1 Hari 20 - Hanunuu

Ginira ni Bin Hadad ti Samarya

¹ Taynguna, tinipun ni Hari Bin Hadad taga Aram ti tanan niya manga sundalu hampay manlaban. Kinmuyug sa kanda ti 32 ka hari kay kakampi ni Bin Hadad may manga kabayu hanggan manga kalisa. Ag ginminan sida hampay girahun ti Samarya.

² Sinmugu si Bin Hadad manga manugtultul sa Samarya hampay iparas-ug inda pag tultulanun sa hari Israil, sa kan Akab, “Inda kay pagsabihun ni Bin Hadad:

³ ‘Kanmu pilak ag gintu kangku yi, hanggan kanmu manga asawa ag mararinu pag anak kangku diman.’ ”

⁴ Sinagut siya hari Israil, “Angay ngani sa sinabi nimu, Mahal Hari, aku hanggan ti tanan sa kangku kanmu yi.”

⁵ Utru binmalik ti manga manugtultul sa kan Akab ag magkun, “Inda ti pagsabihun ni Bin Hadad: ‘Sinabi yi niku sa kanmu, ipakaun nimu sa kangku kanmu pilak, gintu, hanggan manga asawa ag anak.

⁶ Dapat aldaw sa kainda diman pag udas, paasantagun niku ti manga may kangaranan niku hampay mankalkal sa kanmu balay hari hanggan sa manga balay nimu manga may kangaranan. Bul-un nida ti tanan pagbaliwun nimu mahalaga.’ ”

⁷ Ipinatawag hari Israil ti tanan paggurangunun sa Israil ag sinabihan, “Maghanap ungud paraan si Bin Hadad hampay mawayak kita. Pinmasnu yi ngani aku pagka hinagad niya kang manga asawa ag anak, hanggan kang pilak ag gintu.”

⁸ Sinmagut ti manga paggurangunun hanggan ti manga tawu, “Danga duy kawu magpasnu sa manga paghagadun niya.”

⁹ Nakan sinabihan niya ti manga manugtultul ni Bin Hadad, “Sabihun niyu sa mahal hari kuntay itunghul niku sa kanya ti un-an niya pag paghagadun, dapat kay ikadwa balaw yi niku maitunghul.” Nag-inululi ti manga manugtultul ag sinabi sa kan Bin Hadad kay sagut ni Akab.

¹⁰ Nanpadara uman si Bin Hadad tultulanun sa kan Akab, “Lubus mana aku parusahan manga diyus, nu balaw niku mawayak ti Samarya. Pagpihuun niku una di galbuk unman may matayak maakup niku manga sundalu.”

¹¹ Sinmagut ti hari Israil, “Sabihi niyu siya kuntay ti manga sundalu mag-alistu di waya sa paglaban balaw kailangan magpadayaw parihu sa sundalu tapus yi linmaban.”

¹² Natanggap ni Bin Hadad kay sagut ni Akab habang mag-inum siya hanggan kay manga kaibahan hari ati sa kanda manga turda. Rargu niya sinugu kay manga tawuhan kuntay pag-alistu sa paggira sa Samarya. Ag sinunud nida inda.

Tinalu ni Akab si Bin Hadad

¹³ Pagka dugay, may rinmas-ug usa ka purupita sa kan Akab ag magkun, “Inda duy ti pagsabihun Panginuun: Nakitan nimu pagkayamu ti sundalu ni Bin Hadad. Dapat ipatalu niku sida sa kanmu taynguna pag sirang, ag maalaman nimu kuntay aku ti Panginuun.”

¹⁴ Namaingana si Akab, “Dapat si unu ti tumalu sa kanda?” Sinmagut ti purupita, “Inda duy ti pagsabihun Panginuun: Ti manga kan-akan pag sundalu sa sirung kapangyarihan manga gubirnadur manga purubinsiya, imaw ti tumalu sa kanda.” Namaingana maan si Akab, “Si unu ti un-an man-gira?” Sinmagut ti purupita, “Kamu.”

