1 Hari 22 - Hanunuu

Pinasandaman ni Mikaya si Akab

¹ Sa sulud tulu ka timpu, unman may nangyari lalabanan sa tab-anan Aram ag Israil.

² Pagka sa ikatlu pag timpu, napasampak si Husapat hari Huda sa kan Akab hari Israil.

³ Magkun si Akab sa kay manga may kangaranan, “Alam niyu kanta ti Ramut Gilyad. Dapat hayga unman kita magbuwat paraan hampay mabawi nita inda sa hari Aram?”

⁴ Nakan pinaingana ni Akab si Husapat, “Manguyug aw kawu sa kanmi paglaban sa Ramut Gilyad?” Sinmagut si Husapat sa kan Akab, “Alistu aku manguyug sa kanmu ag alistu aku ipagamit sa kanmu ti manga sundalu hanggan manga kabayu niku.

⁵ Dapat paingan-un dapu nita ti Panginuun nu hintay ti masabi niya.”

⁶ Nakan ipinatawag ni Akab ti manga purupita — manga 400 sida tanan ag pinaingana, “Atabug aw kami sa Ramut Gilyad ngatay unman?” Sinmagut sida, “Sigi, paglakaw kamu, dahil papanaluhun kamu Panginuun!”

⁷ Dapat nagpaingana si Husapat, “Udyi aw may iba waya purupita Panginuun atay ti mapaingan-an nita?”

⁸ Sinmagut si Akab sa kan Husapat, “May usa waya ti mahimu nita mapaingan-an — si Mikaya kay anak ni Imla. Dapat magkagalit aku sa kanya dahil balaw siya may marinu pag-ihula tungkul sa kangku, lunsay kadautan.” Sinmagut si Husapat, “Danga kawu magbagaw katunda.”

⁹ Nakan ipinatawag ni Akab ti usa sa kay manga may kangaranan ag magkun, “Daraha rargu niyu sitay si Mikaya kay anak ni Imla.”

¹⁰ Taynguna, si Hari Akab sa Israil hanggan si Hari Husapat sa Huda, nakasulung kanda panrutayun hari matukawan sa kanda tukawan hari sa atubangan giriukan ati baliwa sa puwirtahan banwa Samarya. Ag magpatingi sida sa pagsabihun manga purupita.

¹¹ Si Sidikyas usa sa manga purupita kay anak ni Kanaana nagbuwat manga sungay baul. Magkun siya, “Inda ti pagsabihun Panginuun sa kan Hari Akab: ‘Sa panab-anan manga sungay inda, rurisun nimu ti manga Aramiyu tugka sa matabu sida.’ ”

¹² Kainda diman ti pagsabihun tanan purupita. Magkun sida, “Hari Akab, giraha ti Ramut Gilyad, ag manalu kamu, dahil ipakaun inda sa kanyu Panginuun.”

¹³ Magkun ti sinugu atabug sa kan Mikaya, “Ti tanan purupita parihu kay sinabi kuntay manalu ti hari, nakan katida diman kanmu sabihun.”

¹⁴ Dapat magkun si Mikaya, “Magsumpa aku sa buhi pag Panginuun kuntay sabihun lang niku ti pag-ipasabi niya sa kangku.”

¹⁵ Pagras-ug ni Mikaya sa kan Hari Akab, nagpaingana ti hari sa kanya, “Mikaya, girahun aw nimi ti Ramut Gilyad ngatay unman?” Sinmagut si Mikaya, “Giraha niyu ag manalu kamu, dahil ipatalu inda Panginuun sa kanyu.”

¹⁶ Dapat magkun ti hari sa kan Mikaya, “Pira ka bisis niku kawu pasumpaun kuntay sabihun nimu sa kangku kay tutuu sa ngaran Panginuun?”

