1 Krunika 21 - Hanunuu

Sininsus ni Dabid Kay manga Sundalu

¹ Linabanan ni Satanas ti Israil, nakan inudyukan niya si Dabid kuntay isinsus ti manga Israilita.

² Nakan magkun si Dabid sa kan Huab ag sa manga kumandir manga sundalu, “Hinan kamu, bilanga niyu ti manga Israilita ginan sa Biirsiba tugka sa Dan. Bag-u pagbalik kamu sitay hampay maalaman niku nu pira sida tanan.”

³ Dapat nagsagut si Huab, “Mana payamuun Panginuun kanmu nasakupan may 100 ka dubli. Dapat, Mahal Hari, hayga gustu nimu buwatun inda pag bagay? Balaw aw lugud manga sakup nimu sida? Bati, hayga dalahigun nimu sida sa kanmu buwatun kasalanan?”

⁴ Dapat magpilit gid si Dabid, nakan pinalibut ni Huab ti buu Israil, ag rargu nagbalik sa Hirusalim.

⁵ Itinultul niya sa kan Dabid ti kayamuan manga lalaki may kakayahan man-gira: 1,100,000 sa Israil ag 470,000 sa Huda.

⁶ Dapat unman imininsan ni Huab sa kay nagbilang ti lahi ni Libi ag ni Binhamin dahil magkauyamut siya sa sugu hari.

⁷ Balaw diman magbaya ti Diyus sa siyun pagsugu ni Dabid, nakan pinarusahan niya ti Israil.

⁸ Bag-u nagbagaw si Dabid sa Diyus, “Nagsalan gid aku sa kang binwat. Nakan magpaawa-awa aku sa kanmu, Panginuun, patawada nimu aku kanmu manugsirbi sa kang kasalanan, dahil kalukuhan gid kang binwat.”

⁹ Magkun ti Panginuun sa kan Gad purupita ni Dabid,

¹⁰ “Pag-atag kawu sa kan Dabid ag papilia siya nu naan sa tulu ka parusa kay gustu niya buwatun niku sa kanya.”

¹¹ Nakan nag-atag si Gad kan Dabid ag magkun sa kanya, “Naan inda sa tulu ti gustu nimu:

¹² Tulu ka timpu taglun-us, tulu ka bulan pagruris sa kanyu niyu manga kalaban, ngatay tulu ka sirang sarut ginan sa Panginuun sa panab-anan pagdaut anghil Panginuun sa buu daga Israil. Pagdisisyun kawu ag paalami aku nu unu ti isagut niku sa Panginuun ti nagpadara sa kangku.”

¹³ Nagsagut si Dabid kan Gad, “Magkakurian gid aku magpili. Mayad waya ti Panginuun yi lang ti pumarusa sa kangku kaysa manga tawu, dahil maawaun gid ti Panginuun.”

¹⁴ Nakan nagpadara ti Panginuun sarut sa Israil, ag 70,000 ka Israilita ti namatay.

¹⁵ Bag-u nagpadara ti Diyus anghil sa pagruris sa Hirusalim. Dapat habang pagrurisun anghil ti Hirusalim, nagbag-u ti kaisipan Panginuun sa pagparusa sa manga tawu. Nakan magkun siya sa anghil magruris sa manga tawu, “Kang-ud yi! Danga yi sida pagparusahi.” Sa ati pag udas matindugan ti anghil Panginuun sa may giriukan ni Arauna Hibusiyu.

¹⁶ Nagtangda si Dabid ag nakitan niya ti anghil Panginuun matindugan sa pawa, sa karaw-an langit ag daga may paghiyaptan baladaw matudluan sa Hirusalim. Bag-u nagluhud si Dabid hanggan ti manga manugpamahala Israil, may sulung saku sa pagpakakit sa kanda karukuan.

¹⁷ Magkun si Dabid sa Diyus, “Aku ti nagsugu kuntay isinsus ti manga tawu. Aku ti nagsalan. Inda pag manga tawu unman may alam parihu sa manga karanidu. Unman sida may nabwat kasalanan. Ungud Panginuun niku Diyus, aku yi lang ag kang magtal-anakan ti parusahi. Danga pagpakuriani kanmu nasakupan sa inda pag sarut.”

¹⁸ Bag-u sinugu anghil Panginuun si Gad hampay sabihun kan Dabid kuntay pag-atag siya sa giriukan ni Arauna Hibusiyu ag pagbuwat ati harandugan para sa Panginuun.

¹⁹ Nakan nag-atag si Dabid angay sa isinugu Panginuun sa panab-anan ni Gad.

²⁰ Sa ati katpung pag udas maggiuk si Arauna ag kay upat ka anak lalaki sa tirigu. Ag pagka nakitan nida ti anghil Panginuun, nalagiw ti upat ka anak ni Arauna ag nanpatagu.

²¹ Bag-u nakitan ni Arauna magpakarani si Dabid. Nakan inmighit siya sa giriukan ag nagluhud sa atubangan ni Dabid bilang paggalang sa kanya.

²² Magkun si Dabid sa kanya, “Pabilyan sa kangku kanmu giriukan dahil pumatindug aku harandugan para sa Panginuun, hampay umapas yi ti sarut sa manga tawu. Bayadan niku kawu nu pira gid kay bili.”

²³ Magkun si Arauna kan Dabid, “Sigi, bul-a, Mahal Hari. Buwata nu unu ti mayad sa kanmu. Pakan-an waya niku kawu baka hampay ihandug bilang handug pagsunugun, manga kayu paggamitun sa paggiuk hampay igatung, ag tirigu hampay ihandug bilang handug pasalamat. Hu, iayaw niku inda tanan sa kanmu libri.”

²⁴ Dapat nagsagut si Hari Dabid kan Arauna, “Balaw niku inda tanggapun libri. Bayadan niku kawu nu pira kay bili siti. Balaw niku mahimu bul-un lang tunda sa kanmu ag ihandug sa Panginuun. Unman aku maghandug handug pagsunugun balaw niku binili.”

²⁵ Nakan binayadan ni Dabid si Arauna 600 ka bilug gintu para sa ati pag rugar.

²⁶ Bag-u nagbuwat siya ati harandugan para sa Panginuun ag nansagda manga handug pag sunugun ag manga handug para sa mayad pag pakiusa. Ag rargu nandarangin siya. Sinagut siya Panginuun sa panab-anan pagpadara apuy ginan sa langit hampay sunugun ti manga handug sa harandugan.

²⁷ Bag-u magkun ti Panginuun sa anghil suulan niya kay baladaw sa kaluban.

²⁸ Pagka nakitan ni Dabid sinagut Panginuun kay darangin, nansagda waya gid siya manga handug ati sa giriukan ni Arauna Hibusiyu.

²⁹ Sa ati pag udas, ti Turda Panginuun ag ti harandugan para sa manga handug surunugun ipinabwat ni Muysis sa pangawakawaan asan sa abwat pag rugar sa Gibyun.

³⁰ Dapat balaw nag-atag si Dabid hampay mamaingana sa Diyus, dahil magkadala siya sa baladaw anghil Panginuun.