1 Huwan 1 - Hanunuu

Ti Bagaw Diyus may Kabuhian

¹ Kami inda may surat tabug sa kanyu tungkul sa Bagaw may kabuhian. Udwaya linalang ti kalibutan daan di siya. Imaw kanmi nadnugan hanggan nakitan nimi mata, kanmi binantayan ag nahikap nimi kamang.

² Ipinaburayhaw inda pag buhi, nakitan gid nimi. Nakan kanmi pagpatutuuhanan ngani ag pag-ibarita sa kanyu ti tutuu pag buhi unman may katapusan. Kaybi ginan kaibahan siya Ama, bag-u ipinaburayhaw siya sa kanmi.

³ Tunda ngani ti kanmi nakitan ag nadnugan imaw yi kanmi pag-itultul sa kanyu hampay kamu hanggan magpakiusa sa kanmi. Kita magpakiusa yi gid sa Ama ag sa kay Anak, sa kan Hisu-Kiristu.

⁴ Inda imaw yi ngani kanmi pag-isurat hampay kita lubus yi gid magbaya.

Ti Diyus Pasay yi Karayawan

⁵ Inda ti barita niya Anak sa kanmi, imaw diman kanmi pag-ipadakit maan sa kanyu magkun, ti Diyus pasay yi karayawan ag udyi gid may kaduluman sa kanya.

⁶ Nu kanta pagsabihun kita magpakiusa sa kanya bag-u kita maglakaw diman waydi sa madlum, kita magpudil, kanta ugali unman angay sa katutuuhanan.

⁷ Dapat nu kita maglakaw sa marayaw ga kanya waydi sa marayaw, magpakiusa gid kita sa usa kag sa usa, ag kay dugu ni Hisus kay Anak Diyus ti maglumpiyu sa tanan nita manga kasalanan.

⁸ Nu pagsabihun nita kuntay unman kita may kasalanan, pagdayaun lang nita kanta sadili, ti katutuuhanan unman ngap sa kanta.

⁹ Nu pag-akuun nita kanta manga kasalanan sa atubangan Diyus, patawadun niya kita sa tanan pag kadautan, dahil ti Diyus matadlung ag masarigan.

¹⁰ Nu kanta pagsabihun kita unman may kasalanan, kanta pagbangdanan ti Diyus pudilun ag kay Bagaw Diyus unman waydi mangulian sa kanta.