1 Hari 9 - Hanunuu

Napakakit ti Diyus sa kan Sulumun

¹ Natapus ni Sulumun ti pagpatindug Balay Diyus Panginuun hanggan sa kay balay, ag ti iba waya manga gayak buwatun.

² Bag-u nagpakakit maan ti Panginuun sa kanya parihu sa kay binwat kaybi sa Gibyun.

³ Magkun ti Panginuun sa kanya, “Nasaydan niku kanmu darangin hanggan paghagadun sa kangku. Inda pag Balay Diyus kanmu ipinatindug pinili niku bilang rugar nu naan pag dayawun aku hanggan aban. Bantayan niku inda ag pirmi alagaan.

⁴ Ag kawu, nu mangabuhi matinupadun ag matadlung sa kang atubangan parihu sa kanmu ama sa kan Dabid, ag nu buwatun nimu ti tanan niku pag-ipabuwat sa kanmu ag tupadun kang manga surundanun hanggan manga sugu,

⁵ pahariun niku sa Israil kanmu manga linahi tugka aban. Ipinangaku niku inda sa kanmu ama sa kan Dabid katpung sinabi niku sa kanya, ‘Balaw kawu maduraan linahi humari sa Israil.’

⁶ Dapat nu pumatlikud kamu ngatay kanyu manga linahi sa kangku ag unman tumupad sa kang manga sugu hanggan sa ipinakaun niku manga surundanun sa kanyu, ag nu manirbi kamu ag mansamba sa iba manga diyus,

⁷ paalisun niku kamu sa daga ipinakaun niku sa kanyu, ag dayuun niku inda pag Balay Diyus pinili niku rugar nu naan dayawun aku. Bag-u puyaan ag kasarin-an tanan tawu ti Israil.

⁸ Una marinu ag bantug inda pag Balay Diyus, dautun niku inda. Mataranta ag madulaw gid ti tanan pag lumalawuy sitay ag sumabi, ‘Hayga binwat inda Panginuun sa inda pag daga ag sa inda pag Balay Diyus?’

⁹ Sumagut ti iba, ‘Dahil binugyahan nida ti Panginuun nida Diyus ti nagpalwas sa kanda manga ginurang sa Ihiptu, nagsirbi sida ag nagsamba sa tuhay pag manga diyus. Nakan ngani pinadaran-an sida Panginuun manga kadautan.’ ”

Ti Iba waya pag Ipinatindug ni Sulumun

¹⁰ Pagkatapus 20 ka timpu pagpatindug ni Sulumun sa duwa ka abwat balay — ti Balay Diyus Panginuun ag ti balay hari,

¹¹ ipinakaun niya ti 20 ka banwa sa Galiliya sa kan Hari Hiram taga Tiru. Binwat niya inda dahil pinakan-an siya ni Hiram tanan kayu sidru ag sipris, hanggan kay pangailangan gintu.

¹² Dapat pagka nag-atag si Hiram sa Galiliya ginan sa Tiru hampay bantayan ti manga banwa ipinakaun sa kanya ni Sulumun, unman siya nagbaya.

¹³ Nakan magkun siya sa kan Sulumun, “Patar-ari niku, unu pag kalasi manga banwa inda kanmu ipinakaun sa kangku?” Iningarnan ni Hiram tunda pag manga daga Kabul, imaw inda kay ngaran tugka kainda.

¹⁴ Ati katpung nagpadara si Hiram sa kan Sulumun lima ka tunilada gintu.

¹⁵ Inda ti tultulanun tungkul sa pagpatipun ni Hari Sulumun sa manga tawu niya pinilit ipinatarabahu sa pagpatindug Balay Diyus Panginuun hanggan kay sadili balay hari, sa pagtambak sa ababa pag bahagi banwa, hampay tumibay ti alad batu Hirusalim, hanggan sa pagpatindug maan sa manga banwa Hasur, Migidu, ag Gisir.

¹⁶ (Inda pag Gisir ginira ag inagaw hari Ihiptu. Sinunug niya inda ag pinanmatay inda kay manga nasakupan Kananiyu. Ipinakaun niya inda pag banwa sa kay anak babayi bilang paalu sa kay kasal sa kan Sulumun.

¹⁷ Ipinatindug uman ni Sulumun inda pag Gisir.) Ipinatindug diman ni Sulumun kay sirung baliwa Bit Hurun,

¹⁸ ti Baalat, ti Tamar ati sa may pangawakawaan sakup niya daga,

¹⁹ hanggan ti tanan banwa palaulian niya manga kagamitan, manga kalisa ag manga kabayu. Ipinatindug niya ti tanan gustu niya ipatindug sa Hirusalim, sa Libanun, hanggan sa tanan sakup niya pag daga.

^20-21 May manga balaw Israilita waya ti natayak sa Israil. Sida imaw ti manga linahi manga Amuriyu, Hitiyu, Pirisiyu, Hibiyu hanggan manga Hibusiyu, balaw manga natabu namatay manga Israilita katpung inagaw nida ti daga Kanaan. Binwat sida ni Sulumun suruguun ag pinilit magtarabahu, ag parargu sida suruguun tugka kainda.

²² Dapat unman binwat suruguun ni Sulumun una si unu pag Israilita. Bagkus ngap binwat niya sida manga sundalu, manga may kangaranan, manga kumandir manga sundalu, manga kumandir niya manga kalisa, ag manga manugkabayu.

²³ Ti 550 sa kanda binwat ni Sulumun manga manugpamahala manga manugtarabahu sa kay manga buruwatun.

²⁴ Pagka natapus yi ti pag-ipabuwat balay hari ni Sulumun para sa kay asawa, anak hari Ihiptu, dinara niya kay asawa siyun tabug ati ginan sa Banwa ni Dabid. Pagkatapus pinatambakan niya ti ababa pag bahagi banwa.

²⁵ Katlu ginan kada timpu, maghandug si Sulumun manga handug pagsunugun ag manga handug para sa mayad pag pakiusa ati sa harandugan niya ipinabwat para sa Panginuun. Magsunug diman siya kamangyan sa atubangan Panginuun. Nakan natapus ni Sulumun ti pagpatindug sa Balay Diyus.

²⁶ Nagpabuwat waya gid si Sulumun manga barku sa Isyun Gibir, arani sa Ilat sakup Idum, sa may baybay Dagat Marara.

²⁷ Nanpadara si Hiram manga anad pag manga manugdagat kaibahan sa manga tawuhan ni Sulumun.

²⁸ Nanakayan sida sa barku atabug sa Upir; pagka nagbalik yi sida, may dara sida 15 ka tunilada gintu ag dinara nida inda sa kan Hari Sulumun.