1 Krunika 13 - Hanunuu

Ti Pagbuul sa Kaban Kasunduan

¹ Nanpakihampang si Dabid sa kay manga may kangaranan, sa manga kumandir manga linibu ag ginatus manga sundalu.

² Bag-u magkun siya sa buu kadamlan Israil, “Nu mayad para sa kanyu ag nu kagustuhan Panginuun nita Diyus, manpadara kita tultulanun sa tanan nita manga kasimanwa sa buu saklaw Israil, hanggan sa manga manughandug ag manga Libita mag-uli kaibahan nida sa kanda manga banwa may manga paraharaban. Paataytagun nita sida agud mangawat sa kanta.

³ Udas yi inda hampay bul-un nita ti Kaban nita Diyus, dahil unman nita inda pinahalgaan katpung si Saul waya ti hari.”

⁴ Nagpasnu ti buu kadamlan dahil nakitan nida imaw tunda ti dapat buwatun.

⁵ Nakan tinipun ni Dabid ti tanan Israilita, ginan sa Sapa Sihur sa Ihiptu tugka sa Libu Hamat, sa pagbuul sa Kaban Diyus sa Kiryat Harim.

⁶ Nag-atag si Dabid ag ti manga Israilita sa Baala sa Huda (imaw diman ti Kiryat Harim). Bin-ul nida ati ti Kaban Panginuun Diyus, nu naan asan sa kay atubangan. Mag-uli ti Panginuun sa karaw-an manga kirubin asan sa babaw Kaban.

⁷ Bin-ul nida ti Kaban Diyus sa balay ni Abinadab ag ikinarga sa bag-u pag karitun. Si Usa ag si Ahiyu ti mag-antabay sa karitun.

⁸ Nagdaus si Dabid hanggan ti tanan Israilita sa atubangan Diyus sa buu nida kabisugan. Magkanta sida ag magpatunug manga alpa, lira, pamakaransing, simbals, ag turumpita.

⁹ Pagka pagras-ug nida sa giriukan ni Kidun, hiniyaptan ni Usa ti Kaban, dahil naligsay ti manga baka.

¹⁰ Nagalit gid ti Panginuun sa kan Usa dahil hiniyaptan niya ti Kaban. Nakan namatay siya ati sa atubangan Diyus.

¹¹ Nagalit si Dabid dahil pinarusahan Panginuun si Usa sa kay pangagalit. Imaw tunda nakan tugka kainda pag-ingarnan tunda pag rugar Paris Usa.

¹² Nadala si Dabid sa Diyus sa ati pag sirang, ag magkun siya, “Kabitay yi lang madara sa kang banwa ti Kaban Diyus?”

¹³ Nakan nagpasya siya balaw yi lang niya daran-un ti Kaban sa kay banwa. Kay tutuu, tinayakan niya inda sa balay ni Ubid Idum taga Gat.

¹⁴ Namirmaminti inda sa balay ni Ubid Idum sa sulud tulu ka bulan, ag pagpapaladan Panginuun ti magtal-anakan ni Ubid Idum ag ti tanan niya kasiyunan.