1 Hari 2 - Hanunuu

Ti manga Bilin ni Dabid sa kan Sulumun

¹ Pagka arani yi mamatay si Dabid, may manga bilin siya sa kan Sulumun sa kay anak. Inda kay manga bilin:

² “Arani yi aku mamatay. Nakan pagpakarig-un kawu ag pagpakabaskug,

³ ag tupada ti manga pag-isugu Panginuun kanmu Diyus. Pagsunud kawu sa kay manga paanyu, ag tupada kay manga surundanun hanggan manga sugu nakasurat sa Kasuguan ni Muysis, hampay manalu kawu sa tanan nimu buwatun, una naan tabug kawu.

⁴ Nu buwatun nimu inda, tupadun Panginuun kay itinaratu sa kangku, nu kang manga linahi mangabuhi sa tama ag magsunud sa kanya sa buu tagipusuun, may usa gid pirmi sa kanda ti humari sa Israil.

⁵ “Indaay waya kang bilin sa kanmu: Alam nimu nu hintay ti binwat ni Huab kay anak ni Siruya sa kay pagmatay sa duwa ka kumandir manga sundalu Israil sa kan Abnir kay anak ni Nir hanggan sa kan Amasa kay anak ni Hitir. Minatay niya sida ga manga kalaban, dapat binwat niya tunda sa udas unman may labanan. Siya ti may saragtun sa kanda kamatayan.

⁶ Nakan buwata ti mayad angay sa kanmu naisipan buwatun sa kanya, dapat danga siya pagpahintuluti mamatay may kahusayan sa kay pagkagurangun.

⁷ “Dapat pagmayad kawu sa manga anak ni Barsilay taga Gilyad. Pagpakauna sida pirmi kaibahan nimu, dahil inawatan nida aku katpung nalagiw aku sa kanmu patar-ari sa kan Absalum.

⁸ “Tandai gid nimu si Simiy kay anak ni Gira, usa ka Binhaminita taga Bahurim. Masyadu gid niya aku sinaadan katpung inmatag aku sa Mahanaim. Dapat pagka nagsampak kami sa Sapa Hurdan, nagsumpa aku sa kanya sa ngaran Panginuun balaw niku siya matyun.

⁹ Dapat taynguna, kawu ti pumarusa sa kanya. Madunung kawu ag alam nimu nu unu ti dapat buwatun. Una gurangun yi siya, matya siya.”

¹⁰ Pagka sa uryan, namatay si Dabid ag ilinbung sa kay banwa.

¹¹ Naghari siya sa buu Israil sa sulud upatpulu ka timpu — 7 ka timpu sa Hibrun ag 33 ka timpu sa Hirusalim.

¹² Si Sulumun ti nag-ublus sa kay ama sa kan Dabid bilang hari, ag marig-un gid kay kaharian.

Namatay si Aduniyas

¹³ Taynguna, si Aduniyas kay anak ni Hagit nag-atag sa kan Batsiba sa kay ina ni Sulumun. Nagpaingana si Batsiba sa kanya, “Mayad aw kanmu turunu sa pag-ataytag?” Nagsagut si Aduniyas, “Hu, mayad.

¹⁴ May sabihun lang mana aku sa kanmu.” Nagpaingana si Batsiba, “Unu lugud kanmu sabihun?”

¹⁵ Nagsagut si Aduniyas, “Alam nimu aku yi mana ti hari, ag pag-alagdun inda buu Israil. Dapat tuhay ti nangyari; kang patar-ari imaw ti nagbaliw hari, dahil imaw inda ti kagustuhan Panginuun.

¹⁶ Taynguna may hilingun aku sa kanmu. Nu mahimu danga aku pagpabayunga.” Nagpaingana si Batsiba, “Unu lugud ati?”

¹⁷ Nagsagut si Aduniyas, “Nu mahimu sabihi si Hari Sulumun paasawan-an niya sa kangku si Abisag taga Sunim. Alam niku balaw gid niya kawu bayungun.”

¹⁸ Nagsagut si Batsiba, “Hu, sabihun niku sa hari.”

¹⁹ Nakan nag-atag si Batsiba sa kan Hari Sulumun hampay sabihun sa kanya ti tungkul sa pagsabihun ni Aduniyas. Pagka nakitan siya ni Sulumun, tinmindug siya sa kay tukawan hari hampay sulangun kay ina, bag-u nanluhud siya sa kay ina. Bag-u tinmukaw siya sa kay tukawan hari. Nanpab-ul siya turukawan ag ipinauli sa kay sikun, ipinatukaw siti kay ina.

²⁰ Magkun si Batsiba, “May hilingun aku sa kanmu diit lang; danga gid aku pagpabayunga.” Magkun ti hari, “Unu duy ati, Inang? Balaw niku kawu bayungun.”

²¹ Magkun si Batsiba, “Paasawan-an duy si Abisag taga Sunim sa kanmu patar-ari sa kan Aduniyas.”

²² Magkun si Hari Sulumun, “Hayga paghilingun gid nimu paasawan-an si Abisag sa kan Aduniyas? Barang sabihun diman nimu pakan-an niku sa kanya kang kaharian, dahil mas gurangun siya sa kangku ag kakampi niya si Manug-asiwa Abyatar ag si Huab kay anak ni Siruya!”

²³ Bag-u nagsumpa si Hari Sulumun sa ngaran Panginuun, “Mana parusahan gid aku Diyus nu balaw niku matyun si Aduniyas dahil sa tunda kay paghilingun.

