1 Krunika 23 - Hanunuu

Ti Buwat manga Libita

¹ Pagka gurangun yi gid si Dabid, binwat niya hari Israil kay anak si Sulumun.

² Ipinatipun niya ti tanan takinan sa Israil, hanggan ti manga manughandug ag manga Libita.

³ Binilang ti manga Libita may idad 30 paabwat, ag kanda kayamuun 38,000.

⁴ Magkun si Dabid, “Ti 24,000 sa kanda pumanguna sa manga buruwatun sa Balay Diyus Panginuun, ti 6,000 magsirbi bilang manga may kangaranan ag manga manughusga,

⁵ ti 4,000 magsirbi bilang manga guwardiya sa manga sabian sa Balay Diyus, ag ti 4,000 waya gid magdayaw sa Panginuun sa panab-anan manga instrumintu ipinabwat niku para sa inda pag buruwatun.”

⁶ Inayaw ayaw ni Dabid sa tulu ka gurupu ti manga Libita, angay sa manga magtal-anakan manga anak ni Libi sida ni Girsun, Kuhat, ag Mirari.

Kay manga Linahi ni Girsun

⁷ Kay manga anak ni Girsun imaw si Ladan ag si Simiy.

⁸ Si Ladan may tulu ka anak lalaki sida ni Hiyil, ti pinagkatakinan nida magtal-anakan, bag-u si Sitam ag si Huwil.

⁹ Imaw inda sida ti manga takinan manga magtal-anakan ni Ladan. Si Simiy may tulu waydi ka anak lalaki sida ni Silumit, Hasyil, ag Haran.

^10-11 Sa uryan may upat waya ka anak lalaki si Simiy sida ni Hahat, ti pinagkatakinan nida magtal-anakan, si Sina kay ikadwa, bag-u si Hius ag si Birya. Pira-pira lang kay manga anak ni Hius ag Birya, nakan binilang sida usa lang ka magtal-anakan.

Kay manga Linahi ni Kuhat

¹² Si Kuhat may upat ka anak lalaki sida ni Amram, Isar, Hibrun, ag Usyil.

¹³ Kay manga anak lalaki ni Amram si Aarun ag si Muysis. Ipinablag si Aarun hanggan kay manga linahi para sa pagtalaga sa pinaka banal pag manga bagay, sa pagpakaun manga handug sa Panginuun, sa pagsirbi sa kanya, ag sa pagbasbas sa nasakupan niya ngaran. Imaw inda kanda katungkulan hanggan aban.

¹⁴ Kay manga anak lalaki ni Muysis manugsirbi Diyus nibilang sa manga Libita.

¹⁵ Kay manga anak lalaki si Girsum ag si Iliyisir.

¹⁶ Ti usa sa manga anak lalaki ni Girsum imaw si Sibwil ti pinagkatakinan nida magtal-anakan.

¹⁷ Si Iliyisir may usa lang ka anak lalaki si Rihabyas ti pinagkatakinan nida magtal-anakan. Mayamu gid kay manga linahi ni Rihabyas.

¹⁸ Kay usa sa kay manga anak lalaki ni Isar kay ngaran si Silumit kay pinagkatakinan nida magtal-anakan.

¹⁹ Kay manga anak lalaki ni Hibrun sida ni Hirya, ti pinagkatakinan nida magtal-anakan, si Amarya kay ikadwa, si Yahasyil kay ikatlu, ag si Hikamyam kay ikap-at.

²⁰ Kay manga anak lalaki ni Usyil si Mikas, ti pinagkatakinan nida magtal-anakan, ag si Isya kay ikadwa.

Kay manga Linahi ni Mirari

²¹ Kay manga anak lalaki ni Mirari si Mali ag si Musi. Kay manga anak lalaki ni Mali si Iliyasar ag si Kis.

²² Namatay si Iliyasar unman gid may anak lalaki nu unman manga babayi lang. Inda sida inasawa nida manga pinsan manga anak ni Kis.

²³ Si Musi may tulu ka anak lalaki sida ni Mali, Idir, ag Hirimut.

²⁴ Imaw inda sida ti manga lahi ni Libi angay sa manga takinan sa kanda manga magtal-anakan. Nisurat ti kada ngaran nida. Ti kada usa sa kanda kailangan may idad 20 ka timpu paabwat hampay makasirbi sa Balay Diyus Panginuun.

²⁵ Magkun si Dabid, “Pinakan-an kita Panginuun, ti Diyus Israil, kahusayan ag mangulianan siya sa Hirusalim tugka aban.

²⁶ Taynguna, balaw yi kailangan manga Libita daradarahun waya ti Turda Tiripnan hanggan ti manga kagamitan siyun.”

²⁷ Angay sa uryan pag sugu ni Dabid, ti tanan Libita nagkaidad 20 ka timpu paabwat ilinista hampay sumirbi.

²⁸ Ti katungdanan sa manga Libita imaw ti umawat sa manga manughandug manga lahi ni Aarun sa pagsirbi sa Balay Diyus Panginuun. Sida ti mangasikasu sa manga sugkadan Balay Diyus ag sa manga sulud-sulud sa suuk, ag sida diman ti mangawat sa manga tun-anun sa paglumpiyu ag sa iba waya pag buruwatun sa Balay Diyus.

²⁹ Sida diman ti piniyaran sa banal pag tinapay pag-ipauli sa lamisa, sa arina para sa manga handug pamakaun, sa tinapay unman may pamadaka, ag sa iba waya pag pagtamaun ag panlakay. Sida diman ti piniyaran sa pagkilu ag sa pagsukat sa tanan handug.

³⁰ Kanda diman katungdanan ti magtindug kada surip ag kada yabi sa Balay Diyus sa pagpasalamat ag sa pagdayaw sa Panginuun.

³¹ Sida diman ti mangawat sa pagsagda sa Panginuun manga handug pagsunugun sa manga Sirang Pamahari, sa Pista Lapuslati, ag sa iba waya pag manga pista. May manga surundanun nu pira ka Libita ti bumuwat inda pag buruwatun ag nu kabitay nida inda tupadun.

³² Nakan binwat manga Libita kanda katungkulan sa pag-asikasu sa Turda Taragbuan ag sa Banal pag Sulud-sulud, hanggan sa pag-awat sa kanda manga katawuhan manga manughandug kay lahi ni Aarun sa pagsirbi sa Balay Diyus Panginuun.