1 Hari 21 - Hanunuu

Ti Taranuman Ubas ni Nabut

¹ May usa ka tawu taga Hisriil kay ngaran si Nabut. May taranuman siya ubas sa Hisriil sa saruy balay hari ni Hari Akab sa Samarya.

² Usa ka sirang, magkun si Akab sa kan Nabut, “Dahil arani sa balay hari niku ti taranuman nimu ubas, ipakaun yi lang nimu tunda sa kangku hampay buwatun niku taranuman manga urupiun. Ag bilang kailis, pakan-an niku kawu mas marinu pag taranuman ubas; ngatay nu magkaibug kawu, bayadan kawu niku sa kang-ud pag halaga.”

^3-4 Dapat sinmagut si Nabut, “Balaw duy pumasnu ti Panginuun ipakaun niku inda sa kanmu kang minana sa kang manga ginurang.” Nuli si Akab maruku ag magkaisug dahil sa kay isinagut ni Nabut sa kanya. Napahuway siya masranguhan sa lingub ag magbugya magkaun.

⁵ Inatihan siya niya asawa ni Hisibil, ag pinaingana, “Hayga kawu magkaruku? Hayga dayu kawu mangaun?”

⁶ Sinmagut siya, “Sinabi niku sa kan Nabut kuntay bilihun niku kay taranuman ubas ngatay nu gustu niya ilisan niku inda mas marinu pag taranuman ubas, dapat unman siya nagpasnu.”

⁷ Magkun si Hisibil, “Unman aw kawu ti hari Israil? Pagbangun kawu ag pagkaun! Pagmasulung kawu dahil ipakaun niku sa kanmu ti taranuman ubas ni Nabut taga Hisriil.”

⁸ Nakan sinmurat si Hisibil sa ngaran ni Akab, minarkahan niya inda panmarka hari, ag ipinadara sa manga paggurangunun hanggan sa iba waya manga may katungkulan sa banwa nu naan pag mag-uli si Nabut.

⁹ Inda ti masuratan sa kay surat, “Tipunun niyu ti manga nasakupan hampay balaw manhandum karan-unun, ag patukawun niyu si Nabut sa unahan manga tawu.

¹⁰ Bag-u patukawa niyu sa atubangan niya ti duwa ka daut pag tawu hampay bangdanan siya kuntay sinaadan niya ti Diyus hanggan ti hari. Pagkatapus, daran-un niyu siya sa luwas banwa ag bintukun tugka sa mamatay.”

¹¹ Binwat manga paggurangunun hanggan iba waya manga may katungkulan ti sinabi sa kanda ni Hisibil sa surat.

¹² Tinipun ngani nida ti manga nasakupan hampay balaw manhandum karan-unun ag pinatukaw nida si Nabut sa unahan manga tawu.

¹³ Bag-u may rinmas-ug duwa ka daut pag tawu, tinmukaw sa atubangan ni Nabut, ag binangdanan nida inda sa atubangan manga tawu. Magkun sida, “Sinaadan ni Nabut ti Diyus hanggan ti hari.” Nakan dinara nida si Nabut sa luwas banwa, ag binintuk tugka sa namatay.

¹⁴ Pagkatapus, sinmurat sida sa kan Hisibil kuntay binintuk nida si Nabut ag namatay yi inda.

¹⁵ Pagka naalaman ni Hisibil kuntay tigbak yi si Nabut, magkun siya sa kan Akab, “Tigbak yi si Nabut nakan paglakaw kawu ag apua nimu kay taranuman ubas ti pag-irangan niya pag-ipabili sa kanmu.”

¹⁶ Pagka nasaydan ni Akab tigbak yi si Nabut, rargu siya ginminan hampay apuun ti taranuman ubas ni Nabut.

¹⁷ Magkun ti Panginuun sa kan Ilyas taga Tisbi,

¹⁸ “Pag-ati kawu sa kan Hari Akab sa Israil, mag-uli sa Samarya. Ati siya sa taranuman ubas ni Nabut dahil pagkaibgan niya inda apuun.

¹⁹ Sabihun nimu inda sa kanya: ‘Pagkatapus nimu manmatay tawu, bul-un waya nimu hanggan kay daga? Dahil sa kanmu binwat, himudun manga idu kanmu dugu ati sa luwas banwa, parihu sa paghimud nida sa kay dugu ni Nabut.’ ”

²⁰ Pagka nakitan ni Akab si Ilyas, magkun siya, “Nasampakan diman aku niku kalaban!” Sinmagut si Ilyas, “Hu, inmataytag aku sa kanmu dahil ipinabili nimu kanmu sadili sa pagbuwat daut sa magbantay Panginuun!

²¹ Nakan inda ti pagsabihun Panginuun sa kanmu: ‘Padarahan niku kawu kadamhakan. Matyun niku ti tanan nimu linahi lalaki, panawuhun man ngatay bukun.

²² Rurisun niku ti magtal-anakan nimu parihu sa binwat niku sa magtal-anakan ni Hirubuam kay anak ni Nabat ag magtal-anakan ni Baasa kay anak ni Ahiyas, dahil ginalit nimu aku ag kawu ti pinun-an kasalanan manga taga Israil.’

²³ “Ag nu tungkul waydi kan Hisibil, magkun ti Panginuun, kan-un siya manga idu sa alad batu Hisriil.

²⁴ Ti mamatay sa banwa pag manga kabilang sa magtal-anakan nimu kan-un manga idu, ag ti mamatay sa bantud kan-un manga uwak.”

²⁵ (Unman may iba tawu ipinabili kay sadili sa pagbuwat daut sa magbantay Panginuun, parihu sa binwat ni Akab dahil pinaturnan siya ni Hisibil niya asawa.

²⁶ Nagbuwat siya daut gid pag bagay sa panab-anan pagsamba sa manga diyus-diyusan, parihu sa binwat manga Amuriyu ipinalayas Panginuun sa panab-anan manga Israilita.)

²⁷ Pagka nasaydan ni Akab kay sinabi ni Ilyas, dinaut niya kay rutay ag nanulung saku una sa magkaturug. Balaw siya nanhandum karan-unun ag maruku nagpalakaw-lakaw.

²⁸ Magkun ti Panginuun sa kan Ilyas taga Tisbi,

²⁹ “Nakitan aw nimu nu kabitay nagpakumbaba si Akab sa kay sadili sa kang atubangan? Dahil sa nagpakumbaba niya, balaw niku ipadara ti kadamhakan sa kaudasan niya, nu unman ipadara niku inda sa magtal-anakan niya anak nu maghari yi inda.”