1 Hari 6 - Hanunuu

Ipinatindug ni Sulumun ti Balay Diyus

¹ Inumpisahan ni Sulumun ti pagpatindug sa Balay Diyus Panginuun katpung ikadwa pag bulan, sa bulan Sib, katpung ikap-at pag timpu niya maghari sa Israil. Ika-480 pag timpu ati ginan sa pag-ighit manga Israilita sa Ihiptu.

² Ti ipinatindug ni Hari Sulumun pag Balay Diyus para sa Panginuun 60 ka luk-an siku kay aba, 20 ka luk-an siku kay bulang ag 30 ka luk-an siku kay abwat.

³ Kay bulang sarakahan Balay Diyus 20 ka luk-an siku, kay aba 10 ka luk-an siku parihu diman kay bulang sa Balay Diyus.

⁴ Pinabwatan diman ni Sulumun gaha ti Balay Diyus daraka inda kay sukat ginan sa sulud kaysa luwas.

⁵ Nagpabuwat diman siya manga sulud-sulud sa manga saruy hanggan sa manga dayu Balay Diyus. Inda pag manga sulud-sulud may tulu ka ugpu salug, ag madamitan sa lingub Balay Diyus.

⁶ Kay bulang un-an pag ugpu salug 5 luk-an siku, kay ikadwa pag ugpu salug 6 ka luk-an siku, ag kay ikatlu pag ugpu salug 7 ka luk-an siku. Kay lingub Balay Diyus amat-amat magnipis sa kada ugpu salug hampay maipauli ti manga sulud-sulud sa lingub balaw yi kailangan ti manga pamalabag.

⁷ Pagka ipinatindug ti Balay Diyus, ti ginamit pag manga batu daan yi inandasan ginan sa kay nagbul-an, nakan unman yi may masaydan pulpug martilyu, tigib ngatay una hintay pag gamit baul.

⁸ Ti lakawan pasulud sa un-an pag ugpu salug ati sa may salatan baliwa Balay Diyus. May manga agdan atabug sa ikadwa ag ikatlu pag ugpu salug.

⁹ Pagka naipauli yi ti manga lingub Balay Diyus, pinaulian inda ni Sulumun kisami tabla sidru.

¹⁰ Ag ti manga sulud-sulud sa manga saruy hanggan sa dayu Balay Diyus kay abwat lima ka luk-an siku madamitan sa Balay Diyus sa panab-anan diman manga kayu sidru.

¹¹ Magkun ti Panginuun sa kan Sulumun,

^12-13 “Nu tupadun nimu kang manga surundanun hanggan manga sugu, tupadun diman waydi niku sa panab-anan nimu kang itinaratu sa kan Dabid sa kanmu ama. Mangulian aku kaibahan kang nasakupan manga Israilita sa inda pag Balay Diyus kanmu ipinatindug ag balaw niku sida dayuun.”

¹⁴ Natapus ni Sulumun ti pagpatindug sa Balay Diyus.

Ti manga Ipinabwat sa Sulud Balay Diyus

¹⁵ Ti sa sulud pag lingub Balay Diyus pinahaklupan manga tabla sidru ginan sa salug tugka sa bubungan, hanggan kay salug kayu sipris.

¹⁶ Nagpabuwat siya duwa ka sulud-sulud sa sulud Balay Diyus sa panab-anan pagpauli tab-anan ginan sa salug tugka sa bubungan. Tabla sidru ti ginamit tab-anan. Ti sulud-sulud sa dayu baliwa Balay Diyus iningarnan Pinakabanal pag Sulud-sulud ag kay aba inda 20 ka luk-an siku.

¹⁷ Ti kaabaan waydi sulud-sulud sa luwas Pinakabanal pag Sulud-sulud 40 ka luk-an siku.

