1 Hari 7 - Hanunuu

Nagpatindug si Sulumun Kay Balay

¹ Nagpatindug diman si Sulumun kay balay, 13 ka timpu bag-u natapus inda.

^2-3 Ti usa sa manga abwat balay inda iningarnan Kapuruan Libanun. Kay aba inda 100 ka luk-an siku, kay bulang 50 ka luk-an siku, ag kay abwat 30 ka luk-an siku. May upat inda ka hanay manga tulduk sidru — 15 kada hanay, ag matukudan inda sa 45 ka kayu balayan nu naan mahuputan ti kisami sidru.

⁴ Ti duwa ka saruy abwat balay mag-aratubangan may tigutlu ka gaha mag-aratubangan.

⁵ May tigutlu diman inda ka parihu kay aba mag-aratubangan.

⁶ Ti usa waya ka abwat balay ti rugar tiripnan may mayamu pag tulduk. Kay aba inda 50 ka luk-an siku ag kay bulang 30 ka luk-an siku. May sakahan may atup inda sa atubangan ag may manga tulduk.

⁷ Nagpatindug diman siya abwat balay nu naan ipinauli niya kay tukawan hari. Siyun diman pag rugar siya pag maghusay. Pinahaklupan niya inda manga tabla sidru ginan sa salug tugka sa kisami.

⁸ Ti bahagi balay hari nu naan pag mag-uli si Sulumun ati sa may dayu abwat balay nu naan siya pag maghusay, ag parihu diman kay pagkabuwat inda. Parihu diman inda kay histuda sa balay niya ipinabwat para sa kay asawa, anak hari Ihiptu.

⁹ Inda tanan pag manga abwat balay, ginan sa manga paratukawan tugka sa manga bubung binwat sa pinakamayad pag kalasi manga batu pinanmulud ag pinangandasan angay lang sa sukat.

¹⁰ Ti manga patakinan binwat sa daraka ag mayad pag kalasi manga batu. Kay kaabaan ti iba ka manga batu 10 ka luk-an siku ag ti iba 8 ka luk-an siku.

¹¹ Sa kay tungud inda manga kayu sidru ag mahalaga pag manga batu inandasan yi angay sa kay sukat.

¹² Ti maluang pag sugkadan magkasangputan alad batu. Ti kada tulu ka ugpu manga batu inandasan tinungbawan kayu sidru. Ga katida diman kay pagkabuwat sa manga alad batu sa sulud sugkadan Balay Diyus Panginuun hanggan sa sakahan.

Ti manga Kagamitan sa Balay Diyus

¹³ Ipinab-ul ni Hari Sulumun si Huram sa Tiru,

¹⁴ dahil mayad gid siya pag manugpanday manga galang. Anak siya usa ka balu pag babayi ginan sa lahi ni Niptali, ag kay ama taga Tiru, usa diman ka manugpanday manga galang. Nag-atag siya sa kan Hari Sulumun ag binwat niya ti tanan ipinabwat sa kanya.

¹⁵ Nagbuwat si Huram duwa ka tulduk galang, ti kada usa may abwat 18 ka luk-an siku ag may sukat sa sangput 12 ka luk-an siku.

¹⁶ Nagbuwat diman siya duwa ka ulu tulduk galang, ti kada usa may abwat 5 ka luk-an siku.

¹⁷ Ti kada histuda ulu tulduk pinarinuan pitu ka sinugdung-sugdung tinarikada

¹⁸ may duwa ka hatay histuda burak kayu pumigranata.

¹⁹ Kay histuda manga ulu tulduk sa sakahan ga busang liryu, ag kay abwat inda 4 ka luk-an siku.

²⁰ Ti kada ulu duwa ka tulduk magkasangputan duwa ka hatay manga burak pumigranata 200 ka bilug. Inda pag pamarinu sa tungud baliwa ulu tulduk, sa tupad manga sinugdung-sugdung tinarikada.

²¹ Ipinatindug ni Huram ti manga tulduk sa sarakahan Balay Diyus. Ti tulduk sa kanaway baliwa iningarnan niya Hakin, ag ti tulduk sa salatan baliwa iningarnan niya Buus.

²² Ti manga histuda ulu pag manga tulduk ga manga busang liryu. Ag natapus ti pagbuwat manga tulduk.

²³ Bag-u nagpabuwat si Huram daka pag palaulian danum ga kawa, pag-ingarnan Dagat. Kay kaabasad inda 5 ka luk-an siku, 10 ka luk-an siku kay bulang, ag 30 ka luk-an siku kay sukat palibuyung.

²⁴ Magkasangputan inda duwa ka hatay pamarinu sa kay sirung bibig. Inda pag pamarinu ga manga magyapang manga tanum, ag may imaw inda unum ti kada usa ka luk-an siku masangputan ag may pamarinu yi inda daan kaibahan sa pagbuwat sukadan.

²⁵ Matungbawan ti sukadan sa dayu 12 ka tudu baka galang magparatlikudan. Ti tulu ka tudu baka mag-aratubangan sa salatan, ti tulu sa isalpan, tulu sa kanaway ag kay tulu sa butlakan.

²⁶ Ti kayamuun sukadan usa ka dalukap, ag kay bibig inda ga bibig tasa masalipyadan parihu sa magbusang bulaklak liryu. Ag mahimu inda sukadan manga 11,000 galun danum.

