1 Krunika 11 - Hanunuu

Si Dabid Hari Israil

¹ Nag-atag ti tanan Israilita kan Dabid sa Hibrun ag magkun, “Manga kadugu nimu kami.

² Ginan sa kabag-u, una katpung si Saul waya ti kanmi hari, kawu ti magpanguna sa manga Israilita sa paglaban. Ag nagsabi sa kanmu ti Panginuun kanmu Diyus, ‘Alagaan nimu kang nasakupan pag manga Israilita parihu sa usa ka manug-alaga manga karanidu. Kawu ti bumaliw takinan nida.’ ”

³ Nakan ati sa Hibrun, nagbuwat si Dabid kasunduan sa manga manugpamahala sa Israil sa atubangan Panginuun, ag pinayidan nida lana kay ulu ni Dabid sa pagpakakit kuntay siya yi ti hari Israil, angay sa itinaratu Panginuun sa panab-anan ni Samwil.

⁴ Sa usa ka sirang, naglakaw si Dabid ag ti manga Israilita sa pagdugma sa Hirusalim (imaw ti Hibus kaybi). Ti mag-uli ati pag manga Hibusiyu

⁵ magkun tabug kan Dabid, “Unman gid kamu makaslud sitay sa Hirusalim.” Dapat naagaw diman gid nida ni Dabid ti mapag-un pag kampu sa Siun, pagka sa uryan iningarnan Banwa ni Dabid.

⁶ Magkun si Dabid, “Una si unu ti umuna sa paggira sa manga Hibusiyu piliun kumandir manga sundalu.” Si Huab kay anak ni Siruya imaw ti nag-una sa paggira. Nakan siya ti pinili kumandir.

⁷ Igu naagaw ni Dabid ti mapag-un pag kampu, ati siya pag nangulian, ag iningarnan niya tunda Banwa ni Dabid.

⁸ Pinadugangan niya inda alad batu sa sangput ginan sa ababa pag bahagi banwa. Si Huab ti nagpanguna sa paghiwat sa iba bahagi banwa.

⁹ Nagmakapangyarihan si Dabid, dahil pag-awatan siya Panginuun Makamaskihan.

Ti Maisug pag manga Tawuhan ni Dabid

¹⁰ Inda ti manga takinan maisug pag manga tawuhan ni Dabid. Sida ag ti tanan Israilita nangawat gid sa pagka hari ni Dabid, angay sa itinaratu Panginuun tungkul sa Israil.

¹¹ Si Hasubim taga Hakmuniyu imaw ti magpanguna sa tulu ka maisug pag manga tawuhan ni Dabid. Sa usa lang ka laban, nakamatay siya 300 ka tawu sa panab-anan niya bangkaw.

¹² Ti dumasun sa kanya imaw si Iliyasar kay anak ni Duday kay linahi ni Ahuwa, usa diman sa tulu ka maisug pag manga tawuhan ni Dabid.

¹³ Usa siya sa manga nagkuyug sa kan Dabid katpung nan-girahan sida sa manga Pilistiyu sa Pas Damim. Ati sida pag nan-girirahan sa taranuman sibada. Nagpinalalagiw ti manga Israilita,

¹⁴ dapat si Iliyasar ag si Dabid napatayak di ati sa karaw-an taranuman, ag minatay nida ti manga Pilistiyu. Pinakan-an Panginuun daka pagka panalu sida.

¹⁵ Usa ka sirang, nag-atag kan Dabid ti tulu niya ka tawuhan ati sa lukib Adulam. Inda sida pag tulu kaibahan sa 30 ka maisug pag manga tawuhan ni Dabid. Magkampu kaybi ti manga Pilistiyu sa Karatagan Ripaim

¹⁶ ag naagaw nida ti Bitlihim. Mintaras ati si Dabid sa usa ka mapag-un pag paratag-an,

¹⁷ inuwaw siya. Magkun siya, “Mayad mana may manbuul para sa kangku danum mainum ati sa bubun arani sa sabian Bitlihim.”

¹⁸ Nakan nagsulud sa lihim ti tulu ka maisug pag manga tawu sa kampu manga Pilistiyu ag nagbuul sida danum sa bubun arani sa sabian Bitlihim ag dinara kan Dabid. Dapat unman nanginum si Dabid; bagkus ngap ibinuhus niya inda bilang handug sa Panginuun.