¹⁷ Nakan magkun si Mikaya, “Nakitan niku sa kang pangakakitun mawayakan ti manga Israilita sa manga kabantudan parihu sa manga karanidu unman may manugbantay, ag magkumun ti Panginuun, ‘Inda pag manga tawu unman yi may takinan. Paulia sida may kahusayan.’ ”

¹⁸ Magkun si Hari Akab sa kan Husapat, “Unman aw pagsabihun niku sa kanmu unman may marinu pag pag-ihula siya sa kangku lunsay lang kadautan?”

¹⁹ Magkun waya si Mikaya, “Patingihi ti tultulanun Panginuun! Nakitan niku ti Panginuun matukawan sa kay tukawan, may matindugan manga taga langit pag manga sundalu sa kay wala ag sikun.

²⁰ Bag-u magkun ti Panginuun, ‘Si unu ti manaban sa kan Akab hampay girahun ti Ramut Gilyad, hampay mamatay siya ati?’ Tuhay-tuhay kay sagut manga taga langit pag sundalu.

²¹ Ag may ispiritu nagpakarani sa Panginuun ag magkun, ‘Aku ti manaban sa kanya.’ Nagpaingana ti Panginuun, ‘Sa kabitay pag paraan?’

²² Sinmagut siya, ‘Atabug aku ag pabagawun niku kapudilan kay manga purupita ni Akab.’ Magkun ti Panginuun, ‘Paglakaw kawu ag buwata inda. Manalu kawu sa pagtaban sa kanya.’ ”

²³ Ag magkun si Mikaya, “Taynguna pinadaran-an Panginuun kanmu manga purupita ispiritu magsabi sa kanda kapudilan. Itinagka Panginuun matalu kawu.”

²⁴ Pinmakarani si Sidikyas sa kan Mikaya ag sinampal inda. Magkun si Sidikyas, “Kabitay nimu magkasabi ti Ispiritu Panginuun nighit sa kangku ag nagpakihampang sa kanmu?”

²⁵ Sinmagut si Mikaya, “Maalaman niyu inda sa sirang matalu kamu sa labanan ag patagu kamu sa sulud-sulud balay.”

²⁶ Nagsugu rargu si Hari Akab, “Dakpa niyu si Mikaya, ag daraha pabalik sa kan Amun imaw ti takinan sa banwa hanggan sa kan Huas sa kang anak.

²⁷ Ag sabihun niyu sa kanda nagsugu aku kuntay pirisuha inda pag tawu. Tinapay ag danum lang ti ipakaun sa kanya tugka sa makabalik aku may kahusayan ginan sa labanan.”

²⁸ Magkun si Mikaya, “Nu makabalik kawu may kahusayan, kay ibug sabihun unman nagbagaw ti Panginuun sa kangku.” Ag magkun si Mikaya sa tanan tawu ati, “Tandai niyu ti sinabi niku!”

Kay Kamatayan ni Akab

²⁹ Nakan nan-gira sa Ramut Gilyad si Akab ti hari Israil, hanggan si Husapat ti hari sa Huda.

³⁰ Magkun si Akab sa kan Husapat, “Sa udas labanan, balaw aku mamakilala kuntay aku ti hari, dapat kawu pagsulung kawu kanmu rutay pagkahari.” Nakan nagpabalhingu ti hari Israil, ag linmaban sida.

³¹ Taynguna, nagsugu ti hari Aram sa 32 ka kumandir niya manga manugkalisa, “Danga niyu pag giraha una si unu, nu unman ti hari lang Israil.”

³² Pagka nakitan manga kumandir manga manugkalisa si Husapat, mag-isip sida siya yi ngani ti hari Israil, nakan ginira nida inda. Dapat pagka nanringgit si Husapat,

³³ naalaman manga kumandir manugkalisa bukun maaw siya ti hari Israil nakan inmapas kanda maglagas sa kanya.

³⁴ Dapat habang pagpanaun usa ka sundalu Aramiyu ti manga sundalu Israil, tinamaan niya ti hari Israil sa tab-anan duwa ka panangga sa dubdub. Magkun si Hari Akab sa tagadara niya kalisa, “Ipakarayu nimu sa labanan! Dahil nabiyagan aku.”