²⁷ Nagbuwat diman si Huram sampulu ka kalisa galang, paggamitun sa pangakut danum. Kay kaaba ti kada usa 4 ka luk-an siku, kay bulang 4 diman ka luk-an siku, kay abwat 3 ka luk-an siku.

²⁸ Kaindaay ti pagkabuwat manga kalisa: may manga lingub pinakput sa manga patindug

²⁹ ag may pamarinu larawan liyun, manga tudu baka, ag manga kirubin. Kay tungud hanggan sirung manga kudradu parihu may pamarinu ga manga bulaklak.

^30-31 Ti kada kalisa may upat ka gulung galang ag may galang manga kadina. Sa kada suuk manga kalisa may imaw tukud magtagal sa turungbawan galang palanggana. Ti manga tulduk magkaparinuan ga bulaklak magdurut-an. Ti pan-alalay pag turungbawan nakaangat usa ka luk-an siku sa tungud kalisa, ag kay bulang inda sa sirung usa may tunga ka luk-an siku. Kay sangput sa sirung may manga kinurtihan pamarinu. Kay lingub manga kalisa parihu kay aba ag balaw pabilug.

³² Sa sirung kudradu manga lingub may upat ka bat-angan gulung makabitan sa kadina daan yi namhan kaibahan sa kalisa. Kay abwat inda kada gulung usa may tunga ka luk-an siku

³³ ag parihu inda sa gulung kalisa. Ti manga kadina, manga tubu, manga rayus, ag manga tapaludu gulung pudu galang.

³⁴ Ti kada kalisa may upat ka hiriyaptan — usa sa kada saruy, ag daan yi inda namhan sa kabag-u di waya.

³⁵ Sa saruy tungud kalisa may pabilug liug tunga luk-an siku kay abwat. Kay manga tukud inda ag manga lingub daan di kaibahan sa pagkabuwat kalisa.

³⁶ May pamarinu ti manga lingub ag manga tukud manga larawan kirubin, manga liyun ag manga kayu palma una naan may rugar para sitay. Ag may pamarinu diman inda ga manga bulaklak magdurut-an sa sangput.

³⁷ Katida ti pagkabuwat ni Huram sa sampulu ka kalisa. Parihu sida tanan kay ka daka ag histuda, dahil usa lang ka parabwatan ti pinabwatan sa kanda.

³⁸ Nagbuwat diman si Huram sampulu ka galang manga palanggana, usa ka galang sa kada kalisa. Kay bulang ti kada palanggana 4 ka luk-an siku ag mahimu paulian 220 ka galun danum.

³⁹ Ipinauli niya ti lima ka kalisa sa kanaway baliwa Balay Diyus, ag kay lima waya gid sa salatan baliwa. Ipinauli niya ti palaulian danum pag-ingarnan Dagat sa karaw-an kanaway ag butlakan Balay Diyus.

⁴⁰ Nagbuwat diman siya manga anglit, manga pala hanggan manga malukung paggamitun sa panwidwisik. Natapus ni Huram ti tanan pag-ipabuwat sa kanya ni Hari Sulumun para sa Balay Diyus Panginuun. Inda kay manga ipinabwat:

⁴¹ ti duwa ka tulduk; ti duwa ka malukung ga histuda ulu manga tulduk; ti duwa ka sinugdung-sugdung pag manga tinarikada maparinuan sa ulu manga tulduk;

⁴² ti 400 pamarinu burak pumigranata (makabitan ti duwa ka hatay sa kada sinugdung-sugdung tinarikada masangputan sa ulu manga tulduk);

⁴³ ti sampulu ka kalisa ag sampulu ka palanggana;

⁴⁴ ti sukadan danum pag-ingarnan Dagat ag ti paraulian 12 ka tudu baka;

⁴⁵ ti manga anglit, manga pala hanggan manga malukung paggamitun sa panwidwisik. Inda tanan pag manga bagay para sa Balay Diyus Panginuun, binuwat ni Huram para sa kan Hari Sulumun, ti tanan binuwat pinakintab pag galang.

⁴⁶ Ipinabwat inda ni Hari Sulumun sa panab-anan hulmahan ati sa Karatagan Hurdan, sa tab-anan Sukut ag Saritan.

⁴⁷ Mayamu inda pag manga bagay, nakan unman yi lang ipinakilu ni Sulumun; unman alam nu pira ka kilu inda pag manga galang.

⁴⁸ Nagpabuwat diman si Sulumun inda pag manga kagamitan sa Balay Diyus Panginuun: ti gintu pag harandugan; ti gintu pag lamisa paraulian tinapay pag-isagda sa atubangan Diyus;

⁴⁹ ti manga palaulian sulu lunsay gintu matindugan sa atubangan Pinakabanal pag Sulud-sulud (lima sa sikun baliwa ag lima diman sa wala); ti gintu pag manga bulaklak, manga sulu, hanggan manga sipit;

⁵⁰ ti lunsay gintu pag manga tasa, manga pamulud sa mitsa, manga malukung paggamitun sa panwidwisik, manga sanduk, hanggan manga sukadan kamangyan; ti gintu pag manga bisagra para sa manga sabian Pinakabanal pag Sulud-sulud hanggan sa Balay Diyus gid ngap.

⁵¹ Pagka natapus ti tanan ipinabwat ni Hari Sulumun para sa Balay Diyus Panginuun, dinara niya sa manga haramnuan sa Balay Diyus ti manga butang itinalaga niya ama ni Dabid — ti manga pilak, manga gintu, ag manga kagamitan.