¹⁹ Magkun siya, “Diyus niku, balaw gid niku inda mainum dahil parihu inda kamahal sa dugu manga tawu nagtaya kanda buhi sa pagbuul inda.” Nakan balaw gid nanginum si Dabid. Imaw tunda ti manga binwat tulu ka maisug pag manga tawuhan ni Dabid.

²⁰ Si Abisay kay patar-ari ni Huab imaw ti takinan 30 ka maisug pag manga tawuhan ni Dabid. Nakamatay siya sa 300 ka Pilistiyu sa panab-anan niya bangkaw. Nakan nibantug siya parihu sa tunda pag tulu ka maisug manga tawu,

²¹ dapat balaw siya kaibahan nida. Ag dahil siya ti pinakabantug sa 30 niya ka kaibahan, siya ngap ti kumandir nida.

²² May usa waya ka maisug pag tawu kay ngaran si Binaya. Taga Kabsiil siya, ag kay ama imaw si Hihuyada. Nagbuwat siya mahalaga pag manga buwat, sakup yi ti pagmatay sa duwa ka pinakamahusay pag sundalu Muab. Sa iba waydi ka udas, linagas niya ti usa ka liyun. Una mag-uran yilu ag maganuy, nagdugsun siya sa ukang ag minatay niya ti liyun.

²³ Sa iba maan pag udas, minatay niya ti usa ka Ihipsiyu may abwat 5 ka luk-an siku. Kay armas Ihipsiyu bangkaw mabuyat ag madamul, dapat kanya pag armas pamakul wata. Inagaw niya ti bangkaw Ihipsiyu ag imaw inda ti iminatay sa kanya.

²⁴ Imaw tunda ti manga binwat ni Binaya kay anak ni Hihuyada. Nibantug waydi siya parihu sa tulu ka maisug pag manga tawu,

²⁵ dapat balaw siya baliwa sa kanda. Ag dahil siya ti pinakabantug sa 30 niya ka kaibahan, pinili siya ni Dabid takinan niya manga alalay.

²⁶ Inda ti manga maisug pag manga sundalu: si Asahil kay patar-ari ni Huab, si Ilhanan kay anak ni Dudu taga Bitlihim,

²⁷ si Samut taga Harur, si Hilis taga Pilun,

²⁸ si Ira kay anak ni Ikis taga Tikwa, si Abisir taga Anatut,

²⁹ si Sibikay taga Husa, si Ilay taga Ahuwa,

³⁰ si Maharay taga Nitupa, si Hilid kay anak ni Baana taga Nitupa,

³¹ si Itay kay anak ni Ribay taga Gibiya, sakup Binhamin, si Binaya taga Piratun,

³² si Huray mag-uli sa arani manga luung sa Gaas, si Abyil taga Araba,

³³ si Asmabit taga Baharum, si Ilyiba taga Saalbun,

³⁴ kay manga anak ni Hasim taga Gisun, si Hunatan kay anak ni Sagii taga Harar,

³⁵ si Ahiyam anak ni Sakar taga Harar, si Ilipal anak ni Ur,

³⁶ si Hipir taga Mikirat, si Ahiyas taga Pilun,

³⁷ si Hisru taga Karmilu, si Naaray anak ni Isbay,

³⁸ si Huwil patar-ari ni Natan, si Mibar anak ni Hagri,

³⁹ si Silik taga Amun, si Naharay taga Birut, kay tagadara armas ni Huab anak ni Siruya,

⁴⁰ si Ira ag si Garib manga taga Hatir,

⁴¹ si Uryas usa ka Hitiyu, si Sabad anak ni Alay,

⁴² si Adina anak ni Sisa usa ka takinan sa lahi ni Rubin ag may 30 siya ka tawuhan,

⁴³ si Hanan anak ni Maaka, si Husapat taga Mitna,

⁴⁴ si Usyas taga Astirat, si Sama ag Yiil manga anak ni Hutam taga Aruwir,

⁴⁵ si Hidyil anak ni Simri, si Huha kay patar-ari taga Tis,

⁴⁶ si Ilyil taga Mahab, si Hiribay ag Husabya manga anak ni Ilnaam, si Itma taga Muab,

⁴⁷ si Ilyil, Ubid, ag Haasyil taga Misuba.