¹⁸ Ti buu lingub sa sulud Balay Diyus magkahaklupan tabla sidru, nakan unman mag-akitan ti manga batu sa lingub. May manga iriniruk bulaklak sa lingub hanggan manga magwakat pag halaman.

¹⁹ Iinalistu ni Sulumun ti Pinakabanal pag Sulud-sulud sa sulud Balay Diyus hampay ati pag ibutang ti Kaban Kasunduan Panginuun.

²⁰ Inda pag sulud-sulud; kay aba, kay bulang ag kay abwat pari-parihu lang 20 ka luk-an siku. Ti manga lingub hanggan bubungan pinahaklupan ni Sulumun lunsay gintu ag katunda diman ti harandugan buwat sa kayu sidru.

²¹ Ti iba bahagi sa sulud Balay Diyus pinahaklupan diman niya lunsay gintu. Nagpabuwat siya gintu pag tarikada hanggan panhigut niya inda pasulud sa Pinakabanal pag Sulud-sulud.

²² Nakan may haklup gintu tanan ti sulud Balay Diyus hanggan ti harandugan ati sa sulud Pinakabanal pag Sulud-sulud.

²³ Nagpauli si Sulumun sa sulud sa Pinakabanal pag Sulud-sulud duwa ka kirubin binwat sa kayu ulibu, ti kada usa 10 ka luk-an siku kay abwat.

^24-26 Inda pag duwa ka kirubin parihu ka daka ag parihu diman kanda histuda. Ti kada usa may duwa ka pakpak ag ti kada pakpak may aba lima ka luk-an siku. Nakan ti kaabaan ginan sa pudpud usa ka pakpak tugka sa pudpud usa ka pakpak 10 ka luk-an siku.

²⁷ Magdurut-an sida ipinauli ni Sulumun sa sulud Pinakabanal pag Sulud-sulud malapadan kay manga pakpak. Kay usa nida ka pakpak magdurut-an, ag matuunan sa karaw-an sulud-sulud. Ag kay baliw waya gid nida pakpak mag-iduut sa lingub.

²⁸ Pinahaklupan diman ni Sulumun gintu inda pag duwa ka kirubin.

²⁹ Ti tanan lingub sa duwa ka sulud-sulud Balay Diyus pinarirukan ni Sulumun manga kirubin, manga palma hanggan manga busang kayu magbuklad.

³⁰ Una ti salug sa duwa ka sulud-sulud pinahaklupan diman niya gintu.

³¹ Ti lakawan pasulud sa Pinakabanal pag Sulud-sulud may duwa ka sabian binwat sa kayu ulibu, ag may lima ka bakalan inda sa saruy.

³² Inda pag manga sabian pinarirukan ni Sulumun manga kirubin, manga palma, hanggan manga busang maggimlad, ag pinahaklupan gintu.

³³ Ti lakawan pasulud sa Balay Diyus pinabuwatan diman ni Sulumun parihu kay aba pag manga bakalan binwat sa kayu ulibu.

³⁴ May duwa diman inda ka talakup binwat sa kayu sipris, ag ti kada usa inda may duwa ka tunga mahimu tipigun.

³⁵ Pinarirukan diman inda ni Sulumun manga kirubin, manga palma hanggan manga busang maggimlad, ag pinahaklupan gintu.

³⁶ Ipinabwat diman niya ti sulud sugkadan Balay Diyus. Magkasangputan inda alad batu ti kada tulu ka ugpu manga batu inandasan tinungbawan kayu sidru.

³⁷ Ipinatindug ti patakinan Balay Diyus Panginuun katpung ikadwa pag bulan, imaw diman ti bulan Sib, katpung ikap-at pag timpu paghari ni Sulumun.

³⁸ Natapus ti Balay Diyus katpung ikawalu pag bulan, sa bulan Bul, katpung ika-11 pag timpu kay maghari ni Sulumun. Pitu ka timpu ti pagpatindug sa Balay Diyus, ag sinunud gid ti manga surundanun angay sa gayak.