1 Krunika 14 - Hanunuu

Ti Magtal-anakan ni Dabid

¹ Kainda nagpadara si Hari Hiram taga Tiru manga manugbarita kan Dabid kaibahan ti manga panday ag manga masun, hanggan ti manga pinlud kayu sidru, hampay patindugan si Dabid balay hari.

² Ag naalaman ni Dabid kuntay ti Panginuun ti nagpauli sa kanya bilang hari sa Israil ag nagpaabunda sa kay kaharian para sa kay nasakupan manga Israilita.

³ Ati sa Hirusalim, mayamu waya gid ti inasawa ni Dabid, ag nadugangan waya gid kay manga anak.

⁴ Imaw inda kay manga ngaran niya manga anak lalaki ilinusad ati: Samwa, Subab, Natan, Sulumun,

⁵ Ibar, Iliswa, Ilipilit,

⁶ Nuga, Nipig, Hapya,

⁷ Ilisama, Bilyada, ag Ilipilit.

Tinalu ni Dabid ti manga Pilistiyu

⁸ Pagka nabaritaan manga Pilistiyu kuntay si Dabid ti pinili pag hari sa buu Israil, tinipun nida ti tanan nida manga sundalu sa pagdakup sa kanya. Dapat nabaritaan tunda ni Dabid, ag naglakaw siya sa pagsulang sa kanda.

⁹ Taynguna, ginira manga Pilistiyu ti Karatagan Ripaim.

¹⁰ Nakan nagpaingana si Dabid sa Diyus, “Girahun aw lugud nimi ti manga Pilistiyu? Ipatalu aw lugud nimu sida sa kanmi?” Nagsagut ti Panginuun sa kanya, “Hu, hinan kamu, dahil ipatalu gid niku sida sa kanyu.”

¹¹ Nakan nag-atag si Dabid ag kay manga tawuhan sa Baal Pirasim, ag ati tinalu nida ti manga Pilistiyu. Bag-u magkun si Dabid, “Rinuris Diyus kang manga kalaban ga sinalakay magpaywas baha, ag ginamit niya aku sa pagruris sa kanda.” Imaw tunda nu hayga iningarnan tunda pag rugar Baal Pirasim.

¹² Tinayakan manga Pilistiyu kanda manga diyus-diyusan ati, ag nagsugu si Dabid kuntay sunuga inda.

¹³ Ginira maan manga Pilistiyu ti Karatagan Ripaim.

¹⁴ Nakan nagpaingana maan si Dabid sa Diyus, ag nagsagut ti Diyus sa kanya, “Danga kamu kadaka maggira sa kanda nu unman sangputi dap niyu sida bag-u di giraha arani sa manga kayu balsam.

¹⁵ Nu masaydan niyu ti ga tagalpak lulud manga sundalu sa tungud baliwa manga kayu balsam, paggira kamu rargu dahil imaw tunda ti tanda kuntay magpanguna aku sa kanyu maggira sa manga Pilistiyu.”

¹⁶ Nakan tinupad ni Dabid ti isinugu Diyus sa kanya, ag minatay nida ti manga Pilistiyu ginan sa Gibyun atabug sa Gisir.

¹⁷ Nakan nibantug si Dabid sa una naan, ag ipinahintulut Panginuun kadalaan siya tanan nasyun.