³⁵ Masyadu ti labanan tida pag sirang, ag ti hari Israil masalandigan wadi sa kay kalisa masaranguhan sa manga Aramiyu. Binmulus ti dugu niya sa kalisa, ag namatay siya igu malambung.

³⁶ Pagka mag-isalup yi ti init, may nanringgit sa manga sundalu Israil, “Ti kada usa pag-uli yi sa kanda-kanda rugar!”

³⁷ Pagka namatay ti hari Israil, dinara kay bangkay sa Samarya, ag ati pag ilinbung.

³⁸ Inugasan nida ti kalisa sa pararigsan sa Samarya, nu naan pag magparigus ti manga babayi baraydan, ag kay dugu niya hinimud manga idu. Nangyari inda angay sa sinabi Panginuun.

³⁹ Ti iba waya ka tultulanun tungkul sa maghari ni Akab, ag ti tanan niya binwat, hanggan ti pagpatindug niya marinu pag balay hari, ag pagparig-un manga banwa, nisurat sa Ribru Tultulanun manga Hari Israil.

⁴⁰ Pagka namatay si Akab, kay anak niya si Ahasiyas ti inmilis sa kanya bilang hari.

Kay Maghari ni Husapat sa Huda

⁴¹ Naghari sa Huda si Husapat kay anak ni Asa, katpung ikap-at pag timpu sa kay maghari ni Akab sa Israil.

⁴² Si Husapat 35 ka timpu kay idad pagka naghari. Sa Hirusalim siya pag nangulian, ag naghari siya sa sulud 25 ka timpu. Kay ina niya si Asuba kay anak ni Silhi.

⁴³ Sinmunud siya sa pangabuhi niya ama si Asa. Matadlung kay binwat sa magbantay Panginuun. Dapat balaw niya winayak ti manga simbahan sa abwat pag manga rugar, nakan ti manga tawu parargu sa magpakaun ag pagsunug manga kamangyan ati.

⁴⁴ May marinu pagpakiusa diman si Husapat sa hari Israil.

⁴⁵ Ti iba waya ka tultulanun tungkul sa maghari ni Husapat, ag kay manga pagpanalu sa labanan, nisurat sa Ribru Tultulanun manga Hari Huda.

⁴⁶ Pinalayas niya ti manga lalaki hanggan ti manga babayi baraydan sa manga simbahan sa abwat pag rugar, balaw nighit katpung udas niya ama ni Asa.

⁴⁷ Pagka tida pag udas unman may hari sa Idum; pagdumarahan lang inda usa ka takinan kay pinili ni Husapat.

⁴⁸ May ipinabwat si Husapat manga barku pan-ahinti magpanlayag sa Upir hampay mam-ul gintu. Dapat unman inda nakapanlayag dahil nadaut inda sa may Isyun Gibir.

⁴⁹ Pagka tida pag udas, magkun si Ahasiyas kay anak ni Akab atabug sa kan Husapat, “Pakuyuga nimu kang manga tawuhan sa kanmu manga tawuhan sa kanda magpanlayag.” Dapat unman pinmasnu si Husapat.

⁵⁰ Pagka namatay si Husapat, ilinbung siya sa kalubngan niya manga ginurang sa Banwa ni Dabid. Kay anak niya si Hihuram ti inmilis sa kanya bilang hari.

Kay Maghari ni Ahasiyas sa Israil

⁵¹ Naghari sa Israil si Ahasiyas kay anak ni Akab katpung 17 pag timpu kay maghari ni Husapat sa Huda. Sa Samarya pag nangulian si Ahasiyas, naghari siya sa sulud duwa ka timpu.

⁵² Daut kay binwat sa magbantay Panginuun, dahil nagsunud siya sa kay ama ag ina, ag sa kan Hirubuam kay anak ni Nabat, imaw ti pinun-an kasalanan manga taga Israil.

⁵³ Nansamba siya ag nansirbi sa kan Baal. Parihu sa binwat niya ama, ginalit diman niya ti Panginuun, ti Diyus Israil.