1 Huwan 4 - Hanunuu

Ti Ispiritu Katutuuhanan ag ti Manug-udyuk Patalang

¹ Manga patar-ari, danga duy magpasnu kamu sa kada tawu mag-aku kuntay sa kanya ti Ispiritu Banal. Subuki dap niyu siya nu ngatay tunda pag Ispiritu ungud ngani ginan sa Diyus, aw ngatay unman. Dahil mayamu yi pag manga pudilun purupita naglinutaw sa kalibutan.

² Siti pag makilala niyu ti Ispiritu Diyus, nu una hintay pag tawu tigtudlu magkun, “Si Hisu-Kiristu nabilug tawu.” Nakan katida kay pag-itudlu dahil lang sa udyuk Ispiritu Diyus.

³ Ti kada tawu nu unman magpatutuu si Hisus nabilug tawu, pihu balaw Ispiritu Diyus tig-udyuk sa kanya. Bagkus ngap ti sa kanya imaw ti manug-udyuk patalang sinugu ni Anti-Kiristu. Naalaman yi waydi niyu rumas-ug siya aban, ag una kainda atay yi ngap siya sa kalibutan.

⁴ Manga anak, kamu duy sa Diyus, dinaug yi niyu ti manga pudilun pag purupita, dahil una makapangyarihan ti sa kalibutan, lalu man mamaski ti Ispiritu Banal, imaw ti nangulian sa kanyu.

⁵ Sida taga kalibutan, nakan kanda baragawun angay diman sa ugali kalibutan, ag magpatingi sa kanda ti manga kalibutanun.

⁶ Kita manga anak Diyus, nakan ti manga nakakilala sa Diyus magpatingi sa kanta. Ti tawu nu unman siya anak Diyus dayu siya pumatingi sa kanta. Siti pag makilala nita ti Ispiritu katutuuhanan ag ti manug-udyuk patalang.

Ti Diyus gid ti may Gimpuunan Pagmahal

⁷ Manga patar-ari, pagmalahalan duy kita sa usa kag sa usa. Dahil ti pagmahal ginan sa Diyus. Ti tawu nu magmahal, nianak siya Diyus ag nakakilala siya sa Diyus.

⁸ Ti tawu nu unman magmahal, unman siya magkilala sa Diyus, dahil Diyus gid ti may gimpuunan pagmahal.

⁹ Sitay pag ipinakilala ti pagmahal Diyus sa kanta pagka sinugu niya kay bugtung Anak sa kalibutan hampay kita may buhi ginan sa kanya.

¹⁰ Ti kang pagsabihun pagmahal, bukun kanta pagmahal sa Diyus, nu unman kay ngap pagmahal Diyus sa kanta. Sinugu niya kay Anak hampay bumaliwa mamatay sa kasalanan nita, agud may kapatawadan kita.

¹¹ Nu katida duy manga patar-ari kay kadaka ti pagmahal Diyus sa kanta, kailangan pagmalahalan diman kita sa usa kag sa usa.

¹² Kaybi ginan unman may tawu nakakit sa Diyus. Nu kita magmalahalan, ti Diyus nangulian sa kanta ag udyi may kurang kay pagmahal sa kanta.

¹³ Nakan magkaalaman nita kita nangulian sa Diyus ag ti Diyus nangulian waydi sa kanta, dahil kita hinurayan waydi kay Ispiritu Banal.

¹⁴ Nakitan nimi ag kanmi pagpatutuuhanan kuntay sinugu Ama kay Anak hampay siya yi ngani ti Manugribri sa tanan manga tawu sa babaw daga.

¹⁵ Una hintay pag tawu tigpasnu hanggan magtudlu kuntay si Hisus yi ngani ti Anak Diyus, nangulian yi sa kanya ti Diyus ag siya unman mag-iblag sa Diyus.

¹⁶ Magkaalaman yi nita ag kanta diman pagsarigan kay pagmahal Diyus sa kanta. Ti Diyus gid ti may gimpuunan pagmahal. Ti tawu nu magparargu sa pagmahal, dayu mag-iblag ginan sa Diyus ag ti Diyus nangulian diman sa kanya.

¹⁷ Nu katunda, pirmi di pagdagdagan Diyus kanta pagmahal hanggan sa udyi may kurang, hampay unman kita magkadala sa kaudasan yi aban nu pihuun ti manga tawu nu daut nu mayad. Dahil nu kabitay si Kiristu katunda diman kita sitay sa kalibutan.

¹⁸ Ti pagmahal unman may patapil magkadala. Dahil nu lubus yi ti pagmahal udyi gid may rugar para magkadala waya. Dahil nakan magkadala ti tawu barang parusahan. Nakan nu magkadala ti tawu udwaya lubus namhan kay pagmahal.

¹⁹ Kita may pagmahal dahil ti Diyus waydi ti un-an nagmahal sa kanta.

²⁰ Una hintay pag tawu tigsabi magkun, “Pagmahalun gid niku ti Diyus,” bag-u nu magkagalit diman siya sa kay patar-ari, pudilun tunda pag tawu. Dahil nu unman waydi pagmahalun niya kay patar-ari madi mag-akitan niya sa mata, lalu yi ngap unman siya madunung magmahal sa Diyus sa unman mag-akitan sa mata.

²¹ Inda ngani pag sugu kay ibinilin ni Kiristu sa kanta magkun, nu ti tawu magmahal sa Diyus, kailangan diman waydi pagmahalun niya kay patar-ari.