1 Krunika 20 - Hanunuu

Naagaw ni Dabid ti Raba

¹ Katpung udas maglakaw ti manga hari agud man-gira, pinangunahan ni Huab ti manga sundalu sa paglaban. Si Dabid inda napatayak sa Hirusalim. Winayak nida ni Huab ti daga manga Amunita. Bag-u pinalibutan nida ti Raba tugka sa naruris nida.

² Nag-atag si Dabid sa Raba, ag bin-ul niya ti gintu pag kuruna sa ulu hari manga Amunita ag ipinauli sa kay ulu. Kay buyat kuruna manga 35 ka kilu ag may mahalaga inda manga batu. Mayamu pag manga kasiyunan ti nabuul ni Dabid sa ati pag banwa.

³ Binwat niya panawuhun ti manga mag-uli sitay ag ipinatarabahu gamit ti lagari, piku, ag wasay. Imaw inda kay binwat ni Dabid sa manga mag-uli sa tanan banwa manga Amunita. Bag-u nuli si Dabid hanggan ti tanan niya manga sundalu sa Hirusalim.

Ti Girahan Laban sa manga Pilistiyu

⁴ Igu dugay, nanlalabanan maan ti manga Pilistiyu ag manga Israilita, ati inda pag nangyari sa Gisir. Sa inda pag girahan minatay ni Sibikay taga Husa si Sipay, usa sa manga linahi manga Rapa. Ag talu ti manga Pilistiyu.

⁵ Sa usa waya nida pag girahan, minatay ni Ilhanan kay anak ni Dair si Lami kay patar-ari ni Gulyat taga Gat. Ti bangkaw ni Lami mabuyat ag madamul.

⁶ Nanlalabanan waya gid maan ti manga Pilistiyu ag manga Israilita, ati inda pag nangyari sa Gat. Sa inda pag girahan, may tawu masyadu gid daka, may unum ka ituturu ti kada niya kamang ag lulud. Usa diman siya sa manga linahi manga Rapa.

⁷ Pagka pagpuyaan niya ti manga Israilita, minatay siya ni Hunatan kay anak patar-ari ni Dabid si Simya.

⁸ Tunda pag manga Pilistiyu manga linahi manga Rapa taga Gat. Pinanmatay sida ni Dabid ag niya manga tawuhan.