1 Krunika 10 - Hanunuu

Minatay ni Saul Kay Sadili

¹ Taynguna, ti manga Pilistiyu nan-gira sa manga Israilita sa Bantud Gilbuwa. Mayamu ti namatay sa manga Israilita, ag ti iba sa kanda nagpinalalagiw.

² Paglagsun gid manga Pilistiyu si Saul hanggan kay manga anak lalaki, ag minatay nida kay manga anak sida ni Hunatan, Abinadab, ag Malkisuwa.

³ Masyadu gid ti lalabanan nida ni Saul ag manga Pilistiyu. Natamaan si Saul ugyung ag nabiyagan.

⁴ Magkun si Saul sa kay tagadara armas, “Gabuta kanmu baladaw ag matya aku, dahil nu unman, sida pag manga unman magsarig sa Diyus imaw ti mumatay sa kangku, surugun nida aku ag pakurianan.” Dapat magkadala mumatay sa kanya kay tagadara armas, nakan bin-ul ni Saul kay baladaw, ag binunu kay sadili.

⁵ Pagka nakitan niya tagadara armas tigbak yi siya binunu diman niya kay sadili, ag namatay diman siya.

⁶ Nakan namatay si Saul hanggan kay tulu ka anak lalaki, ag ti tanan niya magtal-anakan.

⁷ Kaybi pag udas may manga Israilita mag-uli sa karatagan sa Hisriil. Pagka nakitan nida nagpinalalagiw ti manga sundalu Israil ag namatay yi si Saul ag kay manga anak, tinayakan nida kanda manga banwa ag nanpalagiw waydi sida. Nakan sinulud manga Pilistiyu inda pag manga banwa ag inulianan.

⁸ Sa sunud pag sirang, makalawuy ti labanan, nag-atag ti manga Pilistiyu sa Bantud Gilbuwa agud manbuul manga armas manga namatay. Nakitan nida ati ti bangkay ni Saul hanggan kay manga anak.

⁹ Bin-ul nida ti manga armas ni Saul ag pinlud kay ulu. Bag-u nagpadara sida manga manugbarita sa buu daga manga Pilistiyu sa pagbarita ati sa kanda manga diyus-diyusan ag sa kanda manga kasimanwa kuntay namatay yi si Saul.

¹⁰ Ipinauli nida ti manga armas ni Saul sa balay nida manga diyus, ag ipinauli kay ulu ni Saul sa balay nida diyus si Dagun.

¹¹ Nabaritaan manga taga Habis Gilyad ti tanan binwat manga Pilistiyu sa kan Saul.

¹² Nakan naglakaw ti tanan nida maisug pag manga tawu ag bin-ul ti bangkay ni Saul hanggan kay manga anak, bag-u dinara nida sa Habis. Ilinbung nida inda sa sirung daka pag kayu sa Habis, bag-u unman sida naghandum karan-unun sa sulud pitu ka sirang.

¹³ Namatay si Saul dahil balaw siya matinupadun sa Panginuun. Unman niya tinupad ti sugu Panginuun, ag nandangup waya ngani siya sa manga pandaniwan

¹⁴ sa halip manhagad siya patigayun sa Panginuun. Nakan minatay siya Panginuun bag-u ipinakaun ti kaharian sa kan Dabid kay anak ni Isai.