1 Krunika 12 - Hanunuu

Ti Nagkuyug pag manga Tawu sa kan Dabid ag sa Kay manga Sundalu

¹ Inda ti manga tawu nag-atag kan Dabid ati sa Siklag ag nagkuyug sa kanya katpung magpatagu siya kan Saul anak ni Kis. Usa sida sa manga nangawat kan Dabid sa lalabanan.

² May manga pamana sida, ag antigu gid sida magpana ngatay maglastiku, sikun man ngatay wala pag kamang. Manga katawuhan sida ni Saul ginan sa lahi ni Binhamin.

³ Pagpangunahan sida ni Ayisir ni Huas kay manga anak ni Simaa taga Gibiya. Inda kanda manga ngaran: si Hisyil ag si Pilit kay manga anak ni Asmabit, si Biraka ag si Hihu taga Anatut,

⁴ si Ismaya taga Gibyun, usa ka bantug ag maisug pag takinan sa 30 ka maisug pag manga sundalu, si Hirimyas, si Yahasyil, si Huhanan, si Husabad taga Gidira,

⁵ si Ilusay, si Hirimut, si Biyalya, si Simarya, ag si Sipatyas taga Harup,

⁶ si Ilkana, si Isya, si Asaril, si Huwisir, ag si Hasubim kay manga linahi ni Kura,

⁷ si Huyla ag Sibadyas pag manga anak ni Hiruham taga Gidur.

⁸ May manga tawu diman ginan sa lahi ni Gad ti nagkuyug sa kan Dabid ati sa mapag-un pag kampu sa pangawakawaan. Manga maisug sida pag manga sundalu ag antigu sida maggamit panangga ag bangkaw. Parihu sida kaisug sa manga liyun, ag parihu kabisug sa karasyaw sa kabantudan:

⁹ si Isir imaw ti kanda takinan, si Ubadyas kay ikadwa; si Ilyab kay ikatlu;

¹⁰ si Mismana kay ikap-at, si Hirimyas kay ikalima,

¹¹ si Atay kay ikan-um, si Ilyil kay ikapitu,

¹² si Huhanan kay ikawalu, si Ilsabad kay ikasiyam;

¹³ si Hirimyas kay ikasampu, ag si Makbanay kay ikasampulu may usa.

¹⁴ Inda sida pag manga lahi ni Gad manga kumandir sa manga sundalu. Ti pinakamalumuy sa kanda makapanguna sa 100 ka sundalu ag ti pinakamabaskug sa kanda makapanguna sa 1,000 ka sundalu.

¹⁵ Dinipay nida ti Sapa Hurdan sa udas tig baraha inda sa un-an pag bulan timpu, ag pinaighit nida ti tanan mag-uli sa karatagan sa butlakan ag sa isalpan sa sapa.

¹⁶ May manga tawu waydi ginan sa lahi ni Binhamin ag ni Huda ti nag-atag sa kan Dabid ati sa matibay pag paratag-an.

¹⁷ Linmuwang si Dabid sa pagsulang sa kanda ag magkun, “Nu nangataytag kamu sitay sa pag-awat sa kangku bilang manga mahal pagkakilala, pagtanggapun niku kamu kumuyug sa kanmi. Dapat nu nag-ataytag kamu agud itudlu aku sa kang manga kalaban una unman aku may binwat daut sa kanyu, mana makitan inda Diyus nita manga ginurang ag parusahan niya kamu.”

¹⁸ Bag-u sinuldan Ispiritu Diyus si Amasay pagka dugay siya yi ti takinan sa 30 ka maisug pag manga sundalu, ag magkun siya, “Sa kanmu di kami, Ungud Dabid anak ni Isai! Mana pumanalu kawu hanggan ti manga mag-awat sa kanmu, dahil kanmu Diyus mag-awat sa kanmu.” Nakan tinanggap sida ni Dabid binwat may kangaranan niya pag manga sundalu.

¹⁹ May manga tawu waydi ginan sa lahi ni Manasis nagkuyug kan Dabid katpung nag-atag siya sa manga Pilistiyu sa paglaban kan Saul. Dapat ti nangyari, unman magpayag ti manga Pilistiyu kumuyug si Dabid ag kay manga tawuhan, dahil mag-isip sida barang pumakampi maan si Dabid sa kay amu sa kan Saul. Nakan igu nakalawuy kanda harampangan, ipinabalik nida si Dabid sa Siklag.

