1 Hari 4 - Hanunuu

Ti manga may Kangaranan ni Sulumun

¹ Naghari si Sulumun sa buu Israil.

² Ag inda kay manga manugpamahala: Ti pangulu manughandug si Asariyas linahi ni Saduk.

³ Ti manga manugsurat hari sida ni Ilihurip ni Ahiyas kay manga anak ni Sisa. Ti magpamahala sa manga kasuratan kaharian si Husapat anak ni Ahilud.

⁴ Ti kumandir manga sundalu si Binaya anak ni Hihuyada. Ti manga manughandug si Saduk ag si Abyatar.

⁵ Ti takinan manga gubirnadur sa buu daga Israil si Asariyas anak ni Natan. Kay sadili tagapayu hari si Manug-asiwa Sabud, anak diman ni Natan.

⁶ Ti manugpanguna sa balay hari si Ahisar. Ag ti magpanguna sa manga suruguun sapilitan pagpatarabahuun si Aduniram kay anak ni Abda.

⁷ May imaw diman si Sulumun 12 ka gubirnadur sa buu daga Israil. Sida ti magpakaun karan-unun hari hanggan sa kay magtal-anakan. Kada usa sa kanda magpakaun karan-unun usa ka bulan kada timpu.

⁸ Inda kanda manga ngaran: Si Bin Hur, ti manugpanguna sa kabantudan Ipraim.

⁹ Si Bin Dikir, ti manugpanguna sa Makas, Saalbim, Bit Simis, ag sa Ilun Bit Hanan.

¹⁰ Si Bin Hisid, ti manugpanguna sa Arubut, kaibahan yi sitay ti Suku hanggan ti buu daga Hipir.

¹¹ Si Bin Abinadab, ti manugpanguna sa Naput Dur. (Asawa siya ni Tapat anak ni Sulumun.)

¹² Si Baana anak ni Ahilud, ti manugpanguna sa Taanak, Migidu, sa buu Bit San arani sa Saritan sa lawud Hisriil, hanggan sa manga rugar ginan sa Bit San atabug sa Abil Mihula ag dipay Hukmiyam.

¹³ Si Bin Gibir, ti manugpanguna sa Ramut Gilyad, kaibahan yi sitay ti manga banwa ni Hair anak ni Manasis, hanggan ti buu daga Argub sa Basan, kaibahan yi kay 60 inda ka daraka manga banwa magkasangputan manga alad batu, kay manga sabian inda galang.

¹⁴ Si Ahinadab anak ni Iddu, ti manugpanguna sa Mahanaim.

¹⁵ Si Ahimaas, ti manugpanguna sa Niptali. (Asawa siya ni Basimat anak ni Sulumun.)

¹⁶ Si Baana anak ni Husay, ti manugpanguna sa Asir ag sa Alut.

¹⁷ Si Husapat anak ni Parua, ti manugpanguna sa Isakar.

¹⁸ Si Simiy anak ni Ila, ti manugpanguna sa Binhamin.

¹⁹ Si Gibir anak ni Uri, ti manugpanguna sa Gilyad, sakup kaybi ni Sihun hari manga Amuriyu ag ni Ug hari Basan. Si Gibir lang ti gubirnadur sa inda pag buu daga.

Ti Kaabundahan ag ti Kadunungan ni Sulumun

²⁰ Ti kayamuan nasakupan Huda ag Israil parihu sa baras sa baybay dagat balaw mabilang. Abunda sida sa karan-unun hanggan sa irinmun, ag masulung sida.

²¹ Si Sulumun ti manugpanguna sa tanan kaharian ginan sa Sapa Iyupratis atabug sa daga manga Pilistiyu tugka sa katugkaan Ihiptu. Inda pag manga kaharian magbayad kanda buwis sa kan Sulumun ag magpasakup sa kanya habang buhi siya.

²² Inda ti manga kailangan pag karan-unun ni Sulumun sa kay balay hari kada sirang: 100 saku mayad pag kalasi arina, 200 saku mumurahin pag arina,

²³ 10 ka pinatabul baka sa tudiran, 20 ka baka pinalpasan lang sa paraharaban, 100 ka karanidu ngatay kambing, balaw labut sa tuhay-tuhay pag kalasi manga karasyaw, ag mayad pag kalasi manga manuk maglayang sa tungud hanggan manga manuk alaga.

²⁴ Sakup ni Sulumun ti buu daga sa isalpan Sapa Iyupratis, ginan sa Tipsa tugka sa Gasa. Ag mayad kay ugnayan sa tanan nasyun sa kay palibut.

²⁵ Nakan habang magkabuhi si Sulumun, may kahusayan ti Huda ag ti Israil ginan sa Dan tugka sa Biirsiba. Ti kada tawu may kahusayan matukawan sa sirung niya tanum ubas ag puun igus.

²⁶ May 40,000 kuwadra si Sulumun para sa kay manga kabayu pankalisa, ag may 12,000 siya ka manugkabayu.

²⁷ Ti manga gubirnadur sa buu daga imaw ti magpakaun pangangailangan ni Hari Sulumun hanggan tanan asan sa balay hari. Ti kada usa sa kanda may karampatan sa pag-ayaw kada bulan. Pagsiguraduhun gid nida miayaw ti manga kailangan ni Sulumun.

²⁸ Magpakaun diman sida sibada ag dayami para sa manga kabayu pankalisa hanggan sa iba waya pag manga kabayu. Pagdarahun nida inda sa rugar dapat inda darahan sa udas may buruwatun.

²⁹ Pinakan-an Diyus si Sulumun balaw kasarangan pag dunung ag pan-intindi, ag kaalaman balaw may tumupung.

³⁰ Kay kaalaman higit waya sa kaalaman tanan madunung sa butlakan hanggan sa Ihiptu.

³¹ Siya ti pinakamadunung sa tanan. Mas madunung waya siya kaysa kan Itan Isranu, ag sa manga anak ni Mahul sida ni Himan, Kalkul, ag Darda. Ag nibantug siya sa palibut pag manga nasyun.

³² Nagbuwat siya 3,000 ka kabagawan ag 1,005 ka kanta.

³³ Makatultul siya tungkul sa tanan kalasi manga tanum, ginan sa daraka pag manga kayu sa Libanun tugka sa dariit pag manga tanum magtubu sa habig batu. Makatultul diman siya tungkul sa tanan kalasi hayup: ti maglakaw, ti magyapang, ti maglayang, ag ti maglanguy.

³⁴ Nabaritaan tanan hari sa kalibutan ti kadunungan ni Sulumun, nakan nagpadara sida manga tawu hampay mamatingi sa kay kadunungan.