1 Krunika 19 - Hanunuu

Tinalu ni Dabid ti Amunita hanggan ti Aramiyu

¹ Pagkadugay, namatay si Nahas ti hari manga Amunita. Ag kay anak si Hanun imaw ti kailis niya bilang hari.

² Magkun si Dabid, “Pakakitan niku kaayadan si Hanun dahil mayad kay ama sa kangku.” Nakan nagpadara si Dabid manga may kangaranan agud ipakakit kay magpakidamay sa kan Hanun dahil sa pagkamatay niya ama. Dapat pagka nagras-ug ti manga may kangaranan ni Dabid kan Hanun ati sa daga manga Amunita,

³ magkun ti manga may kangaranan manga Amunita sa kan Hanun, “Mag-isip aw lugud kawu kuntay pag-alalahanun ni Dabid kanmu ama sa panab-anan pagpadara sa manga tawu magpakidamay sa kanmu kakurian? Balaw aw nguna nag-ataytag sida hampay pabantayan kanta daga ag ipadamhak inda?”

⁴ Nakan ipinadakup ni Hanun kay manga tawuhan ni Dabid ag kinidkid kanda manga bungut. Tinastas diman niya kanda manga rutay ginan sa awak tugka sa sirung bag-u rargu pinauli sida.

⁵ Magkay-a gid sida muli. Pagka nabaritaan ni Dabid ti nangyari sa kay manga tawuhan, nagpadara siya manga manugbarita hampay sabihan kay manga tawuhan kuntay pumirmaminti lang dapu sida sa Hiriku tugka sa tumubu kanda manga bungut, ag rargu makauli yi sida.

⁶ Naisip manga Amunita kuntay ginalit gid nida si Dabid. Nakan nagbayad sida manga 35 ka tunilada pilak hampay arkilahun ti kalisa ag manga manugkalisa Aram Naharaim, Aram Maaka, ag Suba.

⁷ Ti kayamuun manga kalisa ag manga manugkalisa 32,000. Kinmuyug diman sa kanda ti hari Maaka ag kay manga sundalu. Nagkampu inda pag manga gurupu arani sa Midiba. Linmuwang waydi ti manga Amunita sa kanda manga banwa ag nag-alistu sa paglaban.

⁸ Pagka nadnugan inda ni Dabid, ipinadara niya si Huab ag kay tanan maisug pag manga sundalu sa paglaban.

⁹ Nanharatayan ti manga Amunita sa paglaban sa may sabian nida banwa, hanggan ti manga hari kinmuyug sa kanda nanharatayan diman sa karatagan.

¹⁰ Pagka nakitan ni Huab may manga kalaban sa kay atubangan ag dayu, nagpili siya kay pinakamayad pag manga sundalu Israil, ag pagpangunahan niya sida sa paglaban sa manga Aramiyu.

¹¹ Ti nasawad pag manga sundalu ipinadumara niya sa kan Abisay kay patar-ari sa paglaban sa manga Amunita.

¹² Magkun si Huab kan Abisay, “Nu makitan nimu ga magkatalu yi kami manga Aramiyu, awatan niyu kami, ag nu kamu waydi ti ga magkatalu yi manga Amunita awatan nimi kamu.

¹³ Pagpakarig-un kita! Manggira kita may isug para sa kanta nasakupan ag sa manga banwa nita Diyus. Buwatun Panginuun nu unu ti mayad para sa kanya.”

¹⁴ Bag-u naggira si Huab kaibahan kay manga tawuhan, ag nagpinalalagiw ti manga Aramiyu sa kanda.

¹⁵ Pagka nakitan manga Amunita magpalagiw ti manga Aramiyu, nanpalagiw waydi sida kan Abisay kay patar-ari ni Huab, ag nagsulud sa kanda banwa. Nakan nuli sida ni Huab sa Hirusalim.

¹⁶ Pagka naisip manga Aramiyu talu sida manga Israilita, nagpadara sida manga manugbarita tabug sa manga kaibahan nida manga Aramiyu ati sa dipay Sapa Iyupratis hampay sabihan kuntay awati sida. Ati pag gurupu pagpanguluhan ni Supak, imaw ti kumandir manga sundalu ni Hadadisir.

¹⁷ Pagka naalaman inda ni Dabid, ipinatipun niya ti tanan sundalu Israil sa paglaban. Bag-u nagdipay sida sa Sapa Hurdan ag napauli masranguhan sa manga Aramiyu, nanlalabanan sida.

¹⁸ Dapat namalalagiwan ti manga Aramiyu sa manga Israilita. Nakamatay sida ni Dabid 7,000 manugkalisa ag 40,000 sundalu malakawan lang. Minatay diman nida si Supak, ti kumandir manga sundalu.

¹⁹ Pagka nakitan manga sakup ni Hadadisir talu yi sida manga Israilita, nakipagkaibigan sida kan Dabid ag napasakup sa kanya. Nakan ginan kaybi balaw yi mag-awat ti manga Aramiyu sa manga Amunita.