1 Krunika 24 - Hanunuu

Ti manga Buruwatun manga Manug-asiwa

¹ Inda ti manga gurupu manga lahi ni Aarun: Kay manga anak lalaki ni Aarun sida ni Nadab, ni Abihu, ni Iliyasar, ag ni Itamar.

² Dapat un-an namatay si Nadab ag si Abihu sa kanda ama, ag unman sida may manga anak; nakan ti nagsirbi bilang manga manughandug si Iliyasar ag si Itamar.

³ Sa awat ni Saduk kay linahi ni Iliyasar, ag ni Ahimilik kay linahi ni Itamar, ginurupu ni Hari Dabid ti manga lahi ni Aarun angay sa kanda katungdanan.

⁴ Kay manga linahi ni Iliyasar tinunga sa 16 ka gurupu ag kay manga linahi ni Itamar 8 ka gurupu, dahil subra mayamu ti manga takinan magtal-anakan sa manga linahi ni Iliyasar.

⁵ Ti tanan pag buruwatun inayaw ayaw sa manga gurupu sa panab-anan lunggungan hampay unman may pagpiliun. Nakan may manga may kangaranan sa Balay Diyus magsunud sa Diyus ginan sa manga linahi ni Iliyasar ag sa manga linahi ni Itamar.

⁶ Si Simaya anak ni Natanyil Libita imaw ti manugsurat. Ilinista niya ti manga ngaran manga manughandug sa atubangan hari ag manga may kangaranan sida ni manughandug Saduk, ni Ahimilik anak ni Abyatar, hanggan manga takinan manga magtal-anakan manga manughandug ag manga Libita. Sal-itan nanlunggungan ti manga linahi ni Iliyasar ag ni Itamar.

⁷ Ti kabag-u nabunut si Hihuyarib, ti ikadwa si Hidaya,

⁸ ti ikatlu si Harim, ti ikap-at si Siyurim,

⁹ ti ikalima si Malkiya, ti ikan-um si Miyamin,

¹⁰ ti ikapitu si Hakus, ti ikawalu si Abyas,

¹¹ ti ikasiyam si Hisuwa, ti ikasampu si Sikanyas,

¹² ti ika-11 si Ilyasib, ti ika-12 si Hakim,

¹³ ti ika-13 si Hupa, ti ika-14 si Hisibib,

¹⁴ ti ika-15 si Bilga, ti ika-16 si Imir,

¹⁵ ti ika-17 si Hisir, ti ika-18 si Hapisis,

¹⁶ ti ika-19 si Pitaya, ti ika-20 si Yihisikil,

¹⁷ ti ika-21 si Hakin, ti ika-22 si Gamul,

¹⁸ ti ika-23 si Dilaya, ag ti ika-24 si Maasiyas.

¹⁹ Inda sida nagbuwat kanda manga katungdanan sa Balay Diyus Panginuun angay sa surundanun ipinakaun nida ginurang si Aarun ginan sa Panginuun, ti Diyus Israil.

Ti manga Takinan manga Magtal-anakan manga Libita

²⁰ Imaw inda ti manga takinan manga magtal-anakan sa iba waya pag manga lahi ni Libi: Ginan sa manga linahi ni Amram: si Sibwil. Ginan sa manga linahi ni Sibwil: si Hidiyas.

²¹ Ginan sa manga linahi ni Rihabyas: si Isya, kay pinagkatakinan nida magtal-anakan.

²² Ginan sa manga linahi ni Isar: si Silumit. Ginan sa manga linahi ni Silumit: si Hahat.

²³ Ginan sa manga linahi ni Hibrun: si Hirya, kay pinagkatakinan nida magtal-anakan, si Amarya kay ikadwa, si Yahasyil kay ikatlu, ag si Hikamyan kay ikap-at.

²⁴ Ginan sa manga linahi ni Usyil: si Mikas. Ginan sa manga linahi ni Mikas: si Samir.

²⁵ Ginan sa manga linahi ni Isya patar-ari ni Mikas: si Sakaryas.

²⁶ Ginan sa manga lahi ni Mirari: si Mali ag si Musi. Ginan sa manga linahi ni Haasya: si Binu.

²⁷ Ginan sa manga lahi ni Mirari sa panab-anan ni Haasya: si Binu, Sulam, Sakur, ag Ibri.

²⁸ Ginan sa manga linahi ni Mali: si Iliyasar, ti unman may manga anak lalaki.

²⁹ Ginan sa manga linahi ni Kis: si Hiramiil.

³⁰ Ginan sa manga linahi ni Musi: si Mali, Idir, ag Hirimut. Imaw inda ti manga Libita angay sa kanda manga magtal-anakan.

³¹ Parihu sa binwat manga lahi ni Aarun, nanlunggungan waydi sida sa pag-alam sa kanda manga katungdanan, anak man ngatay gurangun. Binwat nida inda sa atubangan ni Hari Dabid, Saduk, Ahimilik, ag sa manga takinan manga magtal-anakan manga manughandug ag manga Libita.