¹⁵ Nakan ipinatawag ni Akab ti manga kan-akan pag sundalu, sa sirung kapangyarihan manga gubirnadur manga purubinsiya — 232 sida tanan. Ag tinipun diman niya ti iba waya pag manga Israilita — 7,000 sida tanan.

¹⁶ Karaw-an sirang sida pag ginmira, habang si Bin Hadad hanggan ti 32 ka hari kay kakampi maglalanguhan sa kanda manga turda.

¹⁷ Un-an ginmira ti manga kan-akan pag sundalu. Taynguna, ti ipinadara pag manga manugtiid ni Bin Hadad sa Samarya magsabi sa kanya, “May manga sundalu duy ataytabug ginan sa Samarya.”

¹⁸ Magkun si Bin Hadad, “Dakpa niyu sida! Una unu kanda turunu atay, manlaban man ngatay makipaghusay.”

¹⁹ Ti manga kan-akan pag sundalu ti magpanguna sa manga sundalu Israil,

²⁰ ag pinanmatay kada usa kanda manga kalaban. Nakan nalagiw ti iba manga sundalu Aram, ag linagas sida manga Israilita. Dapat si Bin Hadad hanggan ti iba waya niya manga kaibahan nakapalagiw yi sakay sa kabayu.

²¹ Katida ti paggira nida ni Hari Akab sa Israil. Mayamu gid pag manga Aramiyu kanda pinanmatay ag pinanbuul nida kanda manga kabayu hanggan manga kalisa.

²² Pagkalawuy tunda, pinmakarani ti purupita sa hari Israil ag magkun, “Pag-alistu kawu ag paggayak mayad, dahil man-gira duy utru ti hari Aram sa dasun pag timpu.”

²³ Pagka dugay, magkun ti manga takinan hari Aram sa kanya, “Ti diyus manga Israilita diyus manga bantud; tunda kay dahilan nida pagpanalu. Dapat nu manlaban kita sa kanda sa karatagan, pihu gid matalu nita sida.

²⁴ Inda kanmu buwatun: Bul-an nimu katungkulan ti 32 ka hari, ag ilisan sa kanda ti manga kumandir sundalu.

²⁵ Bag-u manipun kawu manga sundalu, manga kabayu, ag manga kalisa kay kayamu parihu sa manga nadura kaybi. Manlaban kita sa manga Israilita sa karatagan, ag pihu yi matalu nita sida.” Pinmasnu si Bin Hadad, ag binwat niya inda.

²⁶ Pagka sa dinmasun pag timpu, tinipun ni Bin Hadad ti manga Aramiyu, ag inmatag sida sa banwa Apik hampay manlaban sa manga Israilita.

²⁷ Tinmipun diman hanggan ti manga Israilita, nangalistu kanda manga kailangan, ag linmuwas hampay manlaban sa manga Aramiyu. Kinmampu sida sa maatubangan sa kampu manga Aramiyu. Dapat parihu lang sida sa duwa ka dariit pag manada manga kambing nu ipaparihu sa manga Aramiyu mawayakan sa karatagan.

²⁸ Nag-atag ti manugsirbi Diyus sa hari Israil ag magkun, “Inda duy ti pagsabihun Panginuun: Paghantupun manga Aramiyu kuntay diyus aku manga bantud ag balaw diyus manga karatagan, nakan ipatalu niku sa kanmu ti mayamu nida sundalu hampay maalaman niyu, aku ti Panginuun.”

²⁹ Nankampu ti manga Israilita hanggan ti manga Aramiyu magkaatubang sa sulud pitu ka sirang. Ag nanlabanan sida pagka sa ikapitu pag sirang. Sa usa lang ka sirang, nakamatay ti manga Israilita 100,000 sundalu Aramiyu.