²⁴ Ti Panginuun imaw ti nagpili ag nagpauli sa kangku sa turukawan niku ama ni Dabid. Tinupad niya kay taratu ipakaun niya ti kaharian sa kangku hanggan sa kang manga linahi. Nakan magsumpa aku sa buhi pag Panginuun mamatay si Aduniyas taynguna gid pag sirang.”

²⁵ Bag-u sinugu ni Hari Sulumun si Binaya kay anak ni Hihuyada, kuntay matya si Aduniyas, ag minatay ngani niya si Aduniyas.

²⁶ Bag-u magkun si Hari Sulumun sa kan Manug-asiwa Abyatar, “Pag-uli kawu sa kanyu tanman sa Anatut. Matyun diman mana kawu, dapat balaw niku kawu matyun taynguna dahil kawu ti ikinatiwala sa Kaban Panginuun Diyus katpung kaibahan waya nimu kang ama si Dabid, ag kaibahan niya kawu sa tanan niya manga inagwanta.”

²⁷ Nakan pinalayas ni Sulumun si Abyatar sa kay buruwatun bilang manughandug Panginuun. Ag natupad ti sinabi Panginuun ati sa Silu tungkul sa magtal-anakan ni Ili.

Namatay si Huab

²⁸ Unman inawatan ni Huab si Absalum makatukaw sa tukawan hari, dapat nangawat siya sa kan Aduniyas. Nakan pagka nabaritaan niya ti pagkamatay ni Aduniyas, nalagiw siya atabug sa turda Panginuun ag nanhiyaput sa manga ga sungay pag manga suuk harandugan.

²⁹ Pagka nabaritaan ni Hari Sulumun nalagiw si Huab atabug sa Turda Panginuun napakarani sa harandugan, sinugu niya si Binaya matya si Huab.

³⁰ Nakan nag-atag si Binaya sa Turda Panginuun ag sinabihan si Huab, “Pagluwas kawu magsabi ti hari!” Dapat nagsagut si Huab, “Balaw aku manluwas; sitay yi aku pag mamatay!” Nanmalik si Binaya sa hari ag sinabi kay sagut ni Huab.

^31-32 Magkun si Sulumun sa kan Binaya, “Buwata kay pagsabihun. Matya siya ati sa turda ag lubngan, hampay aku hanggan ti magtal-anakan niku ama balaw managut sa pagmatay niya sa kan Abnir anak ni Nir, ti kumandir manga sundalu Israil, hanggan sa kan Amasa kay anak ni Hitir, ti kumandir manga sundalu Huda. Minatay niya inda pag manga tawu unman may binwat daut ag unman alam kang ama. Mas matadlung ag mayad inda pag manga tawu kaysa kanya. Taynguna balusan siya Panginuun sa kay binwat sa kanda.

³³ Siya hanggan kay manga linahi managut tugka aban sa pagkamatay inda pag manga tawu. Dapat kang ama si Dabid hanggan kay manga linahi ag kay kaharian pakan-an mayad pag kahamtangan tugka aban.”

³⁴ Nakan inatag ni Binaya si Huab ag minatay. Ilinbung siya arani sa kay balay sa pangawakawaan.

³⁵ Si Binaya kay anak ni Hihuyada ti inilis hari sa kan Huab bilang kumandir manga sundalu. Ag kay inilis sa kan Abyatar si Saduk usa ka manughandug.

Ti Pagkamatay ni Simiy

³⁶ Taynguna, ipinatawag hari si Simiy ag sinabihan, “Pagpatindug kawu kanmu sadili balay sa Hirusalim ag pag-uli kawu ati. Danga gid kawu mag-ighit sa banwa hanggan mag-atag sa iba rugar.

³⁷ Udas mighit kawu ag dumipay sa Luung Kidrun, pihu gid mamatay kawu, ag kawu ti sisihun nu mangyari inda.”

³⁸ Nagsagut si Simiy, “Mayad diman kanmu sinabi, sundun gid niku inda!” Nakan nangulian dugay si Simiy sa Hirusalim.

³⁹ Dapat pagka sa ikatlu pag timpu, ti duwa sa manga suruguun ni Simiy linmayas nag-atag sa hari Gat sa kan Akis, anak ni Maaka. Pagka nabaritaan inda ni Simiy,

⁴⁰ pinaulian niya tukawan kay asnu ag sinmakay, ag inmatag sa kan Akis sa Gat hampay hanapun kay duwa ka suruguun. Nakitan niya sida ag dinara pauli.

⁴¹ Pagka nabaritaan ni Sulumun inmighit si Simiy sa Hirusalim bag-u nag-ati sa Gat, ag nakabalik yi,

⁴² ipinatawag niya si Simiy ag sinabihan, “Kabay ipinasumpa kawu niku sa ngaran Panginuun bag-u pinaandaman sa udas mighit kawu sa Hirusalim ag umatag sa iba rugar pihu gid mamatay kawu? Ag balaw aw lugud magkun kawu mayad kang sinabi ag tupadun nimu inda?

⁴³ Bati hayga unman nimu tinupad kanmu sumpa sa Panginuun? Hayga unman nimu tinupad kang sugu sa kanmu?”

⁴⁴ Magkun waya gid ti hari sa kanya, “Pihu maalaala gid nimu ti tanan nimu binwat daut sa kang ama sa kan Dabid. Taynguna balusan kawu Panginuun sa kanmu daut manga binwat.

⁴⁵ Dapat aku papaladan Panginuun, hanggan ti kaharian niku ama ni Dabid parargu niya parig-unun tugka aban.”

⁴⁶ Bag-u sinugu hari si Binaya matya si Simiy. Nakan dinara ni Binaya si Simiy sa luwas ag minatay. Nagrig-un waya gid lalu ti kaharian sa sirung pagdumara ni Sulumun.