1 Krunika 18 - Hanunuu

Ti manga Pagpanalu ni Dabid

¹ Pagka sa uryan, natalu ni Dabid ti manga Pilistiyu, ag sinakup niya sida. Naagaw niya sa kanda ti Gat ag ti manga baryu sa sangput inda.

² Natalu diman ni Dabid ti manga Muabita, ag sinakup niya sida ag nagbayad sida buwis sa kanya.

³ Nanlaban diman si Dabid kan Hari Hadadisir taga Suba, tugka sa Hamat, pagka naglakaw si Hadadisir hampay sakupun ti manga daga arani sa Sapa Iyupratis.

⁴ Naagaw nida ni Dabid ti 1,000 niya ka kalisa, 7,000 ka manugkalisa, hanggan ti 20,000 ka sundalu. Pinamiang nida ni Dabid ti manga kabayu magguyud manga kalisa purya lang sa 100 sinawadan nida hampay kanda gamitun.

⁵ Pagka nagras-ug ti manga Aramiyu ginan sa Damasku hampay umawat kan Hadadisir, minatay nida ni Dabid ti 22,000 sa kanda.

⁶ Nagpauli rargu si Dabid manga kampu sa Damasku, rugar manga Aramiyu. Ag nagbaliw sakup niya sida, ag nagbayad sida buwis sa kanya. Ipinanalu Panginuun si Dabid, una naan tag siya maglakaw sa paglaban.

⁷ Bin-ul ni Dabid ti gintu pag manga panangga ginan sa manga may kangaranan ni Hadadisir, ag dinara inda sa Hirusalim.

⁸ Bin-ul diman niya ti mayamu pag manga galang sa Tiba ag Kun, ti manga banwa sakup ni Hadadisir. Inda pag manga galang ginamit pagka sa uryan ni Sulumun sa pagbuwat sa daka pag palaulian danum ga kawa pag-ingarnan Dagat, manga tulduk, ag manga kagamitan galang para gamitun sa Balay Diyus.

⁹ Taynguna, nabaritaan ni Hari Tuu sa Hamat kuntay tinalu ni Dabid ti buu sundalu ni Hari Hadadisir sa Suba.

¹⁰ Nakan ipinaatag niya kay anak si Haduram kan Hari Dabid hampay kamustahun ag hampay kilalan-un kay pagpanalu niya kan Hadadisir. (Inda si Tuu ag si Hadadisir magpakalalabanan ginan waya kaybi.) Nagdara si Haduram manga pamakaun binwat ginan sa gintu, pilak, ag galang.

¹¹ Isinagda inda ni Hari Dabid sa Panginuun, parihu sa kay binwat sa manga pilak ag gintu kay inagaw ginan sa iba pag manga nasyun kay tinalu — ti Idum, Muab, Amun, Pilistiya, ag Amalik.

¹² Si Abisay anak ni Siruya nakamatay 18,000 ka Idumita sa karatagan pag ingarnan Asin.

¹³ Nagpauli rargu si Dabid manga kampu sa Idum, ag nasakup niya ti tanan Idumita. Ipinanalu Panginuun si Dabid una naan tag siya pag mag-atag agud gumira.

Ti manga may Kangaranan ni Dabid

¹⁴ Naghari si Dabid sa buu Israil, magbuwat sa matadlung ag hustu hampay sa tanan niya nasakupan.

¹⁵ Ti magpanguna sa kay manga sundalu si Huab kay anak ni Siruya. Ti takinan sa manga kasuratan kaharian imaw si Husapat kay anak ni Ahilud.

¹⁶ Ti manga takinan manughandug si Saduk kay anak ni Ahitub ag si Ahimilik kay anak ni Abyatar. Ti manugsurat si Sabsa.

¹⁷ Si Binaya kay anak ni Hihuyada imaw ti takinan manga alalay ni Dabid manga Kiritiyu ag manga Pilitiyu. Ag ti manga takinan manga may kangaranan ni Dabid imaw kay manga anak lalaki.