisayas, ni Huram, ni Sikri, ag ni Silumit.

²⁶ Si Silumit ag kay manga katawuhan imaw ti piniyaran sa tanan haramnuan manga ihinandug ni Hari Dabid, manga takinan manga magtal-anakan, manga kumandir sa manga linibu ag manga ginatus pag manga sundalu, ag sa iba waya pag manga kumandir.

²⁷ Isinagda nida ti iba pag nab-ul nida sa girahan hampay gamitun sa Balay Diyus Panginuun.

²⁸ Si Silumit waydi ag kay manga katawuhan ti nag-asikasu sa tanan pag ihinandug ni Purupita Samwil, ni Saul anak ni Kis, ni Abnir anak ni Nir, ag ni Huab anak ni Siruya. Ti iba waya pag manga ihinandug inasikasu diman nida.

²⁹ Ginan sa manga linahi ni Isar: si Kinanya ag kay manga anak lalaki, manga manuglista ag manga manughusay sa Israil. Unman sida magsirbi sa Balay Diyus.

³⁰ Ginan sa manga linahi ni Hibrun: si Hasabiya ag ti 1,700 niya pag manga katawuhan may manga kakayahan. Piniyaran sida sa pagpanguna sa manga daga sa isalpan Sapa Hurdan. Sida ti nag-asikasu sa manga buruwatun Panginuun ag sa hari sa tunda pag rugar.

³¹ Si Hirya ti takinan manga linahi ni Hibrun angay sa listahan sa kanda manga magtal-anakan. (Pagka ika-40 pag timpu kay maghari ni Dabid, inusisa ti manga listahan, ag naalaman may manga linahi si Hibrun sa Hasir sakup Gilyad, ag inda sida may manga kakayahan.)

³² Si Hirya may 2,700 ka katawuhan may manga kakayahan ag manga takinan manga magtal-anakan. Sida ti ipinamahala ni Hari Dabid sa manga lahi ni Rubin, ni Gad, ag sa katunga lahi ni Manasis. Ag sida ti nag-asikasu sa tanan pag buruwatun Diyus ag hari sa tunda pag manga rugar.