³⁰ Ti manga nasawad pag manga Aramiyu nagpinalagiw sa banwa Apik, nu naan ti 27,000 sa kanda nadugsakan alad batu banwa. Nalagiw diman si Bin Hadad ag napatagu sa kasuuk-suukan balay.

³¹ Magkun sa kanya kay manga may kangaranan, “Nasaydan duy nimi kuntay maawaun kunu ti manga hari Israil. Nakan atag duy kami sa hari Israil, manulung saku ag manhigut lubid sa kanmi ulu. Barang nangus balaw kawu niya matyun.”

³² Nakan nanulung ngani sida saku, ag hinigtan lubid kanda ulu. Bag-u nag-atag sida sa hari Israil ag magkun, “Kanmu duy manugsirbi si Bin Hadad magpakihampang nu mahimu, danga niyu siya pag matya.” Sinmagut ti hari, “Buhi waya maaw siya? Ga patar-ari yi niku siya.”

³³ Nagpasnu ti manga may kangaranan sa sagut hari kuntay usa ka palatandaan may pag-asa sida, nakan rargu waydi kanda sinabi, “Hu, si Bin Hadad ga kanmu yi patar-ari.” Magkun ti hari, “Daran-a niyu siya sa kangku.” Pagkaras-ug ni Bin Hadad, ipinasakay siya ni Akab sa kay kalisa.

³⁴ Magkun si Bin Hadad sa kan Akab, “Iuli niku sa kanmu ti inagaw niku ama pag manga banwa ginan sa kanmu ama. Ag mahimu kawu magpatindug manga tindahan sa Damasku, parihu sa binwat niku ama sa Samarya.” Sinmagut si Akab, “Nu katunda, palpasan kawu niku.” Nakan nagbuwat sida kasunduan ag pinaighit siya ni Akab.

³⁵ Taynguna, may usa ka tawu kaibahan sa gurupu manga purupita ti sinugu Panginuun hampay sabihun inda sa kay kaibahan, “Malu, sakti nimu aku.” Dapat tinmanggi kay kaibahan sa pagsakit sa kanya.

³⁶ Nakan magkun inda sa kanya, “Dahil unman nimu sinunud ti Panginuun, matyun kawu liyun sa kanmu pag-ighit sitay ginan.” Pag-ighit ngani niya kaibahan, nakitan siya usa ka liyun ag minatay.

³⁷ May nakitan maan usa ka tawu ti purupita ag magkun siya, “Malu, sakti nimu aku.” Nakan sinaktan siya ag nabiyagan siya.

³⁸ Bag-u linmakaw ti purupita ag tinmindug sa may dalan hampay alagdun ti hari Israil lumawuy. Nagpabalhinguun siya sa panab-anan pagpauli patakip sa kay mata hampay balaw makilala.

³⁹ Paglawuy hari, nanringgit ti purupita sa kanya, “Mahal Hari, kinmuyug duy aku sa labanan, ag ati may tawu nandara sa kangku bihag ag magkun, ‘Bantayi nimu inda pag tawu. Nu makapalagiw siya, matyun kawu ngatay pabayadun 35 ka kilu pilak.’

⁴⁰ Dapat nabalag duy aku sa tuhay pag buruwatun nakan nakapalagiw ti bihag.” Magkun ti hari, “Dapat lang gid kawu parusahan angay sa pagsabihun nimu.”

⁴¹ Linapsu purupita kay takip sa kay mata, ag nakilala siya hari Israil kuntay usa siya ka purupita.

⁴² Magkun siya sa hari, “Inda duy ti pagsabihun Panginuun: Dahil pinalpasan nimu ti tawu ti pagsabihun niku kailangan matyun, kawu ti matyun bilang kailis niya ag matyun diman kanmu manga tawuhan bilang kailis niya manga tawuhan.”

⁴³ Nuli maruku ag magkaisug ti hari Israil sa kay balay hari sa Samarya.