1 Krunika 15 - Hanunuu

Ti Paghanda sa Pagbuul Kaban Kasunduan

¹ Nagpatindug si Dabid manga balay arabwat para sa kay sadili ati sa kay banwa. Nagbuwat diman siya turda para sa Kaban Diyus ag ipinauli niya inda sa rugar niya iinalistu para sa inda.

² Bag-u magkun si Dabid, “Unman may dumara sa Kaban nu ud sa manga Libita, dahil pinili sida Panginuun mandara sa Kaban Panginuun ag sumirbi sa kay atubangan tugka aban.”

³ Tinipun ni Dabid ti tanan Israilita sa Hirusalim hampay mandara sa Kaban Panginuun sa rugar kay iinalistu para sa inda.

⁴ Ipinatawag diman niya ti manga lahi ni Aarun, imaw ti manga manughandug ag manga Libita, kainda kay kayamu sida:

⁵ Ginan sa manga linahi ni Kura, 120, ag pagpangunahan sida ni Uryil.

⁶ Ginan sa manga lahi ni Mirari, 220, ag pagpangunahan sida ni Asaya.

⁷ Ginan sa manga lahi ni Girsun, 130, ag pagpangunahan sida ni Huwil.

⁸ Ginan sa manga linahi ni Ilisapan, 200, ag pagpangunahan sida ni Simaya.

⁹ Ginan sa manga linahi ni Hibrun, 80, ag pagpangunahan sida ni Ilyil.

¹⁰ Ginan sa manga linahi ni Usyil, 112, ag pagpangunahan sida ni Aminadab.

¹¹ Bag-u ipinatawag ni Dabid si Saduk ag si Abyatar ti manga manughandug, ag ti manga Libita sida ni Uryil, Asaya, Huwil, Simaya, Ilyil, ag Aminadab.

¹² Magkun siya sa kanda, “Kamu ti manga takinan manga magtal-anakan manga lahi ni Libi. Pagmalumpiyu kamu ag ti kanyu kaparihu manga lahi ni Libi, hampay madara niyu ti Kaban Panginuun, ti Diyus Israil, sa rugar iinalistu niku para sa inda.

¹³ Dahil balaw kamu ti nagdara sa Kaban Kasunduan kaybi sa un-an pag timpu, pinarusahan kita Panginuun nita Diyus sa kay pangagalit. Unman kita nagpaingana sa Panginuun nu kabitay inda darahun sa kang-ud pag kagustuhan.”

¹⁴ Nakan naglumpiyu ti manga manughandug ag ti manga Libita hampay madara nida ti Kaban Panginuun, ti Diyus Israil.

¹⁵ Ag dinara nida ti Kaban Diyus sa panab-anan yayungan, angay sa isinugu Panginuun sa kan Muysis.

¹⁶ Sinugu ni Dabid ti manga takinan manga Libita hampay pumili manga manugkanta ginan sa kanda kaparihu manga Libita, sa pagkanta manga masulung pag manga karantahun pag kaskasan manga lira, alpa, ag manga simbals.

¹⁷ Nakan pinili manga Libita si Himan anak ni Huwil, si Asap anak ni Birikyas, ag si Itan anak ni Kusaya kay lahi ni Mirari.

¹⁸ Ti pinili mangawat sa kanda imaw ti kanda manga katawuhan sida ni Sakaryas, Hasyil, Simiramut, Hiyil, Uni, Ilyab, Binaya, Maasiyas, Matitiya, Ilipilihu, Mikniya, ag ti manga guwardiya sa sabian Turda sida ni Ubid Idum ag Yiil.

¹⁹ Ti piniyaran sa pagpatnug sa manga galang pag simbals imaw sida ni Himan, Asap, ag Itan.

²⁰ Ti piniyaran sa pagpatnug sa manga lira sa abwat pag tunug imaw sida ni Sakaryas, Asyil, Simiramut, Hiyil, Uni, Ilyab, Maasiyas, ag Binaya.

²¹ Ti piniyaran sa pagpatnug sa manga alpa sa ababa pag tunug sida ni Matitiya, Ilipilihu, Mikniya, Ubid Idum, Yiil, ag Asasya.

²² Ti piniyaran sa tagapanguna sa pagkanta imaw si Kinanya takinan Libita, dahil marinu siya magkanta.

²³ Ti piniyaran sa pagbantay sa Kaban Kasunduan si Birikyas ag si Ilkana.

²⁴ Ti piniyaran sa pagpatunug turumpita sa atubangan Kaban Diyus ti manga manughandug sida ni Sibanyas, ni Husapat, ni Natanyil, ni Amasay, ni Sakaryas, ni Binaya, ag ni Iliyisir. Si Ubid Idum ag si Hiyas manga manugbantay diman sa Kaban Kasunduan.

Dinara sa Hirusalim ti Kaban Kasunduan

²⁵ Nakan masulung nag-ati si Dabid, hanggan ti manga manugpanguna sa Israil, ag ti manga kumandir sa linibu manga sundalu atag sa balay ni Ubid Idum sa pagbuul sa Kaban Kasunduan Panginuun.

²⁶ Ag dahil inawatan Diyus ti manga Libita katpung dinara nida ti Kaban Kasunduan Panginuun, nansagda sida pitu ka tudu baka ag pitu ka karanidu.

²⁷ Si Dabid nagsulung sadsad pag rutay linu hanggan ti tanan Libita magdara sa Kaban Kasunduan, ti manga manugkanta, ag si Kinanya imaw ti piniyaran sa magpanguna sa pagkanta. Nakasulung diman si Dabid ipud human sa linu.

²⁸ Nakan dinara tanan Israilita ti Kaban Kasunduan Panginuun may huruyawan, pagpatunug sa manga turumpita, manga budyung ag manga simbals, ag pagpatnug sa manga lira ag manga alpa.

²⁹ Pagka magpaslud yi ti Kaban Kasunduan Panginuun sa Banwa ni Dabid, namantay si Mikul anak ni Saul sa gaha. Ag pagka nakitan niya si Hari Dabid magsayaw sa kabayaan, pagkadat-an niya siya.