²⁰ Inda ti manga tawu ginan sa lahi ni Manasis ti nagkuyug sa kan Dabid sa Siklag: sida ni Adnak, ni Husabad, ni Hidyil, ni Mikail, ni Husabad, ni Ilihu, ag ni Silitay. Ti kada usa sa kanda takinan sa usa ka libu sundalu sa lahi ni Manasis.

²¹ Nangawat sida sa kan Dabid sa paglaban sa manga manuggira, dahil manga maisug sida tanan pag manga sundalu. Tunda ngani nakan sida ti kumandir manga sundalu ni Dabid.

²² Kada sirang, may manga tawu mag-atag kan Dabid hampay mangawat sa kanya, tugka nagyamu ag nagrig-un kay manga sundalu.

²³ Inda ti kayamuun armadu manga sundalu nag-atag sa kan Dabid ati sa Hibrun sa pag-awat sa kanya hampay maagaw ti kaharian ni Saul, angay sa itinaratu Panginuun:

²⁴ Ginan sa lahi ni Huda: 6,800 ka armadu manga sundalu may manga bangkaw ag manga pamana.

²⁵ Ginan sa lahi ni Simyun: 7,100 ka anad pag manga sundalu.

²⁶ Ginan sa lahi ni Libi: 4,600 ka sundalu,

²⁷ kaibahan yi si Hihuyada ti takinan sa magtal-anakan ni Aarun ag kay 3,700 ka tawuhan,

²⁸ ag si Saduk ti usa ka anak ag maisug pag sundalu ag ti 22 ka may kangaranan ginan sa kay magtal-anakan.

²⁹ Ginan sa lahi ni Binhamin pag manga katawuhan ni Saul: 3,000 ka sundalu. Sa manga lahi ni Binhamin parargu magkampi kan Saul.

³⁰ Ginan sa lahi ni Ipraim: 20,800 ka maisug pag manga sundalu ag bantug sa kanda manga magtal-anakan.

³¹ Ginan sa katunga lahi ni Manasis: 18,000 ka sundalu. Ipinadara sida para lang sa pag-awat hampay buwatun hari si Dabid.

³² Ginan sa lahi ni Isakar: 200 ka takinan kaibahan kanda manga katawuhan pagpangunahan. Inda sida alam nu unu ti dapat tupadun sa Israil ag nu kapira nida inda tupadun.

³³ Ginan sa lahi ni Sabulun: 50,000 ka anad pag manga sundalu alistu sa girahan. Armadu sida sa tuhay-tuhay pag manga armas. Alistu gid sida mangawat ag kumampi sa kan Dabid.

³⁴ Ginan sa lahi ni Niptali: 1,000 ka may kangaranan ag 37,000 ka sundalu may dara manga panangga ag manga bangkaw.

³⁵ Ginan sa lahi ni Dan: 28,600 ka anad pag manga sundalu alistu sa girahan.

³⁶ Ginan sa lahi ni Asir: 40,000 ka anad pag manga sundalu alistu sa girahan.

³⁷ Ag ginan sa manga linahi sa butlakan Sapa sa Hurdan, lahi ni Rubin, Gad ag katunga lahi ni Manasis: 120,000 ka sundalu armadu sa tuhay pag manga armas.

³⁸ Inda sida tanan manga sundalu nagbuluntad sa paglaban. Nag-atag sida sa Hibrun nagkausa agud buwatun hari sa buu Israil si Dabid. Ti tanan Israilita magkaibug gid si Dabid ti buwatun hari nida.

³⁹ Nagpatayak sida ati sa tulu ka sirang kaibahan kan Dabid magkaun ag mag-inum dahil pinadaran-an karan-unun sida nida manga kasimanwa.

⁴⁰ Nagdara waydi karan-unun kanda manga kadugu ginan waya sa arayu pag rugar sa Isakar, Sabulun, ag Niptali. Ikinarga nida inda sa manga asnu, manga kamilyu, manga mula, ag manga baka. Mayamu kanda manga arina, manga pinkul igus, ubas, intus, lana, baka, ag karanidu. Magbaya gid ti tanan Israil.