1 Krunika 17 - Hanunuu

Ti Taratu Diyus sa kan Dabid

¹ Pagka si Hari Dabid ati yi mag-uli sa kay balay hari, magkun siya kan Purupita Natan, “Inda aku mag-uli sa marinu pag balay hari binwat ginan sa kayu sidru, dapat ti Kaban Kasunduan Panginuun asan lang sa turda.”

² Nagsagut si Natan kan Dabid, “Buwata ti kanmu pagkaibgan buwatun, dahil ti Diyus mag-iba sa kanmu.”

³ Dapat sa tunda katpung pag yabi magkun ti Diyus sa kan Natan,

⁴ “Hinan, sabihi kang manugsirbi si Dabid kuntay imaw inda ti kang pagsabihun: ‘Balaw kawu ti pumatindug Balay Diyus ulianan niku.

⁵ Udwaya aku nakaulian sa Balay Diyus ginan sa ipinalwas niku ti manga Israilita sa Ihiptu tugka kainda. Pahalin-halin kang pag-ulian Turda.

⁶ Sa kang pahalin-halin kaibahan kang nasakupan manga Israilita, unman aku magriklamu sa kanda manga takinan imaw ti kang sinugu sa pag-arigru sa kanda unman nida aku pinatindugan marinu pag Balay Diyus binwat ginan sa kayu sidru.’ ”

⁷ “Sabihi waya gid si Dabid kuntay aku, ti Panginuun Makamaskihan, magkumun, ‘Sa kabag-u manugbantay kawu sa manga karanidu, dapat pinili niku kawu manugpanguna sa kang nasakupan manga Israilita.

⁸ Inibahan niku kawu una naan tag kawu nag-atag, ag ipinatalu niku sa kanmu ti tanan nimu kalaban. Kainda, pabantugun niku kawu parihu sa iba pag bantug pag manga tawu sa kalibutan.

⁹ Pinakan-an yi niku pirmaminti pag rugar kang nasakupan manga Israilita. May sadili yi sida ulian ag unman yi may bumalag sa kanda. Balaw yi sida apihun manga daut pag tawu parihu sa kabag-u,

¹⁰ ginan sa udas nagpauli aku manga takinan sa kang nasakupan manga Israilita. Taluhun diman niku ti tanan nimu kalaban. Aku, ti Panginuun, magsabi sa kanmu kuntay humari pirmi ti usa sa kanmu manga linahi.

¹¹ Nu mamatay yi kawu ag ilbung kaibahan kanmu manga ginurang, paublusun niku sa kanmu ti usa sa kanmu manga anak, ag parig-unun niku kay kaharian.

¹² Siya ti pumatindug Balay Diyus para sa kangku, ag siguraduhun niku kay manga linahi imaw ti humari tugka aban.

¹³ Kilalan-un niya aku ama ag kilalan-un niku siya anak. Kang pagmahal pumirmaminti sa kanya, balaw parihu sa kang binwat sa kan Saul kanmu inilisan pag hari.

¹⁴ Pamahalaun niku siya sa kang nasakupan hanggan kaharian, ag kay manga linahi humari tugka aban.’ ”

¹⁵ Itinultul ni Natan sa kan Dabid ti tanan ipinaburayhaw Diyus sa kanya.

Ti Darangin ni Dabid

¹⁶ Bag-u nagsulud si Hari Dabid sa Turda nu naan asan ti Kaban Kasunduan. Tinmukaw siya ati sa atubangan Panginuun ag nandarangin, “Panginuun Diyus, si unu gid lugud aku ag kang magtal-anakan pagpapaladan nimu aku parihu sa kainda?

¹⁷ Taynguna, Diyus, may taratu waya gid kawu tungkul sa aratubangun niku magtal-anakan. Kinilala nimu aku ga mahalaga pag tawu. Panginuun Diyus,

¹⁸ hintay waya lugud kang masabi sa kanmu tungkul sa kanmu pagkilala sa kangku? Dahil alam di waydi nimu nu si unu gid aku kanmu manugsirbi.

¹⁹ Panginuun, dahil sa kangku, sa kanmu manugsirbi, ag angay sa kanmu kagustuhan, binwat nimu inda pag daraka manga bagay ag ipinaalam sa kangku.

²⁰ Unman gid may pumarihu sa kanmu, Panginuun, ag unman yi may tuhay waya pag Diyus purya sa kanmu. Unman kami may nasaydan kuntay may diyus parihu sa kanmu.

²¹ Ag unman yi may pumarihu sa kanmu nasakupan Israilita. Imaw lang inda pag nasyun sa kalibutan kanmu ipinalwas sa pagkapanawuhun hampay bumaliw kanmu nasakupan. Nibantug kawu dahil sa makamaskihan ag makadululaw pag manga bagay kanmu binwat katpung pinaighit nimu ti manga nasyun sa panab-anan nimu ipinalwas pag nasakupan sa Ihiptu.

²² Binwat nimu ti manga Israilita kanmu nasakupan unman may katapusan, ag kawu, Panginuun, nagbaliw kanda Diyus.

^23-24 “Ag kainda, Panginuun, tupada kanmu taratu sa kangku, sa kanmu manugsirbi, ag sa kang magtal-anakan, hampay matupad inda ag hampay bumaliw bantug kawu sa unman may katapusan. Dahil sumabi ti manga tawu, ‘Ti Panginuun Makamaskihan pag Diyus Israil.’ Ag kang magtal-anakan pumarargu sa pagsirbi sa kanmu hanggan aban.

²⁵ May panindugan aku mandarangin kaindaay sa kanmu kang Diyus, dahil ipinaburayhaw nimu sa kangku, sa kanmu manugsirbi, kuntay humari pirmi ti usa sa kang manga linahi.

²⁶ “Ungud Panginuun, tutuu kawu pag Diyus. Itinaratu nimu inda pag marinu manga bagay sa kangku, sa kanmu manugsirbi.

²⁷ Ag kainda magbaya kawu magpapalad sa kang magtal-anakan hampay pumarargu inda tugka aban sa kanmu atubangan. Dahil nu magpapalad kawu Panginuun, kanmu papalad unman may katapusan.”