1 Huwan 2 - Hanunuu

Si Kiristu ti Manugpamag-itan sa Ama

¹ Aku inda may surat tabug sa kanyu, sa kang manga anak, hampay kamu balaw magkasala. Dapat nu abi may patar-ari magkasala, may usa ka matadlung pag manugpamag-itan kita tabug sa Ama, si Hisu-Kiristu yi ngani.

² Dahil si Kiristu ti nagbaliwa namatay sa kasalanan nita hampay may kapatawadan kita. Ag balaw sa kanta lang sadili pag kasalanan siya pag namatay, nu unman hanggan diman sa kasalanan tanan manga tawu sa babaw daga.

³ Nu tupadun nita kay manga sugu, pihu masabi nita siya kanta pagkilalan-un.

⁴ Ti magsabi magkun, “Magkilala aku sa Diyus”, bag-u nu unman diman waydi pagtupadun niya kay manga sugu, tunda pag tawu magpudil ag kay ugali unman angay sa katutuuhanan.

⁵ Dapat una hintay pag tawu nu magtupad sa kay Bagaw Diyus, tutuu lubus yi kay pagmahalun ti Diyus. Nu katida, alam yi nita, kita sa kanya yi ngani.

⁶ Nu magsabi ti tawu magkun, pirmi siya magpakiusa sa Diyus, kailangan pagga kan Hisus diman waydi kay ugali.

May Bag-u Sugu

⁷ Unman duy, manga patar-ari, aku may isinurat tabug sa kanyu bag-u pag sugu, nu unman imaw diman ti daan pag sugu kaybi ginan. Inda pag daan sugu imaw ti barita kanyu yi nadnugan.

⁸ Dapat ay bag-u diman waydi pag sugu kang pag-isurat sa kanyu. Kay katutuuhanan mag-akitan sa kan Kiristu hanggan sa kanyu diman. Dahil ti dulum maglawuy yi ag ti tutuu pag karayawan magrayaw yi.

⁹ Nu may tawu magsabi kuntay siya sa marayaw yi, bag-u magkagalit diman sa kay patar-ari, siya sa kadudulman waya ngap hanggan kainda tugka.

¹⁰ Nu ti tawu magmahal sa kay patar-ari, nangulian yi siya sa karayawan ag udyi may karadayaanun.

¹¹ Dapat ti tawu nu magkagalit sa kay patar-ari, sa basad kadudulman waya siya. Maglakaw waya siya sa basad madlum ag unman niya alam kay patabgan nu naan, dahil binuta kadudulman kay manga mata.

¹² Kamu duy pag manga anak, aku inda magsurat tabug sa kanyu dahil pinatawad yi kanyu manga kasalanan dahil sa kay ngaran ni Kiristu.

¹³ Kamu duy pag manga gurangun, aku inda magsurat tabug sa kanyu, dahil nakilala niyu siya ti kaybi ginan daan di. Kamu duy pag manga kan-akan, aku inda magsurat tabug sa kanyu, dahil kanyu dinaug ti May Puun Kadautan.

¹⁴ Kamu pag manga anak, aku magsurat sa kanyu, dahil nakilala niyu ti Ama. Manga gurangun, nagsurat aku sa kanyu, dahil nakilala niyu siya ti kaybi ginan daan di. Kamu duy pag manga kan-akan, nagsurat aku sa kanyu, dahil kamu manga mabisug, ti Bagaw Diyus nangulian sa kanyu ag kanyu dinaug ti May Puun Kadautan.

¹⁵ Danga pagmayada ti ugali kalibutan. Danga pagkaibgi niyu ti manga bagay sa kalibutan. Una hintay tigmahal sa ugali kalibutan, unman mahimu magmahal waydi sa Ama.

¹⁶ Dahil ti tanan bagay sa kalibutan, ti manga daut pag kagustuhan naisipan, ti manga daut pag kagustuhan mata ag ti magpadayaw-dayaw sa kay kahamtangan, balaw ginan sa Ama nu unman ginan ngap sa kalibutan.

¹⁷ Ti kalibutan hanggan ti manga magkakinabangan ginan sa kalibutan may kaduraan diman. Dapat ti magtupad sa kagustuhan Diyus may tutuu yi gid pag buhi unman may katapusan.

Ti Anti-Kiristu

¹⁸ Kamu pag manga anak, inda duy arani yi ti katapusan kalibutan. Kanyu yi waydi naalaman kuntay lumuwang ti Anti-Kiristu. Taynguna mayamu yi ngap pag manga anti-Kiristu ti linmuwang yi. Siti pag maalaman yi ngani nita inda arani yi ti katapusan kalibutan.

¹⁹ Tunda pag manga tawu ginan diman waydi sa kanta karaw-an dapat daan balaw tutuu minsan sa kanta. Nu abi sida ungud minsan sa kanta, unman gid napablag sida sa kanta. Nakan sida napablag, hampay makilala sida tanan balaw tutuu gid minsan sa kanta.

²⁰ Dapat ipinakaun yi sa kanyu ti Ispiritu Banal, nakan alam yi niyu tanan-tanan ti katutuuhanan.

²¹ Nakan aku nagsurat sa kanyu balaw tunda kuntay ud alam niyu ti katutuuhanan. Alam yi ngapu niyu ti katutuuhanan ag alam diman waydi niyu ti kapudilan balaw ginan sa katutuuhanan.

²² Hintay nguna ti pudilun? Tunda ngani ti pudilun tigsabi magkun, si Hisus balaw imaw ti Kiristu, ti Pinili Diyus Manugribri pag Hari. Tigtanggi sa Ama hanggan sa Anak imaw yi ngani ti anti-Kiristu.

²³ Nu ti tawu magdayu sa Anak, unman diman waydi sa kanya ti Ama. Nu ti tawu magpatutuu sa Anak, sa kanya diman hanggan ti Ama.

²⁴ Ti kanyu nadnugan kaybi ginan pag manga adal duy, danga yi gid paglimti. Nu udyi may kaduraan sa kanyu tagipusuun ti kanyu nadnugan kaybi ginan, udyi waydi may kinaapasan kanyu pakiusa sa Anak hanggan sa Ama.

²⁵ Inda yi kay itinaratu sa kanta ni Kiristu, ti buhi unman may katapusan.

²⁶ Isinurat gid ngani niku inda tabug sa kanyu tungkul sa manga tawu magkaibug pumatalang sa kanyu.

²⁷ Dapat duy, ipinakaun ni Kiristu sa kanyu ti Ispiritu Banal, imaw ti nangulian sa kanyu. Nakan balaw yi kailangan may magtudlu waya sa kanyu, dahil ti Ispiritu yi gid tigtudlu sa kanyu sa tanan bagay. Kay pag-itudlu Ispiritu balaw pudil, tunda lunsay katutuuhanan ngap. Nakan pagpaniwala kamu sa tudlu Ispiritu, dagpablag kamu ginan sa kan Kiristu.

²⁸ Kamu duy pag manga tuludluan niku, dagpablag gid kamu ginan sa kan Kiristu, hampay nu miburayhaw siya, balaw kita magkadala ag hampay kita balaw mangay-a sa kay atubangan sa kay pagras-ug aban.

²⁹ Alam yi niyu si Kiristu ti matadlung. Nakan magkaalaman diman waydi niyu una hintay pag tawu nu matadlung kay buwat siya anak yi Diyus.