1 Huwan 3 - Hanunuu

Manga Anak Diyus

¹ Pag-isipa niyu nu kabitay kay kadaka ti pagmahal Ama sa kanta. Daka gid kay pagmahal nakan iningarnan kita manga anak Diyus. Tutuu gid ngani kita manga anak Diyus. Nakan pagdayuun kita manga taga kalibutan dahil dinayu waydi nida ti Diyus.

² Taynguna duy, kita manga anak yi ngani Diyus. Udwaya ipinaburayhaw Diyus sa kanta nu kabitay kita aban. Dapat maalaman diman nita nu miburayhaw aban si Kiristu, kita parihu diman waydi ga kanya, dahil makitan yi gid nita siya kay histuda.

³ Una hintay pag tawu ti magsarig katunda sa kan Kiristu, mag-ingat sa kay sadili bilug hampay malumpiyu kay buhi, ga kan Kiristu waydi malumpiyu.

⁴ Una hintay pag tawu nu magbuwat kasalanan, unman siya magpasakup sa Kasuguan. Dahil ti ibug sabihun kasalanan, nu unman magpasakup sa Kasuguan.

⁵ Alam niyu nakan si Kiristu nagsitay hampay bul-un niya kanta manga kasalanan. Siya bay unman may kasalanan.

⁶ Una hintay pag tawu nu unman magpablag sa kan Kiristu, unman magpadayun sa kasalanan. Tigpadayun sa kasalanan, udwaya gid nakakit sa kan Kiristu, unman waya hanggan nakakilala sa kanya.

⁷ Kamu duy pag manga anak niku, danga kamu padaya una sa kantapu. Ti matadlung kay buwat pag tawu, ga kan Kiristu diman waydi matadlung siya.

⁸ Nu magpadayun sa kasalanan ti tawu, sakup waya siya diyablu, dahil kaybi ginan hanggan taynguna tugka magkasala diman ti diyablu. Nakan nagsitay ti Anak Diyus hampay wasakun niya ti buwat diyablu.

⁹ Una hintay pag tawu ti nianak Diyus unman mag-ugali sa kasalanan, dahil kay tinanggap yi ti bag-u buhi ginan sa Diyus. Dayu mahimu siya mag-ugali sa kasalanan dahil Diyus yi kay Ama.

¹⁰ Sitay pag makilala ti manga anak Diyus ag ti manga anak diyablu. Una hintay pag tawu ti unman mag-ugali sa matadlung, unman siya anak Diyus, una ti tawu nu unman pagmahalun niya kay patar-ari, unman diman siya anak Diyus.

Kita Kailangan Magmalahalan sa Usa kag sa Usa

¹¹ Dahil inda pag barita kanyu yi nadnugan kaybi waya ginan magkun, kailangan kita pagmalahalan sa usa kag sa usa.

¹² Balaw parihu sa kan Kain. Sakup siya May Puun Kadautan nakan linibun niya kay ari. Nakan kan Kain linibun kay ari dahil matadlung ti buwat niya ari, kan Kain bay lunsay kadautan.

¹³ Danga kamu madulaw, manga patar-ari, nu kamu pagkagalitan manga taga kalibutan.

¹⁴ Alam yi waydi nita, kita kainda may bag-u yi pag buhi, nighit yi kita ginan sa kamatayan, dahil pagmahalun nita kanta manga patar-ari.

¹⁵ Una hintay pag tawu tig kagalit sa kay patar-ari, siya manlilibun ngap sa tawu. Alam diman niyu ti kada manlilibun tawu unman gid sa kanya ti tutuu pag buhi unman may katapusan.

¹⁶ Siti nita pag makilala ti pagmahal, sa kay unman nag-irang ni Hisu-Kiristu kay kinabuhi sa kamatayan para sa kanta. Nakan kailangan balaw diman irangan nita kanta buhi para sa manga patar-ari.

¹⁷ Ti tawu nu may kasiyunan sitay sa babaw daga, ag nu makitan niya kay patar-ari may kailangan bag-u nu unman siya naawa nag-awat sa kay patar-ari, kabitay pag masabi siya magmahal sa Diyus?

¹⁸ Danga tugka lang sa bagaw kanta pagmahal. Danga babaw lang lukub. Pakitan niyu ti tutuu gid pagmahal may patapil buwat.

¹⁹ Sitay pag makilala nita kuntay kita sakup yi sa katutuuhanan. Kainda ti paraan hampay magpakarig-un kanta manga tagipusuun sa atubangan Diyus,

²⁰ nu kanta tagipusuun tigpaalaala kuntay may kasalanan waya. Alam waydi nita ti Diyus lalu man makamaskihan sa kanta manga naisipan ag alam di niya ti tanan bagay.

²¹ Duy, nu unman kita may magkaisipan kasalanan sa kanta tagipusuun, matutum yi kanta naisipan sa kanta magpakarani sa Diyus.

²² Una hintay kanta hagadun, matanggap nita ginan sa kanya, dahil pagtupadun nita kay manga sugu, pagbuwatun nita ti angay sa kay kagustuhan.

²³ Inda yi kay sugu, kailangan pagsarig kita sa ngaran niya Anak, sa ngaran ni Hisu-Kiristu. Kailangan gid kita pagmalahalan sa usa kag sa usa, angay diman sa kay ibinilin sa kanta.

²⁴ Tigtupad sa kay manga sugu Diyus dayu miblag ginan sa Diyus ag ti Diyus nangulian waydi sa kanya. Nakan makilala nita kuntay ti Diyus nangulian sa kanta dahil sa Ispiritu Banal imaw ti ipinakaun niya sa kanta.